Canelé Pâtisserie Chocolaterie @ 新加坡

上個星期六, 輪到老公見牙醫洗牙, 之後就近近地係 Paragon 百麗宮到搵食, 老公估我會揀壽司亭食魚生刺身, 但我想食西式野多d, 望左幾間西餐廳, 最後揀左 Canelé Pâtisserie Chocolaterie, 除左因為佢既餐牌有吸引既食物之外, 揀佢其中一個主要原因係佢地既梳化椅, 睇落去好似好舒服.

真係無揀錯, 係好舒服, 軟熟得黎又撐到條腰喎, 夠大張好似可以包住成個人咁.
至於食物, 佢地應該係主打蛋糕甜品同朱古力, 不過未食午餐既我, 都係想食咸野多d.

未坐底之前, 睇佢地既餐牌時, 我已經決定要試佢地既紅酒燴牛肉, 可以選跟麵包或意粉, 三心兩意下我揀左意粉 (SGD18).

老公要左個周打蟹肉粟米湯 (SGD9.5)  ....

同埋招牌芝士漢堡包 (SGD15.5).

個樣好得下.

紅酒燴牛肉好大份, 好香紅酒味, 我最鍾意係佢d 牛肉係有肉有筋有肥有瘦既牛腩, 我最怕係一舊舊好硬既瘦肉, 配菜既紅蘿蔔同西芹好味, 薯仔就唔夠淋, 個汁稍為淡少少. 

意粉都ok, 好大碟.

個湯都唔錯, 勁多蟹肉, 粟米同薯仔粒, 好奶味, 我無試, 老公話好味.

個漢堡跟薯片同菜沙拉, 為左怕老公熱氣, 我梗係要幫手食薯片啦, 哈哈.

老公話呢個好味過上次 Hand Burger 個 Works Burger好多, 因為呢個太多芝士醬, 我只係試左少少牛肉, 有咬口, 有肉味. 

我係街食野, 通常都好八卦, 成日都會睇下附近既人食咩, 一有侍應生捧住食物行過, 我都會睇下, 據我觀察, 呢個漢堡都相當受歡迎, 出場率好高.
今次食得太飽喇, 無位試甜品, 或者留番下次啦.
 
Canelé Pâtisserie Chocolaterie
290 Orchard Road,
#B1-25 Paragon,
Tel : 6733 8893
Opening Hours : 11am to 10pm daily
 

又係白吐司

又係白吐司，悶唔悶？　
我就唔悶，不過可能你地就會睇到悶ｄ．
今次都係無頂角，但顏色就金黃色左好多，因為用左２２０度爐火．

但個頂既顏色就唔夠靚，而個底就好ｏｋ幾好，可能下次要將個焗盤放高一格．

今次一路都順利，發酵就麻麻地，第一次已經唔係幾好，有ｄ擔心，到第二次發左成個鐘頭都只得五至六成咋，最後竟然用左一個鐘四十五分鐘，唔知係唔係我前一晚做中種後，唔記得放番樽酵母入雪櫃就整死左佢地呢？　

但係出黎既麵包質地又好似ok 喎．

第一日既早餐係臻子朱古力醬加香蕉多士．

第二日既早餐係花生醬西多士．

因為想健康d唔用太多油炸，只係用少量油黎煎，但出黎既效果唔夠香．

 

Epicurious at the Quayside @ 新加坡

星期六晚有三場很重要既英格蘭超級聯賽賽事 - 榜首三隊既比賽, 結果曼聯同車路士都能大勝對手, 亞仙奴就臨尾被迫和左, 而家既形勢仍然好緊張, 好彩曼聯仍以一分拋離車仔, 同亞仙奴就有四分既距離, 每隊仲有六場比賽, 實在太刺激, 太令人緊張, 希望呢個形勢可以一直維持到五月九日既季尾喇.
睇完曼聯場比賽都已經半夜三點幾, 心情大好下, 瞓覺都瞓得特別甜, 星期日起床梳洗後都已經十二點有多, 見到有個新加坡blog 友好鍾意星期六, 日慢慢嘆個 Brunch, 佢有介紹好多地方, 我地揀左去 Robertson Quay 逛逛. 經過 Robertson Walk, 原來呢度都有餐廳同酒吧, 都幾寫意.

行到河邊, 就係 Robertson Quay, 沿途都有好幾間餐廳, 下面條橋對住既就係我想試既餐廳 Epicurious at the Quayside.

嘩, 坐滿哂人, 仲要等位.

外國人都係鍾意坐室外, 我地肯坐室內, 等五分鐘就得, 其實呢度唔算好大, 室內只得十幾個位, 室外就多d.

雖然已經差唔多一點, 我都係想食早餐, 我要左佢地既煎雙蛋配多士同薯仔 (SGD6), 再自選左腸仔 (SGD2.5), 煙三文魚 (SGD1.8) 同炒鮮磨菇 (SGD1.5)

一個凍檸茶 (SGD3.8), 原來係成樽上, 可以慢慢飲.

老公仲厲害, 要左個 Fully Monty Breakfast (SGD20), 3 隻雞蛋, 3條腸仔, 3 塊煙肉, 炒鮮磨菇, 半個番茄, 茄汁豆, 3塊多士同炒薯仔.

佢個早餐包一杯咖啡同一杯鮮榨橙汁.

佢地既麵包, 好好食, 好似係 Ciabatta 意大利拖鞋包, 我用煙三文魚同蛋白一齊食, 真係好滋味.

佢地每樣食物都好好味, 連個炒薯仔都好得，另外我當然唔蝕底, 除左食自己個份之外, 又係老公個份抽水, 煙肉都好香口.

佢地都好好服務, 一坐底就放底一樽用酒樽裝既冰水, 好體貼.  其實佢地既 Egg Benedict 好出名, 不過我地去到時已經無哂.

呢度個老板可能有收集舊野既愛好, 所以呢度有好多舊既杯杯碗碗, 我坐個位隔離仲有部舊 Dell電腦. 

我地坐既檯原來係舊麻雀檯黎既.

食飽飽, hea 夠就沿河邊行左一陣, 幫助消化.

 

Epicurious at The Quayside

#01-02 The Quayside, Robertson Quay
Tel: 6734-7720

Lunch
11:30am to 2:30pm, Tuesday—Friday
Dinner
5:30pm to 10pm, Tuesday—Sunday
Brunch
9am to 4pm, Saturday & Sunday
 
 
 
 

H One @ 香港

上次返香港前, 一早已經約好一位好朋友到中環食午餐, 急不及待要聚下舊, 佢揀左 IFC 既 H One, 一間非常唔錯既餐廳, 呢度既午餐係半自助餐, 任食既頭盤, 自選主菜一款, 加指定甜品一款, 同一杯咖啡或茶.
每檯都有一盤麵包, 好吸引, 尤其係香草包, 但份量太多了.

因為任食頭盤非常豐富, 頭盤區既食物好靚好吸引, 但係我地掛住傾計, 又唔想騷擾其他人攞野食, 所以都無影好多相.
煙三文魚, parma ham配哈密瓜好好味, 魚生甜蝦刺身, 沙拉都好新鮮.

主菜有好幾款選擇, 我地都係揀魚, 但我比較麻煩, 我怕個汁有牛油同芝士, 所以同侍應姐姐講唔要汁, 佢都好好人, 主動提議幫我問下個廚師先, 結果個汁真係有芝士, 雖然最後都係要走汁, 但佢唔嫌麻煩幫我走一轉, 真係好難得.

個魚好新鮮, 有魚味, 而且煎得好好, 雖然無汁, 但有鹽香, 好味, 配菜係欖油蕃茄醬香草煮雜色椒, 磨菇同茄子, 有點似普羅旺斯燉菜, 唔錯.

甜品好別緻, vanilla 雪糕配芒果 puff, 芒果好甜呢.

今次唔止聚舊, 好朋友仲為我補祝過左好耐既生日, 真係好窩心!

Hand Burger @ 新加坡

係新加坡食野, 其實都唔係間間好食, 好似上星期六, 行左去烏節路其中一個新商場 313, 裡面好多餐廳, '矇矇地'既我, 竟然揀左食 Hand Burger, 見佢地好似都幾多選擇, 裝修擺設都幾特別同有日本味.

食完覺得唔係幾好, 點解我話自己 '檬檬地', 因為我食完至記得好似有 blog 友試過呢間, 仲話佢唔係幾得!
我揀左原味既Hand Burger, 老公就揀左個極豐富既 The Works Burger.

因為我唔要芝士, 所以我既漢堡包就係咁既樣, 牛肉係有肉味, 但就無咩調味, 好淡口, 要靠食薯條既汁幫手, 最攪笑係塊牛肉好易散開, 一切就變得碎濕濕, 食食下, 我都有諗過影底佢, 不過真係食得好核突, 為免嚇親人, 都係無影.

呢個就係 The Works Burger.

賣相都幾吸引, 有煙肉, 炒磨菇, 炸洋蔥圈, 太陽蛋, 芝士, 牛肉, 生菜同番茄.

我試左洋蔥圈, 好油唔脆, 老公話味道只係普普通通, 我見佢既牛肉都係一禁就散.
坦白講, 食完真係無咩滿足感, 下次都係要有d 記性, 睇過既野唔好唔記得, 要食漢堡包, 都係食番 Carl's Jr 或 Burger King 好d.