釗記油雞麵家 & Cedele @ 新加坡

我地好耐之前已經發現新加坡牛車水有兩間同名既釗記油雞麵家, 相距只有十零個舖位, 舖內陳設不太相同, 應該唔係分店咁簡單, 早幾個星期睇到有美食節目介紹呢兩間老麵家, 原來又係家庭糾紛而造成左兩間同名既店, 節目內形容其中一間, 必試不可 (die die must try!)
其實油雞麵對我地唔係特別吸引, 不過去開牛車水, 一試無妨, 叫左兩個油雞脾麵.

份量都幾大份, 豉油雞味道偏甜, 都幾好味, 雞肉唔算好滑, 我覺得係介乎冰鮮雞同雪藏雞中間, 整體黎講, 我只係覺得一般咋, 可能因為呢度既豉油雞唔夠我媽咪整既豉油雞好味.
不過見佢地不停出好多雞, 師傅又不停斬定d 雞, 應該都有好多捧場客.

呢個午餐又點可以滿足我呢, 之後去左Cedele 買外賣.

我要左個合桃香蕉朱古力蛋糕.

好多香蕉, 朱古力蛋糕既朱古力味夠濃, 面頭既合桃粒同脆麥皮同個蛋糕都好夾, 如果側邊既朱古力慕絲再濃朱古力味就好喇.

老公要左個磨菇雞批, 都好味!