北京之旅 2009 - 前奏

老公可以在年尾攞到兩天假, 連埋新年的長週末, 嘩, 有五日假, 即刻有d身痕, 返唔返香港走一轉, 但機票好貴呀, 而且太遲了, 剩番的航班時間又唔好, 再諗諗有邊到好去, 有諗過近近地不如去檳城, 之後老公突然提議去北京, 因為十月時去唔成北京, 我地仲念念不忘, 雖然機票都唔平, 同返香港一樣, 不過話哂要坐六個鐘頭, 遠好多, 而且如果今年去得成北京, 我地既 2009年的旅遊目標就可以達標喇.
一諗到有得去北京, 個心就好興奮, 不過都有d 擔心, 因為天氣實在好凍, 究竟係新加坡熱慣既我地, 頂唔頂得順北京零下幾度既天氣呢 ?  加上我地手上其實無幾多冬天衫, 呢度雖然有冬天衫賣, 但唔多選擇, 好彩我家姐幫我執左幾件衫, 又係香港買左d 熱包, 我姐夫幫我地托佢既朋友帶左俾我地, 解我地燃眉之急, 實在太感激佢地喇, Thank you so much!!
加上日本Uniqlo 近幾個月登陸左新加坡, 亦都幫左唔少忙, 佢地既HeatTech 保溫底衫都好似幾好.
落實左去, 就上網揾資料, 因為話哂我地兩個都未去過北京, 呢幾日不停睇人地既 blog, 又日日 check 住北京既天氣, 今日已經好左d, 最高係一度, 最低係差唔多 - 6度, 晴天.

 
希望天氣繼續好天, 唔好落雪呀 !
希望我地既行程順順利利! 玩得開開心心!
我地聽日出發喇, 聽晚已經約左係北京做野既朋友食飯, 我已經準備左好多問題問佢, 我諗佢唔會嫌我地煩既.
要等返黎新加坡至可以報告我地既情況, 因為係中國大陸係開唔到yahoo.
Happy New Year ! 新年快樂!!
 
 

聖誕節 - 烤雞 / 薄餅 / 沙拉

臨近聖誕節, 好多烹飪節目都介紹焗火雞, 睇得多, 攪到我都有些手痕, 不過就唔係焗火雞, 只係焗番普通春雞.

又係橄欖油醋汁沙拉, 配肥膩既肉食最夾.

今次係第一次在焗雞既中段時間加入新鮮車厘茄同煮到大半熟既薯仔同紅蘿蔔, 真係有驚喜, 焗熟既車厘茄好甜好味, 薯仔又香又粉, 連紅蘿蔔都超甜, 好後悔落得太少.  烤雞都好得, 食雞脾最爽, 滑溜溜!

肉丸薄餅, 好貪心, 落左好多材料, 有鮮磨菇, 鮮冬菇, 黃椒, 青椒, 菠蘿, 茄醬, 洋蔥同肉丸, 又係一半有芝士, 一半無, 焗之前, 搽d 橄欖油, 都做到脆身既效果.

好滿足的一餐!

平安夜 - 壽司亭 @ 新加坡

平安夜, 通常都唔會去食西餐, 因為怕同人迫, 所以揀左食日本野, 大約八點去到Paragon既壽司亭, 竟然唔滿.
今次食, 覺得唔夠上次咁有驚喜.
海鮮沙拉配芝麻汁, 一樣好味.

魚鬆炸蝦卷, 雖然我地坐壽司檯, 但我地揾侍應落柯打, 諗住會即做, 新鮮d, 點知侍應係壽司迴轉帶到攞俾我地, 凍哂啦, 炸蝦唔似炸蝦.

壽司set, 海膽最好, 拖羅都甘香, 但係好薄, 唔似上次食刺身咁厚, 油甘魚同三文魚都得.

燒牛扒, 有一邊鞋d, 另一邊就ok 喎.

肥美d 個邊好味d.

湯麵一般.

仲想食壽司, 要揀d 係壽司迴轉帶上無個d, 費事佢地又俾d 整定既, 炸軟殼蟹手卷無喇卦.
賣相唔夠靚, 蟹子收埋係裡面, 但味道都得, 紫菜都脆.

上次刺身水準高d, 係撞彩? 定係水準不穩 ?
 
 

做冬 - 周庄 @ 新加坡

平日既晚上好少出街食飯, 但今日係冬至, 冬大過年, 為了隆重其事, 就決定出外食番餐做節, 而且其實因為我地手上有張周庄二十蚊星紙既贈卷, 呢張贈卷一定要係平日用, 我地最近又覺得佢飲茶點心麻麻地, 所以張贈卷用黎食晚飯可能好d.
我唔肯定佢平日晚飯多唔多人幫趁, 穩陣起見我都訂左檯先, 我訂八點, 去到真係好多人, 差不多坐滿, 無侍應得閒理我, 唔知係因為今日係冬至定因為佢地做緊贈卷優惠 ?
今晚我地叫左三個餸一個炒飯, 好有做節感覺, 因為我地叫左元蹄呀, 兩個人食一隻元蹄, 有點過份, 但做節嘛.

做得唔錯, 肉質好嫩, 唔鞋口, 皮做得好淋, 入口溶化, 用刀輕輕切一刀, 推一推骨頭, 就已經骨肉分離, 味道都幾好, 唔會太咸, 空口食都得.

菠蘿咕嚕肉, 味道好味, 但比較細碟.

魚香茄子煲, 好耐無食, 但我有點失策, 因為我地叫左炒飯, 呢個有點咸, 配白飯會好d.

呢個極品炒飯, 同餐牌個張相, 完全唔同, 好彩味道都得, 有xo 醬, 蝦粒, 帶子粒.

雖然我地好大食, 但都食唔哂個元蹄, 所以打包回家, 下餐再食.

格仔紋豬扒

係呢度既超市, 好少見到呢款有骨豬扒, 通常都係得舊骨加件剩瘦肉, 又鞋又乾, 難得見到兩件有絛淋d 既肉同脂肪既豬扒, 就決定帶返屋企.

用刀背略為拍鬆後, 醃三個鐘頭, 用坑紋煎 pan 煎完兩面後, 放入焗爐焗左二十分鐘左右. 配橄欖油醋汁腰果菜沙拉, 煎薯仔片同麵包.

除中間既瘦肉乾左d 之外, 成塊豬扒都好好味! 下次試下用慢火焗, 睇下會唔會好d.

 
 

飲茶 - 老香港小鮮 @ 新加坡

好耐無食點心, 心思思就去左老香港小鮮飲茶, 呢間酒樓聽講係香港人開, 食落佢d 點心, 比起周庄的點心, 真係較有香港味道, 而且整得較有心機.
蝦腸粉, 腸粉好滑, 唔會好似塑膠.

燒賣既外貌同味道都好, 裡面d 豬肉係切粒, 唔係免治豬肉, 連埋爽口既蝦肉同冬菇, 得! 

連胡椒豬肚湯都有, 幾好喎, 豬肚好厚身, 唔會太硬又唔太淋, 咸酸菜好爽口, 湯味好濃.

乾燒伊麵, 味道對板, 雖然細碟左d, 但兩個人都夠食.

 
 
 

中式菜肉飽

上次第一次做中式飽時, 覺得捲花卷的形狀好難, 完全掌握唔到捲的手法, 沒有信心捲得到, 果然無估錯, 捲第二次, 仲差過第一次, 呢次其實主要想做菜肉飽, 順便捲了兩個花卷, 包了兩個豆沙飽.

菜肉餡 - 小白菜, 瘦豬肉, 鮮冬菇

包中式飽的摺紋實在唔容易, 做出來的太唔明顯了.

蒸完出黎的紋, 更加唔清楚, 味道都ok, 但因為我沒有落肥豬肉, d 餡比較實左d, 可能係少左d 豬油滋潤下.

下面係花卷同豆沙飽, 好醜樣!

 
下次再黎過.
 
 
 

威南記 Wee Nam Kee @ 新加坡

星期日的晚飯, 好想食叁峇通菜 (馬來風光), 所以就決定到威南記炒餸食飯, 威南記係一間老字號的雞飯店, 我相信佢係日本界相當有名, 因為我在yahoo 搜尋威南記, 搜尋結果頭幾頁都係日文人的網誌, 介紹呢間飯店, 真係失敬失敬!
我地去到, 嘩, 座無虛席, 仲有一些人等緊位, 但你有你等, d 伙計就唔係幾理你, 望下你, 又唔打算幫你登記先後次序, 我地企左一陣都理解唔到佢地安排座位既辦法, 再睇多陣, 原來真係無章法架, 隨班伙計鍾意俾邊個坐就俾邊個坐!  真係俾佢地嚇親, 咩年代? 竟然仲咁無系統!
當我地坐低後, 就急不及待落柯打.
第一樣黎既就係叁峇通菜, 炒得幾好喎, 唔係太辣. 

排骨王, 酸酸甜甜, 味道都唔錯, 只係多左d 鬆肉粉.

叫左兩個雞脾飯, 一個燒雞, 一個蒸雞, 燒雞香, 蒸雞滑, 雞味就唔預佢有啦.

雞飯都幾好, 飯係完正一粒一粒, 唔會太濕太淋, 不過味道我都係鍾意 '天天海南雞飯'多d. 

要左個涼瓜湯, 點知賣哂, 所以要左個咸菜豆腐湯, 原來個湯都幾多料, ok啦.

食完真係捧住個肚!

Rocky Master @ 新加坡

尋日瞓醒就去烘焙店掃貨, 然後就係附近搵野食, 唉 ~ 如果呢度有間大家樂或者茶餐廳就好喇 ... 我知我係發夢.
行左一陣, 見到呢間 Rocky Master, 唔似連鎖店, 都好乾淨舒服, 有早餐, 三文治, 意粉, 薄餅, 都ok, 就試佢啦!

我同老公都係揀美式早餐, 都幾豐富, 雞蛋煎到啱啱熟, 如果個邊脆d 就仲好.

磨菇雖然唔係新鮮磨菇, 但都好味, 出奇地, 雞肉腸都好食喎.

咖啡同茶都ok, 呢個早餐每人十蚊星紙有找, 唔錯唔錯.

 

聖誕薑餅 Ginger Cookies

聖誕佳節, 除了做樹幹蛋糕, 又想做d 應節曲奇, 可以做薑餅人, 但我又唔想晝公仔, 係網上找開薑餅人的食譜時, 見到blog 友綠萼介紹左一個似馬莎薑餅的食譜, 就即管試下, 但個食譜係用牛油, 而馬莎薑餅的成份係用棕櫚油.

棕櫚油, 一直都給人印象係唔健康, 有反式脂肪, 但早前有一個電視節目 'Palm Oil: Good Fat / Bad Fat? 似乎替棕櫚油, 做了一些平反, 美國FDA禁止使用反式脂肪, 但批准棕櫚油可在美國使用, 有心臟科醫生表示棕櫚油不含膽固醇, 經多年研究, 食用橄欖油的人和食用棕櫚油的人的壞膽固醇和好膽固醇水平差不多一樣, 不過研究的詳情就沒有交代, 節目亦提到, 大量砍伐樹木來種植棕櫚油,  對生態環境有很壞影響, 總括來說, 棕櫚油雖不含反式脂肪, 但始終都有飽和脂肪, 不建議食用太多.

心裡掙扎, 究竟試唔試棕櫚油來焗薑餅好呢? 其實用棕櫚油都係出於好奇, 想知係唔係真係會令曲奇鬆脆d, 而我既然唔食牛油曲奇, 試下用棕櫚油都無壞, 反正超市賣既餅食大部份都有棕櫚油, 連馬莎薑餅都係, 而且曲奇只是要來過口癮的零食，又唔係主要食糧, 只要唔食過多, 一試無壞.

到超市同烘焙店找棕櫚油, 其實都唔係好多選擇, 最後揀左呢隻美國製造含有棕櫚油成份的Shortening.

自稱沒有反式脂肪, 而且飽和脂肪低過牛油.

食譜:

A牛油 50g  (我用了 50g shortening + 10ml 水)啡糖 40g蜜糖 2 湯匙

B低筋粉 125gBaking powder 1tsp [我用了5g]Baking soda 1tsp [我用了5g]Ground ginger 1tsp [我用了3g]Allspice 1/2 tsp (我沒有Allspice, 隨意灑了些肉桂粉和荳蔻粉就算)

C砂糖 (裝飾用) [我無落]

做法
1) 打通軟材料A
2) 材料B 過篩, 加入 1), 拌勻
3) 弄成麵糰, 放入雪櫃半小時, 取後碌平, 用餅模印出曲奇 (如做馬莎薑餅的圓形, 將麵糰分成16份, 滾動成小圓球, 再用手指壓平)

4) 160度焗15-20分鐘

焗好後會有裂紋, 因為馬莎薑餅的特色係有粗獷自然裂紋, 原來裂紋是因為多量的raising agent 所做出來的效果.

果然好鬆脆, 同真的馬莎薑餅好似, 如果用足5g 薑粉, 個辣度應該更似.

順便焗些超牛油曲奇, 入好袋, 可以送禮了.