傷心酸辣粉 @ 香港

臨近新年, 我又返左香港放假喇, 雖然老公要返工未走得, 但佢叫我返黎食多d 好野先, 唔駛等佢, 我當然唔會辜負佢一番好意啦. 呢排麻辣係我同我家姐心中大熱, 所以急不及待就要試下香港有麻辣食既舖頭, 第一間要試既係好多人讚既傷心酸辣粉.

不過酸辣唔係好對我地既胃口, 所以我地要左兩個口水雞套餐, 配雞絲涼拌麵, 麵要小辣, 雞要中辣, 加埋可口可樂, 爽呀!

我地問伙計可唔可以要雞脾, 佢話唔得, 係切雞師傅話事, 我地話盡量喇唔該, 結果黎到無令我地失望, 一個係雞脾, 一個係雞翼加雞胸.

雞肉好滑, 味道好啱味, 有麻辣既效果.

雞絲涼拌麵, 麵條有d 似拉麵, 質地都幾好喎, 花生好脆口, 麵既份量唔少, 唔係幾啖就食哂, 雖然雞絲鞋d, 但浸落口水雞個汁到, 都好味.

呢間舖頭係分店, 總店係深水埗, 細細間得一張檯, 比較 'up dup', 呢間分店就大好多, 廚房只係用玻璃隔開, 睇到裡面好傾理, 食得好放心.

呢餐食左一百蚊有找, 好滿足, 如果唔食得味精就可能唔係好啱.

傷心酸辣粉
旺角登打士街43號登打士廣場1樓