小禮物

過兩天會返香港走走, 最啱就係整ｄ曲奇帶俾鄉親父老, 指點指點, 所以屋企遙身一變成為曲奇工場, 我就成為曲奇女工!

今次做左大量既脆口牛油曲奇, 因為靚d同無甘易碎.

加小量超鬆化牛油曲奇.

係咪好壯觀呢 ?

好耐無食既 - 餐肉包

今日用左湯種食譜做左餐肉包同肉鬆包, 因為太耐無食餐肉包喇, 老公同我都覺得好好味, 一人一個唔夠喉!

呢個包底都唔錯, 相信會係我常做麵包之一 .

湯種系列

係網上搵麵包食譜, 一直都避開個d有牛油同奶既食譜 (因為自己超討厭牛油同奶同芝士), 不過再避落去, 都唔係辦法, 好多鬆軟麵包都要有佢地存在, 我諗我要妥協喇!

搵到blog友 蕭亞蓮既湯種食譜, 又試新野!

包底材料: (減少份量)

高筋粉 65g
低筋粉 30g
奶粉 4g ,
砂糖 10g
鹽 2g
乾酵母 2g,
水 22g
全蛋 20g
湯種 75g (熱水 21g + 高筋粉 4.3g 拌勻後放涼)
無鹽牛油  15g.

因為我無奶粉, 其實係未接受到用奶粉, 所以我用左咖啡伴侶(3g)代替!

做法:

1. 將所有粉類拌勻後 + 蛋 + 水 + 湯種混合成麵糰, 再加入牛油 搓至光滑並起薄膜狀,

2. 滾圓後蓋好, 放於溫暖處發烤約60分鐘至2倍大後, 取出輕壓放氣,

3. 分割成4等份, 滾圓 , 靜置10分鐘, 包餡做型後, 放於溫暖處發烤約50分鐘至2倍大, 以180'c 焗約15分鐘至表面金黃便成。

今次整左肉鬆飽同埋朱古力榛子醬飽，造型就麻麻地, 不過就算鬆軟, 見到d 飽飽係焗爐到彭脹, 真係好開心!

差不多吃至記得未影包內的組織!

新曲奇用具 & 脆口曲奇

第一次整曲奇整得唔靚, 好難o即花, 今日買左個新用具, 曲奇個樣即刻唔同晒!

另外, 因應我老公既喜好, 我想搵一個脆口d既曲奇食譜, 最後搵到blog友莎莉豪既食譜：　

牛油    250g
糖霜    120g　（減至112g）
高粉    150g
粟粉     90g
低粉     80g
蛋白     60g

做法
1) 空溫牛油 & 糖霜打 軟至米黃色
2) 分2-3次加入蛋
3) 加入過了篩的粉類
4) 入唧袋,唧花
5) 180度15-20分鐘

呢個食譜唔止脆ｄ，加咗啲高粉,筋性強啲, 個花焗既時候無甘易化, 靚仔左添。

榛子麵包條

見到餅神 Vanlily 既榛子杏仁麵包條, 好靚, 好吸引, 好想一啖咬落去, 唯有膽粗粗試下自己整.

呢次都應該係我生平第一次同牛油有甘親蜜既接觸, 隻手搓落去包住左牛油既粉團到, d 牛油竟然係粉團中唧出黎, 唧到落我隻手到, 天啊, 實在太嘔心喇!  因為時間緊迫, 我仲要用手試圖搓返d牛油入個粉團到, 天啊, 我究竟係到做緊咩野呀?

材料: 高粉 100g / 糖 18g / 鹽 1g / 蛋 30g / 冰水 25g / 酵母 2g / 牛油 12g / 榛子醬

做法:

1)       第一次發酵: 15mins

2)       輕輕桿平後於入雪櫃(下層): 15mins

3)       桿成薄長方型, 3/2塗上榛子醬, 向中間叠着: 先叠沒有榛子醬的那邊, 再叠其餘的一邊, 成3層, 放入雪櫃(下層): 30mins

4)       取出後分成2條長條, 再在每一條長中間切一刀, 但要留下少許不要切斷

5)       然後就以左叠右, 右叠左的方法, 成紐紋條

6)       第二次發酵: 45mins

7)       塗上蛋汁

8)       190c, 16mins

呢個包做法比較特別, 像做酥皮做法, 要雪入雪櫃的.

原來做紐紋條一d 都唔易, 你睇下我做得幾醜樣, 又焗得好燶添，同埋唔知係唔係發酵得唔好, Vanlily 做了2大條麵包既份量, 我就只係做到兩小條咋!

不過包內既組織又ok喎, 而且又真係幾好食喎.

超鬆化曲奇

我老公好鍾意食曲奇, 尤其是藍罐曲奇, 每年過年收到就好開心, 今年過年收到一盒, 高高興興從香港帶返新加坡慢慢嘆。

當我收拾行李時, 將罐曲奇收得太好, 到了三月才醒起佢既存在, 由於我超討厭牛油味, 為左避免佢一個人係短時間內食哂呢盒曲奇, 怕影響健康, 我就建議佢帶返公司和同事一齊食, 睇佢唔多捨得, 不過都有照做。第二天放工返黎, 佢同我講, 罐曲奇已經俾人食左一半啦, 見佢個樣好似好心痛, 突然間我就閃左一個念頭, 就係要搵一個好味既食譜同焗曲奇俾佢食。

搜羅網上既食譜, 發覺擬似Jenny's Bakery 既超鬆化曲奇大熱, 我家姐Anthea又勁鍾意呢款曲奇, 好, 就整呢隻啦。

材料:

牛油100克 (緊記用golden churn butter)

糖霜25克

面粉75克

粟粉25克

呢款曲奇, 祕訣係一定要用呢隻牌子既牛油

制法:

1.      牛油與糖霜打滑

2.      篩入面粉及粟粉混合成面團

3.      o即花，然後放入180度焗爐焗12分鐘至金黃色

第一次 o即花 o即得唔好, 溶哂變成圓形, 我老公話有八成似Jenny's Bakery既鬆化曲奇.

自家意粉

自從沉迷熔焙之後, 變得無以前甘有心機煮晚飯, 因為又要上網搵下有咩好焗, 又要研究下網友既心得, 又要去做採購, 又要八卦下人地既網誌, 總之就實在唔夠時間用啦。而且黎左新加坡甘耐, 個人既節奏都慢左落黎, 無法啦, 你急人地唔急, 得你一個急有咩用喎.

不過為左健康d, 我都仍然堅持老公返工既日子, 自己煮晚餐.

講左甘多野, 都係想解釋點解今晚又係整欖油辣椒香蒜煙肉意粉.

其實真係幾好味架!

意大利香草包 Foccacia

繼上次整完法式辣魚包後, 覺得自己焗麵包很好吃外, 又好玩, 即刻上左癮!

不過自己識既野太少喇, 其實應該係咩都唔識就真, 唯有上網搵多d料啦. 連日來不停搵呀搵, 搵左唔少網友既心得同食譜, 其中要數最犀利既網友, 綠萼都可算數一數二, 佢用左唔少既篇幅, 拍左唔少既 video黎教大家焗麵包, 呢種無私既精神, 實在難得! 

我就學左唔少野喇, 我一路睇住佢教人搓麵團既video, 隻手一路學住郁, 我老公問我係咪係到耍功夫 ？

我自己好鍾意食意大利香草包 Foccacia, 見到有食譜, 就試下跟住做.

材料
高筋粉 250g
糖 7g
鹽 4g
instant yeast 4g
黑椒碎 少許
意大利雜香草 1tsp
橄欖油 15g
暖水 160g　

做法:
1. 基本材料搓至起筋
2. 搓至麵糰光滑和不黏手，基本發酵45min至1hr, 發至2倍大，以手指測試為準
3. 把麵團取出,略拉長,像摺A4 size的信一般,把麵團的左,右面邊摺向中間，鬆弛7分鐘
4. 焗盤塗油，把麵團按壓成一片，用筷子戳孔，表面塗一層薄薄橄欖油，撒上Rosemary
5. 再發酵約20分鐘, 發至2倍大.
6. 200度焗約15分鐘.

吃過自己焗既 Foccacia, 覺得同我係Peck買到既Foccacia都有一段距離, 自己既比較乾, 唔夠軟熟, 唔夠香, 連個樣都唔係好似添, 可能係我既技術問題, 要再研究, 研究!

第一次整包 - 法式辣魚包

今日跟blog友莎莉整左呢個法式辣魚包, 整緊時以為會唔成功, 因為根本連搓麪團係咩 一回事都唔知, 又無上堂, 又無上網睇 video, 有d覺得自己太衝動.

但出來既效果, 竟然好似澳門朱仔飽!

食譜:
麪粉:250g
鹽& 酵母:各一茶匙
水:約半杯
餡料:辣沙甸魚 (自己加左d洋蔥)

做法:
1. 先搓成麪團再蓋上保鮮紙發酵50分鐘,
2. 之後分成兩份麪團再蓋上濕布發酵20分鐘
3. 洋蔥切粒, 用沙甸魚油炒香, 加入弄碎了既沙甸魚, 放涼
4. 擀開麪團後包入餡料卷成長形再發酵40分鐘
4. 面層掃上沙甸魚油, 跟著以200度焗20分即可.