做完按摩, 我地搭的士返酒店攞行李, 當時四點幾, 已經好塞車, 又難捷的士, 所以返到酒店都已經五點, 我地約好左上次由機場送我地到酒店既大的士, 四點四十五分係酒店等我地, 所以我地塞緊車時, 打電話俾佢, 佢無甩底仲好準時已經到左, 我地叫佢一定要等我地.
之前同佢約好左六百蚊泰幣, 不算平又不算貴, 好處係我地唔駛分兩部車, 而且呢個司機都好醒目, 會安全地左穿右插找路行, 唔會好蠢咁只係跟死一條行車線行, 多得佢既醒目, 我地順利係六點鐘前去到機場, 我地班機係七點起飛, 所以我地都幾趕.
快快手攪左第一輪既退稅手續, 就寄行李同出登機証, 攪埋離境手續, 諗住好快收埋退稅d 錢就大功告成, 點知退稅既職員手腳又慢, 又少人當值, 當緊值既做做下又話要放食飯, 總之要令退稅既人知難而退, 幫政府慳得一蚊得一蚊.
幾經困難下都收番退稅, 只係辛苦左家姐同姐夫, 佢地排隊既時候, 我同老公同媽咪已經係登機閘口等佢地, 其實佢地都無遲, 只係當日班飛機早左俾乘客上機, 航空公司職員好似好急, 好想快d 關閘, 變左好大壓力要快d 上機, 下次要退稅真係要預多些時間同佢地玩.
近年國泰既飛機餐真的差得無話好講, 求人不如求自己, 我地有備而來, 帶左林珍香既脆豬肉條上機加餸之餘, 仲係機場買定芒果糯米飯, 百五蚊泰幣, 唔平但好味, 今次去曼谷, 真係中左毒, 六日食左五次芒果糯米飯.
曼谷, 我地走喇, 希望你地既政局快些穩定番, 唔好要人民受苦, 同唔好浪費呢個咁好既度假地方.
No comments:
Post a Comment