Day01-低B Hotel〔Easy Hotel]

我地頭兩晚同埋最後一晚都是留係倫敦，我地訂左Paddington 既 Easy Hotel，因為貪佢平d新d同埋地點方便, 訂房時已經知d房細,
每樣野都要計錢, 例如存放行李, 收拾房間, 睇電視 . . .

但真係估唔到d房真係細得好交關，間房得一張雙人床同埋兩個掛勾咋, 連一張枱仔都無, d野可以放係邊 ？ 喼都唔可以平放呀, 個廁所得個坐廁, 洗手盤同企缸仔 !
仲細過東京d 平酒店.

我地仲要被安排住係3樓, 間酒店係無Lift架! 樓梯窄到連行李都差d 轉唔到身, 搬左件行李上樓已經好辛苦, 最攪鬼係, 我地頭兩晚既房係分兩次訂，佢地竟然要我地 ....... 第二日早上十點前攞埋行李check-out, 然後係三點鐘再check-in，我地以為自己聽錯, 明明連續住兩晚,
有什麼理由要check-out 再check-in 呀 ？連續住兩晚，仲幫佢地慳返收拾房間, 有無甘蠢呀?  咩人黎架 ?

結果爭持一輪，佢地至肯放過我地,
你話佢地係唔係食古不化 ? 一 D 都唔 easy 呀!

Day01 - 為食精

終於到達倫敦，天氣就真係麻麻地，係白金漢宮睇換班時, 又大風又大雨又凍, 我著住羽絨帶住帽，都頂唔住，不停流鼻水，唯有出動我既秘密武器 – 口罩黎擋擋風, 最後連傷風藥都食埋, 第一日我就攪成甘，之後唔知點算？

我呢個為食精，都無得救，甘唔舒服，都仲想去食咸牛肉飽，呢個係旅遊書介紹的, 因為形容得太吸引喇，我又以為好近地鐵站, 最終行了好遠至到,
真係有d覺得對佢地唔住．

買左個飽後, 好開心, d咸牛肉好味兼好肥美, 仲要係有好多咸牛肉，d咸牛肉有d似咸牛脷, 3英鎊咋,
唯一美中不足係個飽唔熱．　

其實咸牛肉肥唔肥美,係撞彩既，我地買左後, d牛肉係瘦d架，四個人裡面係得我食得肥膩，可能佢地想買到瘦d既，佢地無我甘好彩啊！

Beigel Bake
No. 159 Brick Lane, London,
Tel 071 729 0616, 24 hours

英法之旅, 足球狂熱

一直都無意欲去歐洲, 點解今次突然會有衝去歐洲嘅計劃呢 ?

其實都係因為曼聯係上季嬴了雙料冠軍，突然覺得支持咗曼聯十多年，點都應該去親身看一埸現場比賽, 而且我又擔心傑斯好快就會退休，遲d可能無機會看到佢踢波，更何況今年係我同老公結婚十週年紀念，應該做啲特別啲嘅野去慶祝.



做一個甘大型嘅project，最重要就係要有錢同人嘅支持喇，貴為首席曼聯球迷嘅老公,
當然無反對喇，旣然錢唔係問題，就要組軍啦，無理由兩個人去咁悶o架嘛，梗係要搵埋另一位首席曼聯球迷小螞蟻喇，嘩, 一拍即合，難得嘅係,
連唔睇波嘅小螞蟻太太都大力支持, 你話感唔感動呀!

今次真係要多謝小螞蟻，因為佢花了無數嘅時間, 安排行程, 交通, 酒店,
美食等等, 所有細節都有佢打點，希望令到成個旅程都非常順利同好玩，而且最重要係, 由原先打算睇一場曼聯,
到最後竟然係睇埋英格蘭，睇到朗尼入波嬴波不特止, 仲要睇到碧咸落埸踼，簡直興奮到震，好彩多得小螞蟻醒目留意到。

要數最著數係邊個，梗係我喇! 又有人出錢, 又有人出力，印印腳就有個超級興奮嘅旅程!