曼谷自由行 Day 4 - 晚飯＠ 和成豐 (唔建議幫襯)

2010 年 2 月 22日
返左酒店後, 帶左小侄仔到兒童遊戲室同泳池邊玩, 大家嘻嘻哈哈一輪.

上番酒店房又聽歌跳舞, 娛樂我地夠喇, 就出發到唐人街食飯, 因為係放工時間, 預左會塞車, 之前領教過曼谷恐怖既交通, 所以早左d 出發, 結果一部的士既司機醒目d, 另一部既司機就行左一條好塞既路.

今晚打算到唐人街食翅, 其實無咩心水食店, 見杜如風有介紹過呢間和成豐, 又有網友讚過下, 就抱著一試無妨既心態黎試.  當我地想點翅時, 個侍應叫我地出門人揀翅, 佢話無哂d 平既翅, 得番 2000泰幣, 4000泰幣, 6000泰幣 .... 既翅.
當時只係七點鐘左右, 佢地既餐牌有 300 泰幣至 2000 泰幣既選擇, 我地問點解得番d 貴既, 佢話平個d 賣哂, 佢仲話過年係咁樣, 佢提議我地要一份 2000泰幣加一份4000泰幣既翅, 我地覺得有d 被搵笨既感覺, 所以我地就講左句, 如果唔食翅就 '是但' 食d 野, 再去其他地方食過, 個侍應竟然叫我地自己同老闆娘講下, 講? 講咩喎 ? 既然都話無, 唔食又無損失既, 個侍應見我地無反應, 就轉太叫我地不如要一份 2000泰幣既翅, 分兩煲, 好似其他人咁做.
唉, 佢地真係唔老實, 我地唔想浪費時間, 因為打算食完飯就去行夜市 Suan Lum Night Bazzar, 所以就接納左呢個方案, 再叫左d 其他食物, 快快趣攪掂呢餐, 留番個肚食宵夜.
我自己唔打算再幫襯呢間食店又唔會介紹俾朋友, 所以唔寫咁多, 睇相就算!

以上只係個人經歷同感受, 我都明白就算去一些好好口碑既舖頭都有機會遇到唔好既對待, 所以都唔太打緊, 只係想分享一下.