Day 1 - 無招牌 @ Vivo City

我地同班大朋友同小朋友久別重逢，興奮都震！　

Check-in 好酒店，食埋個午餐兼下午茶後，竟然落起大雨，無得游水，大人有大人休息，小朋友有小朋友玩，我同老公屬於小朋友組別．

第一餐晚餐，揀左食出名既無招牌白胡椒蟹，平時食開Geylang 店，今次貪方便，同埋諗住坐得好ｄ，試下Vivo City店，裝修靚好多，餸菜選擇多ｄ，而價錢都貴ｄ，例如，係Geylang 店，蟹是SGD38 一公斤，不收加一，Vivo City店，就要SGD40 一公斤，再加一，即是SGD44, 貴SGD6.

味道就差唔多，服務可能係幫襯慣左 Geylang店，所以覺得佢地既服務好ｄ！

1 Harbour Walk
#03-02 Vivo City
Tel : 6376 9959
11am - 11pm

復活節旅行 @ 新加坡

今年係我地同一班舊同學兼好朋友相識二十週年既大日子, 我地細細個就識落，關係密切，時常都有聚會，今年意義重大，梗係要攪ｄ特別項目來慶祝一番，最好就是一齊出外玩幾天，其實呢次唔係我地第一次，之前都試過去台灣丫，泰國丫, 澳門就已經多到數唔到幾多次喇.　但係今次最大既分別係有３個小朋友一齊去，肯定好好玩！

由於我地人多，難夾日子放假，最易就到大家就係復活節個４日，不過就唔去得遠，又要安全，又要乾淨，又要啱小朋友玩，又要有好野食，都唔多地方可以揀，最後就揀左新加坡，甘我同老公咪無得飛，只需要執齊行李，塔程的士，坐係酒店，等集合！

新加坡有好多新酒店，可惜一間都未起好，我地既要求係泳池要大要靚，要有resort feel, 唯有住返聖淘沙Rasa Sentosa Resort (Shangri-la), 因為係假期，所以酒店房好貴，要成HKD1450一晚，坦白講泳池真係好靚，連住沙灘，仲有三條滑水滑梯俾小朋友玩．

但係房就比較舊，如果佢仲係孤寒唔修葺下d房，遲ｄ都幾難同新酒店競爭！

今次雖然唔齊人，但都有１２個大人加３個細路，陣容鼎盛，未出發先興奮，希望呢幾日天氣好ｄ，大家都玩得開開心心！

我第一個蛋糕

從來都無諗過自己會焗蛋糕, 因為一直都將蛋糕與牛油連在一起, 自少就是一個怪人, 超討厭牛奶, 牛油, 芝士, 食蛋糕只揀選朱古力同埋咖啡味.

唔知道原來戚風蛋糕係用菜油做的, 你話我係咪超無知呀!

登燈瞪凳!

我第一個蛋糕終於完成喇 !

整蛋糕前多得我亞嫂Yammie 既指導, 同埋借左本好有用既參考書"完美戚風蛋糕專輯 - 輕鬆做,零失敗"給我。熟讀後，好有手痕既感覺，好想快ｄ返屋企試整．　

仲要多謝我家姐Anthea 送出既非常好用電動打蛋器．　

整緊既時候, 我唔敢影太多相, 因為整戚風蛋糕時, 掌握時間好重要, 我怕為左影相而失敗就唔底喇 !

材料　（１７ｃｍ戚風蛋糕模）

蛋黃 4５g
砂糖A 40g
沙拉油 28g
泡打粉　４ｇ
低筋面粉 65g
蛋白 90g
砂糖B 28g
熱水 48g
檸檬汁 1/4 茶匙

1) 蛋黃加砂糖A用手動打蛋器混合 （不可以打至發泡，如果打至白色，會使蛋的風味減低) , 加入沙拉油, 熱水拌勻, 篩入粉類混合。

2) 蛋白和砂糖B,檸檬汁打發至企身結實, 和1)混合 (分兩次，不要令蛋白糖霜泡泡消失), 倒入17cm模內180度焗23分鐘, 倒扣至涼或過一晚脫模。