蟹宴 - 大閘蟹, 重皮蟹, 長腳蟹

今晚齊集在二家姐家裡食超豪蟹宴, 點豪法, 一餐食三種不同品種的蟹, 每種都有各自獨特的性格, 實在機會難逢, 而且除了蟹之外, 仲有好多美食.
八兩重既大閘蟹公.

脹卜卜既重皮蟹.

肥嘟嘟既長腳蟹.

首先出場的是重皮蟹, 秋冬時分, 就係他們當造的時候, 二家姐拿手的鹽焗重皮蟹, 大大隻,  膏香肉鮮, 很好味.

跟著出場既係八兩重既大閘蟹公, 斤兩十足, d 蟹膏多到, 睇下, 非常有睇頭, 食入口, 好鮮甜, 好'gel' 口, 簡直唔捨得吞, 我剩係鍾意食蟹公, 蟹乸d 膏太硬, 唔啱我.

至於長腳蟹就要黎同埋d 特登係九龍城買既肥牛煮日式麵豉湯烏冬, 又係為食之過, 顧住食, 無同d 製成品影相, 唯有睇下未煮前既相.
好靚既肥牛粒.

非常均勻的肥牛片.

呢碟厚d 既要黎煎既.

稻庭烏冬都係九龍城買既, 日本造, 超好吃, 滑溜溜,  唔係講笑.

  
其他美食包括檸檬香草烤雞, 皮脆肉嫩, 好吃.

秘製炆牛腩和烤排骨, 好味, 只可惜又無影相, 留番下次至出場.
酸子薑和酸青瓜, 又酸甜又爽脆, 呢個好重要, 要黎刺激食慾, 平衡番油膩感.

仲有好靚既 芥蘭同菜心.

當然唔少得甜品, 係Awfully Chocolate 買既黑朱古力蛋糕, 順帶為剛過了生日和就快生日的家人一齊唱生日歌, 開心下.

蛋糕都好濃朱古力味, 我覺得如果朱古力醬再多些就更好了.

澳洲牛奶 @ 香港

澳洲牛奶公司是一間我們讀書時已常常幫襯的食店, 當時已經非常出名, 炒蛋超好吃, 厚多士超吸引, 檯子超細, 座位超迫, 伙計速度超快. 唔知點解, 他們的蛋可以炒得這麼香, 這麼滑, 和一般茶餐廳的塑膠蛋非常不同, 而且他們算是早供應厚多士的始祖之一, 面頭脆, 但仍可吃到軟熟的麵包, 雙重享受, 不能抗拒.
今天去佐敦修眉, 一定要去食番個茶餐. 一如以往, 座無虛席, 等伙計安排座位, 坐低就好合作即刻叫左茶餐多士走牛油, 炒蛋, 通粉, 唔駛一分鐘, 野食就黎左喇, 野飲唔可以叫住, 因為檯面唔夠大, 擺唔哂.

我最鍾意就係將火腿放在多士上, 再將大量炒蛋放係上面, 大大啖咬落去, 好味. 不過要好小心, 因為d 蛋好易跌出黎, 跌落隔離個人隻碟就唔好啦.
呢個通粉就比較普通, 加些胡椒粉都ok 既.

忍唔住要 close-up 多次d 雞蛋, 睇見都想食.

唔好睇d 伙計哥哥好似好cool 好惡, 佢地其實都幾好禮貌同幾好人, 我地同檯有個亞嬸, 野食到齊, 但突然同伙計講, 呢個位好大風, 佢坐唔到, 唔該幫佢轉個位, 個伙計哥哥一句怨言都無, 即刻俾左另一個位佢, 仲幫佢攞埋野食去, 都唔惡呀! 

 
佐敦白加士街47號地下
Tel: 2730 1356

營業時間：

星期一至日: 07:30-23:00

雲泉仙館 @ 香港

今日係重陽節, 最適宜登高出外走走, 我們就決定到粉嶺郊遊, 其實我們主要目的地係雲泉仙館, 因為他們的齋菜很出名, 他們地方很大, 有很多人來幫襯.

我們來過很多次, 所以很熟架步, 一來到, 揀餸, 俾錢, 他們就會安排檯給我們, 他們會提供免費的白粥, 當我們盛好粥的同時, 齋菜就會出場了, 他們的白粥做得相當好, 好綿好香, 可惜唔記得影相.

呢度好多野都好味, 尤其是春卷和酸齋, 舊時芋頭魚都好好, 不過而家稍為落多左粉, 如果少d粉, 多d 芋蓉就好喇.

雲泉素食中心

粉嶺打鼓嶺平輋路雲泉仙館

Tel: 2674 2194/ 2674 3933

榮暉咖啡美食 @ 澳門

係官也街食完大量的小食後, 已經飽了七成, 所以放棄了原先訂好檯的葡餐, 逛完一輪後, 就去新馬路十月初五街的榮暉咖啡美食, 嘆番個下午茶, 呢間茶餐廳係大姐夫的哥哥介紹, 聽講係睇旅遊書發掘的, 出名雞湯米和鯪魚球麵, 起初我們以為是得幾款食品的小店, 原來係一間兩層高的茶餐廳, 食品款式相當多元化.
因為多人等的士, 所以我們搭了巴士, 在新馬路下車, 再行去, 但原來榮暉係唔近新馬路的, 我們行了很耐, 行到很肚餓, 而且來到時發現兩層的位都坐滿了, 等位的同時八卦左有什麼食物多人食, 而我們的食慾亦被刺激到了高峰, 所以決定唔留肚, 要盡情食.
先黎個炸雲吞, 得!

天麻川芎白芷魚頭湯米, 呢度好多人食, 我地叫了四碗, 好認真, 唔止湯底有川芎白芷味道, 米粉上都有些川芎白芷, 魚頭很新鮮, 份量都唔少, 應該有半個大魚頭, 湯底好鮮甜, 米粉就普通些, 唔係好吸收到d湯, 我覺得配伊麵會好些, 下次要叫伊麵.

雞湯米 一碗, 有藥材味, 有d 似懷舊雞酒, 真材實料, 伙計姐姐話他們每天要去兩次入新鮮雞.

牛筋腩伊麵 一碗, 筋腩都好淋好啱味, 同伊麵好夾.

見牛筋腩好味, 再叫多一碟剩筋腩一齊食, 可惜呢碟唔係好夠淋.

鯪魚球麵, 好味, 可惜得四粒太少了.

見隔離檯食牛肉炒麵, 好似好得, 我地唔蝕底又叫, 炒麵好味, 牛肉普通.

之後我地又叫左碟炸鯪魚球, 都得喎, 顧住食, 無影相.
紅豆冰, 原來除了紅豆, 仲有大大粒的腰豆.

食完之後, 大家都好滿意, 覺得無介紹錯, 而且大家都知道係我們搭船離開澳門之前, 應該再無空間食多餐, 所以打算行多一陣, 買完手信, 就提早少少返香港.

 
榮暉咖啡美食
新馬路十月初五街54號地下
Tel : 2892 1205
 

氹仔官也街 @ 澳門

早餐放棄了酒店的早餐, 去左新馬路食豬什粥, 但今次覺得他們的水準下降了, 粥稀了又有不少味精, 豬什只得粉腸好吃, 不提也罷.
之後回酒店休息休息, 退房後就去左氹仔官也街掃街.
第一站:
鴻彬記小食店 - 告利雅施利華街58號地下 (在官也街尾轉右)
牛雜 - 款式好齊, 連牛沙瓜和牛肺都有, 樣樣都好味.

第二站:
莫義記 - 氹仔官也街9號地下
大菜糕 - 好味

第三站:
天娜餅店 - 氹仔告利雅施利華街41號 (在官也街尾對面)
呢兩款我都無份食.
榴槤雪糕 - 媽咪話, 無以前咁好食

木槺布甸 - 姐夫話, 質地硬左d, 唔夠滑.

第四站:
鉅記 - 葡撻, 我無食, 老公話都幾好.

第五站:
必達士 Bitter Sweet- 氹仔官也街92號地下
木糠旦糕, 我無食, 家姐同姐夫話好味, 好滑, 好香.

 

話咁快, 就掃完條食街喇.

肥仔文美食 @ 澳門

雖然係師傅仔食晚飯已經食到好飽, 但都無影響我們打算到肥仔文食蟹粥做宵夜的決定, 因為遊澳門食蟹粥差不多是指定動作, 而且肥仔文的蟹粥做得頂瓜瓜, 唔食就好蝕.
食宵夜前就到左威尼斯人酒店和美高梅酒店逛逛, 個人認為威尼斯人酒店都算做得好靚, 帶點拉斯維加斯既感覺, 只係有些細節比較粗糙, 至於美高梅酒店就普普通通, 唔算特別.
去到肥仔文時已經差不多十二時了, 竟然要等位, 到我們坐低落柯打時, 最意不到既係, 侍應話佢地今晚剩番一隻蟹咋, 一鍋蟹粥要用兩隻蟹, 所以如果我地要食蟹粥就要落其他配料, 例如雞件.  只係十二點, 就已經無蟹賣, 好彩我地都分到一隻, 如果特登黎到, 食唔到蟹粥, 就太可惜了.
結果我地就要左一鍋蟹雞粥, 三個雲吞撈麵, 一碟油菜.
蟹雞粥, 鮮甜到你唔信, 粥又好綿, 雞都幾好, 呢鍋粥要一百二十元, 我覺得佢值一百二十分.

雲吞撈麵都有驚喜, 麵係古法竹升麵, 好爽口, 撈得好味, 雲吞都得, 好有舊式雲吞味, 唔錯.

 
肥仔文美食
氹仔孫逸仙博士大馬路460號
Tel : 2884 4079