Jones the Grocer @ 新加坡

見到網友介紹 Dempsey Hill, 一個幾特別既地方, 之前係英兵兵營, 之後改建為一個集飲食, 購物, 悠閒既好地方.  趁今天星期六, 天朗氣晴, 去行下食個午餐都唔錯.

去之前, 睇過 Dempsey Hill 既網站介紹, 有好多唔同種類既餐廳, 最吸引我係 jones The Grocer - 一間澳洲食品雜貨店兼餐廳.

樓底極高, 佔地很大, 但唔算闊落, 因為四邊牆擺放左好多唔同種類既食物賣.

呢度可以買意粉同醬汁, 即刻交由廚房幫你煮.

酒唔止多種類, 連size 都有好多款.

中間d既地方, 放左好多長檯同凳招呼食客, 最中間既係做飲品同出甜品既工作檯, 圍邊有d 吧檯位.

我地大約中午一時左右到, 除了吧檯, 已經坐滿了, 有d 人唔鍾意坐吧檯, 但我就好喜歡, 因為我最鍾意八卦人地整野食既過程, 講真, 如果有餐廳肯招呼我係廚房食, 我都唔介意!
我揀左英式早餐 S$20, 有新西蘭雞蛋(可選水煮蛋, 炒蛋, 煎蛋), 腸仔, 脆煙肉, 炒磨菇, 番茄, 兩大塊多士 (Sourdough bread).  好大堆頭, 煎蛋煎得好啱我心水, 蛋黃九成熟, 磨菇好多汁, 腸仔好味.

煙肉, 脆得黎又唔會太乾, 而且唔係腩肉, 係大塊瘦肉個種 (Back Bacon), 相對地無咁肥膩, 多士都好味, 呢份早餐如果有埋茄汁豆, 就完美喇!

無茄汁豆, 唯有要求茄汁, 原來佢地d 茄汁好認真, 係有番茄肉既, 但甜左少少.

我老公就要左個 Brunch Special 既穀飼西冷牛扒配脆煙肉, 水煮蛋, 水田芥同烘多士, 賣相都好靚, 味道都得, 只係個西冷比我們的要求過熟左d, 同埋我估佢係澳洲牛, 鞋左少少. 

老公既咖啡, 都好飲, 我懶健康要左個鮮榨菠蘿汁, 好稀, 好唔得, 可能正常d 要個橙汁會好d.

呢度有個芝士房, 度門一開, 我差d 俾好勁既芝士味焗暈! 鍾意芝士既人應該好享受.

呢間鋪頭賣既食品唔平, 一塊仔既棕櫚椰糖就要S$6, 但係度食野, 出奇地唔駛加一同消費稅, 呢餐慳番S$9.
之後行左過隔離間畫廊睇畫同藝術品, 好悠閒!

行過見到Ben & Jerry's 有部好得意既van仔.

我地算好彩, 未落雨就走左, 一出到去烏節路就已經好大雨了.
jones the grocer
Location: Blk 9 #01–12
              Dempsey Road
    Open: Mon 9:30am - 6:00pm
              Tue - Fri 9:30am - 11:00pm
              Sat - Sun 9:00am - 11:00pm
       Tel: (65) 6476 1512

湯種綠茶紅豆包

買左紅豆蓉同抹茶粉, 想做十七小時中種抹茶紅豆包, 但原來其中一樣材料係鮮忌廉, 仲要成10%, 唉, 一下子俾佢考起左, 唔想落鮮忌廉, 可以用咩黎代替?
上網睇下有無網友有類似既經驗, 可以參考下, 睇下睇下, 又見到 MC 做左d 好靚既湯種紅豆包包, 不如就試做呢款啦!

MC 既食譜係無抹茶, 我跟中種的食譜落左3%, 而且佢用差不多300g低筋粉做6個包, 我怕太多食唔哂同太大個, 就按比例用三分二既份量做6個.

材料:

A) 湯種 (熱水 43g + 高筋粉 9g 拌勻後放涼)

B) 高筋粉 180g,  砂糖 17g, 鹽 3g, 乾酵母粉 4g, 全蛋 23g, 奶粉 6g, 水 43g, 抹茶粉 2g

C) 紅豆蓉 67g, 無鹽牛油 22g [我用了18g],

D) 紅豆蓉 53g  (分6份) [我用了70g]

做法:

1) 將材料 (B) 拌勻後加入 (A) 混合成麵糰, 再加入 (C) 搓至光滑並起薄膜狀,

2) 滾圓後蓋好, 放於溫暖處發酵約 5-60分鐘至2倍大,

3) 把麵糰取出輕壓放氣, 分割 6 等份滾圓後靜止15分鐘,

4) 把麵糰捍長後加入 (D) 並卷起, 放於焗盤上, 於溫暖處發酵約 15-20分鐘至2倍大, [我用了30分鐘]

5) 以190'c 焗約 15分鐘至金黃,  取出放涼便成。[係焗之前, 我掃了蛋汁] 個樣都幾可愛, 質地好軟熟. 無論係外表或味道, 一d 都唔似係抹茶麵包, 呢包抹茶粉好唔得呀, 我今次買日本伊籐 園既. 另外我覺得可以多d 紅豆餡添.

壽司亭 Sushi Tei @ 新加坡

早幾天收到壽司亭的宣傳冬之北海道美食的資料,  再按入他們的網址, 看看其他介紹, 原來他們之前推出秋之北海道是當造的秋刀魚.
我以前試過新鮮的秋刀魚刺身, 魚味濃郁, 非一般魚生可媲美, 所以印象很深, 我見壽司亭網站列出秋刀魚的供應期是十月至十二月, 而且一條秋刀魚刺身都只是星紙十四元, 所以決定要在黎緊既星期六盡快試一試.
今天去到Paragon 既壽司亭至發覺他們轉了新鋪位, 很大很光猛, 但發覺已經無供應秋之北海道餐牌, 無得食肥美當造既秋刀魚, 侍應姐姐話, 上個星期日係最後一日供應, 唉... 我遲左一個星期.
雖然可惜, 但好快, 我就俾個刺身餐牌吸引了, 決定試什錦刺身 (拖羅, 甜蝦, 帶子, 劍魚, 三文魚各三片), 和原先計劃的分別是少了半條秋刀魚, 多了甜蝦和劍魚, 價錢一樣, 星紙三十二元.

賣相好得, 樣樣都好靚! 尤其是個拖羅, 好肥美, 好慷慨, 切得很厚, 見到已經忍唔住笑.

甜蝦都好得, 鮮甜彈牙, 連蝦頭都唔可以放過.

當然唔可以唔要一碗白飯黎配刺身, 有白飯, 刺身特別好味同無咁膩, 五款刺身都好好, 只係帶子唔夠鮮甜.
老公就要了個天婦羅飯和海鮮沙拉.

沙拉都唔錯, 很新鮮.

原先只可選一款沙拉汁, 侍應姐姐很好人, 見我們有點難取捨和風汁和芝麻汁, 就話俾哂兩款我們, 結果係原先落選的芝麻汁好吃d.

正當我很享受自己那些美味的食物時, 亦不忘看看隔離檯的食物, 嘩, 見到海膽新鮮得很厲害, 塊塊都很堅挺, 希望下次去試既時候, 都係呢個水準!

臻子咖啡大理石戚風杯

自從學識做戚風蛋糕後，就愛上左佢，除了因為唔需要落牛油外, 它鬆鬆軟軟的質地實在很吸引, 做法又唔複雜, 味道又多變化, 係咁多款口味中, 我最鍾意就係咖啡大理石, 有咖啡的香味, 外貌特別, 準備功夫又簡單.
屋企有些臻子粉, 我相信加埋臻子粉去做咖啡大理石戚風應該會幾好, 今次唔用戚風模, 試下小杯裝.

材料
蛋黃 45g (3隻), 砂糖A 20g, 蜜糖 22g, 沙拉油 27g, 熱水 52g, 低筋面粉 75g, 臻子粉 10g

蛋白  145g (4隻), 檸檬汁 1/4 茶匙, 砂糖B 30g

咖啡粉4g, 熱水5g
1) 混合咖啡粉同埋熱水5g, 備用
2) 蛋黃加砂糖A用手動打蛋器混合 （不可以打至發泡，如果打至白色，會使蛋的風味減低) , 加入沙拉油, 蜜糖, 熱水拌勻, 篩入粉類混合。

3) 蛋白和砂糖B,檸檬汁用電動打蛋器打發至企身結實, 和2)混合 (分兩次，不要令蛋白糖霜泡泡消失), 慢慢加入 1), 大動作攪拌4 - 5次, 小心不要令雲石圖案散開, 倒入紙杯約八成滿, 180度焗20分鐘, 取出倒扣。

一份材料可做九杯左右.

我覺得加左臻子粉的效果很好, 果仁味和咖啡好夾, 蛋糕質地依然鬆軟, 正!

 

打邊爐 @ home (香港)

香港今年的天氣有點反常，十一月中氣溫已經得番十幾度，下星期仲會再涷ｄ，要發寒冷警告，天氣一轉涼，香港人就最鍾意打邊爐，我屋企人都唔例外．
以下既打邊爐，係無我份既．只係我屋企人知我為食同八卦，就算無份食，有得睇下都好，望梅止渴，而且今次佢地無心插柳下發現了一款好啱打邊爐既食材．
睇下，幾豐富，有花蟹，美國桶蠔，肥牛，海蝦，雞件，魚腐，蝦滑，墨魚滑，炸魚皮，魚蛋，粟米，相信仲有大量的蔬菜（無影相）．

呢個就係新發現，係龍躉魚腩，甘香鮮味之外，魚皮好厚，充滿骨膠原，係打邊爐之前，佢地蒸左一件黎試下個肉質，發覺太彈牙，用黎打邊爐，就非常好．

美國桶蠔，好大隻好肥美，睇見都流口水．

又係九龍城的肥牛粒同肥牛肉，當然無令人失望．

睇見都想食，下次返香港，一定要試下龍躉魚腩打邊爐先．

天喜磯味酒處 @ 香港

上次到天喜食午市壽司餐, 顧住食就唔記得影個超好吃卷物 - 吞拿魚腩卷, 我家姐話唔緊要, 去開就幫我補影番張相.
幾快, 佢就有功課交喇!

今次佢揀左中拖羅 / 吞拿魚 / 油甘魚 / 金目鯛 / 秋刀魚 / 深海池魚 / 甜蝦 / 海膽 + 吞拿魚腩卷物, 睇下個卷物, 好認真的!
再睇多次, 兩份擺埋一齊, 幾震撼.

講多一次, 自選壽司餐, 可選八件壽司加卷物 (卷物記得唔好選青瓜或黃瓜, 一定要選吞拿魚腩卷, 超值好多! ), 跟沙拉, 麵豉湯, 蒸蛋和雪糕, 只係$130 + 10%, 抵!
 
 

豚肉生薑燒

好少係伊勢丹買豬肉, 今天買開牛筋時發覺原來佢地有豬肉片賣, 仲係肥瘦適中, 要黎煮豚肉生薑燒就最好不過.

坦白講, 我係未煮過亦都未食過豚肉生薑燒, 因為如果出街食日本野食, 我一定食魚生呀, 壽司呀, 拉麵呀, 天婦羅呀, 點會浪費機會食熟既豬肉呢, 不過之前見過有人整, 覺得都可能會好味, 所以都有諗過試煮, 不過一直都無遇啱靚豬肉.
點知原來我無記低個食譜, 上網搜索下, 再就番自己有既材料, 就得出了下面個食譜: 
豚肉 250g
洋蔥半個
蔥粒少許
醃料:

1. 薑茸 1湯匙
   
2. 味淋 1湯匙
   
3. 日本酒 1湯匙
   
4. 日本豉油 1湯匙
   
5. 日本冷麵汁 / 燒汁 1湯匙

 調味料:

1. 味淋 1湯匙
   
2. 日本豉油 1湯匙
   
3. 日本冷麵汁 / 燒汁 1湯匙

做法:

1. 豚肉洗淨 , 然後用醃料醃半個鐘
   
2. 洋蔥切幼條
   
3. 洋蔥炒香 ,拎起留用
   
4. 然後煎香豚肉 , 再加入炒香既洋蔥 , 最後加入調味料, 至豚煮熟, 加蔥粒 
   
5. 準備大碗白飯 , 放上豚肉淋上汁 , 即成

我覺得有驚喜, 好味過吉野家牛肉飯, 豬肉比較有口感, 但又唔鞋, 薑味唔錯, 得!
 
 

英式山形吐司

做好了花生醬，就好想做個吐司，可以食完全自家製的花生醬吐司．
見到Blog 友 MC 有一個好特別的吐司食譜，要發酵七次，好處係少糖少油，但愈食愈香，雖然係直接法，但隔日都會軟熟．

材料:
A) 高筋粉 400g,  砂糖 6g, 鹽 8g, 酵母粉 3g, 奶粉 6g, 水 275g (因為太濕，我只用了250g） 
B) 無鹽牛油 4g, 

做法:
1. 將材料 (A) 混合成麵糰, 再加入 (B) 搓至光滑並起薄膜狀, 滾圓後蓋好,
2. 於溫暖處發烤約 20分鐘至1.5倍大後, 取出麵糰輕壓放氣後滾圓, (此步驟重覆 5次)
3. 在第 5次取出麵糰放氣後, 再次滾圓作第  6 次發酵至 2倍大為止
4. 取出麵糰後分割成三等份並逐一滾圓, 放入吐司模內, 最後發酵約 60mins 至高出模具約 3cm, 以200'c 焗約 30mins 至金黃
5. 把吐司脫模並於表面刷上溶化牛油便成。
我未脫模就掃左牛油．

最後發酵，我用左七十五分鐘，睇落都唔錯，不過如果比較番MC 既吐司，我呢個就唔夠佢那個細密．

好心急，加埋自製的花生醬一齊食，都幾好，不過無影相．
第二天，麵包的底部有少少硬．

終於自製的花生醬可以出場影合照啦！

我最鍾意加些砂糖一齊食，因為多左脆口的感覺和少許甜味，好滿足！

 

花生醬

花生醬對我來說, 唔止係要黎搽麵包, 仲可以要黎空口食, 而且係非常鍾意, 我可以捧著一樽花生醬, 一羹一羹, 當雪糕食, 只係怕它卡路里太高, 理智阻止我咁樣做.

見到blog友愛美麗自製花生醬, 做法簡單, 少油少鹽, 連糖都唔駛落，都好似樣, 最緊要有個乾磨的攪拌器就可以, 太好了,一於試做．

材料：　
花生 150g
油 　半茶匙
鹽 　四分一茶匙
1. 預熱焗爐150度，花生焗25mins, 放涼
2. 用乾磨先磨碎花生, 後加油和鹽共磨, 如太杰可用茶匙畧伴, 再磨
3. 花生油自然出，花生碎越磨越滑, 磨至喜愛的程度．

愛美麗還介紹了一個 Video　(Thanks for sharing!!)
Making Peanut Butter in 3 minutes　
睇過就會知道有幾神奇和有幾容易．花生醬好香，味道唔錯，而且自製的花生醬肯定唔係高糖食品，正！
 

The Coffee Bean @ 新加坡

今日係 Coffee Bean 食左一個好滿意的午餐, 係我至愛的煙三文魚三文治, 有幾款麵包可以選擇, 我揀左 Ciabatta 意大利"拖鞋"麵包, 落單時叫左唔要牛油, 唔要芝士, 來到竟然係搽左牛油, 唉, 差d 就接近完美啦!

雖然有些掃興, 但我無要求他們換, 因為見到d 煙三文魚太靚, 我已經忍唔住, 想即刻食, 我又驚如果要佢地換, 唔知攪幾耐, 又唔知佢地會攪左d 咩野出黎, 同埋我相信咁肥美的煙三文魚應該'擒' 到d 牛油味掛!

麵包烤得啱啱好, 外脆內軟, 煙三文魚又多, 有四大塊, 真係食到笑!
老公就揀左忌廉汁雞肉螺絲粉, 揀呢d 就啱喇, 因為我係唔會識煮俾佢食, 不過呢個賣相唔夠我個份靚.

螺絲粉遮住哂d 餸同汁, 不過老公話, 好味!