Pierside Kitchen & Bar @ 新加坡

2010年4 月30日
日頭去完新加坡金沙後, 找不到有興趣試既餐廳食晚飯, 今晚有點涼, 唔太熱, 好想坐室外, 對住靚靚既夜景食飯, 終於決定到 Fullerton One 逛逛, 睇下有無餐廳啱心水.結果見到 Pierside Kitchen & Bar, 有室內又有室外, 個景好靚, 對正新加坡金沙, 再睇下個餐牌, 都ok 喎, 雖然係星期四晚, 但都有好多人幫襯, 應該都幾好.

個麵包好有趣, 外脆內軟, 但味道比一般歐洲包較淡, 但都好味.

送既前菜, 好別緻.

我地叫左兩個主菜一齊食, 一個係烤黑安格斯西冷

西冷肉質好好, 火候都控制得好.

配菜有一個紅蔥頭撻, 好特別.

另一個主菜係燒有機豬扒

豬扒好厚, 但肉質唔硬, 好有肉汁, 味道較得好好, 唔會淡但又唔咸.

配菜除左d 豆同南瓜蓉外, 仲有一件炸肉丸配焗梨, 好特別同好味.

我地叫左兩個配菜, 一個健康, 一個超唔健康.健康既係黑醋蕃茄沙拉, 好清新好味.

唔健康既係鴨油煎薯仔, 呢個超好味, 真係十個好味架.

食食下, 竟然見到個月亮係座金沙酒店右上角, 好近呀, 近到差d 以為係盞燈.

坐係呢度食飯, 真係好舒服好浪漫, 係拍拖既好地方.

Pierside Kitchen & Bar
Unit 01-01 One Fullerton

1 Fullerton Road

Singapore
telephone 6438 0400

離家出走一千日

2010 年 5 月 8 日

極其無聊既我, 突然開個電腦, 計一計我地離家出走左幾多日, 由第一天離開屋企飛去到新加坡計起, 原來今日剛剛一千日, 雖然我地飛返香港已經有一個星期, 但我地其實未返屋企住, 因為屋企要做些少裝修, 所以我地暫時住係酒店.

酒店雖然唔新, 但地點方便老公返工同方便我返屋企, 而且個房都係好大, 又有微波爐同煮食爐.

其實我地每次放假返黎都有返屋企瞓, 不過我當然無咁好心水清扣起呢d 日數喇.

Marina Bay Sands @ 新加坡

臨離開新加坡既前一天, 除左要交番間屋俾業主, 攪埋d 濕碎野之外, 我地都趁新加坡既金沙賭場同酒店已經係四月二十七日開幕, 唔執輸又要去睇下.

連接地鐵 Promenade 站同金沙賭場有一條設計特別既行人天橋 The Helix , 早幾日至隆重開幕, 我地又即管睇下有幾特別,

我覺得影相出黎既 The Helix 靚過現場睇, 而且原來係未開哂，因為仲有好多野係未起好哂．

一路行去睹場同酒店，其實都幾遠同好熱好晒，下次都係搭的士去到門口好d, 下面張相見到三座好高既就係酒店, 一齊捧住既就係空中花園, 可惜要六月二十三日至開放, 賭場就係酒店對面.

睇左賭場先, 入口有職員象徵式檢查護照, 呢樣唔夠聖淘沙賭場認真.

賭場面積好大, 個日係平日, 所以比較冷清, 好多荷官只係圍埋傾下計, 而且有d 機件未調交好, 間中有職員要修理下.

賭場側邊既購物商城超大.

出面對正Fullerton Hotel, 魚尾獅同榴槤頭, 夜晚應該好靚.

金沙酒店既正門．

三座酒店既大堂係相連, 所以好大.

酒店餐廳.

酒店擺放左成個 Marina Bay Sands 既模型

暫時我覺得金沙除左好大同幾靚之外, 就未係好特別, 好期待佢既空中花園.