Peck - 意大利香草包 @ 新加坡

新加坡 - Peck

呢間賣既意大利香草包 Foccacia, 好好味, 又香, 又軟!

價錢唔貴, 一件約6吋 x 6 吋 x 2 吋既只係SGD1.4, 即是HKD7 - HKD8. 係新加坡買一個普通波蘿包平均都要SGD1.2啦!

呢個香草包焗熱佢, 外脆內軟, 就甘食都好好食, 要黎做三文治都好得!

地址 : 新加坡烏節路義安城大野高島屋B2 (B2, Takashimaya, Orchard Road)

website: http://www.fourleaves.com.sg/webtop/aboutus.html

Himawari Sushi @ 東京

去到日本, 梗係唔會放過食寿司既機會,  迴轉壽司都係一個好選擇, 就算吃得唔多, 都可以看過夠本.

Himawari 寿司位於西新宿, 係幾年前行開街經過, 試返黎, 都好得喎!

魚生新鮮, 價錢合理, 尤其是牡丹蝦, 油甘魚, 鯖魚, 吞拿魚腩碎 ..... 數唔哂啦, 自己去試吧!

大部份既寿司都係140yen 一碟, 超值!  後來見到"流行東京" 都有介紹, 勁呀!

Himawari 寿司
西新宿一丁目二番街

六歌仙燒肉 @ 東京

新宿既六歌仙燒肉, 原來有好多人識, 兩年前第一次去食過後, 與不同既朋友傾開呢間六歌仙至知, 好多人都有食過佢, 佢既裝修極普通, 價錢不便宜, 都有甘多人去, 都幾厲害。

佢既燒肉放題相當不錯, 有和牛, 有海鮮, 各類韓式熟食都有, 其實散叫都唔平, 放題可以試多d 種類既食物.

牛脷好好食, 睇下d 蟹腳 d 肉脹卜卜!

呢個係2007年既餐廳單張, 當時有牛脷放題既價錢是8,920日圓, 2008年既價錢約九千幾日圓.  剛剛上佢地既網看看, 嘩, 好似已經加到11,550日圓!  好厲害啊!

六歌仙 website: http://www.rokkasen.co.jp/contents/tabe_2.html

天丼 てんや @ 東京

呢間天丼 てんや餐廳係"流行東京" 既杜如風介紹, 唔講唔覺, 原來超多分店, 非常方便.

佢地既天婦羅炸得好好, d 蝦好大隻好彈牙, 價錢唔貴, 值得推介.

呢個係佢地既website: http://www.tenya.co.jp/takeout/index.html

博多天神 @ 東京

博多天神係一間豬骨湯麵專門店, 係新宿歌舞伎町布幾間分店, 每次去東京都要去探一探隻豬豬, 佢既豬骨湯非常濃郁, 邊食邊加大量既胡椒粉, 非常和味!

價錢唔貴, 約600日圓一碗, 做宵夜就最好不過!

營業時間: 11:00 - 27:00

大巴窰囉o惹 Tao Payoh Rojar @ 新加坡

Rojar 係一種馬來西亞沙律, 用油炸鬼, 豆卜, 青瓜, 菠蘿, 芽菜, 通菜, 沙葛加埋一個特別既醬汁而成, 個醬係由蝦醬, 羅望子汁, 青檸汁, 糖, 辣醬, 大量花生等等組合得黎, 味道非常複雜, 非常特別, 不是人人都鍾意呢種味道。

Rojar 好多food court 都有, 而呢間大巴窰囉o惹 Tao Payoh Rojar就相當出名, 來頭不少, 得獎無數!  可惜佢坐落於新加坡一個近東邊既住宅區 Old Airport Road, 唔近遊客區, 所以遊客比較難試到佢. 其實呢個Old Airport Road Foodcourt 有好多好野食, 只是黎呢到, 唔近地鐵, 實在有d唔方便。

雖然我唔係常常黎呢度, 但係黎得, 除非佢賣哂 (佢都快賣哂, 試過6點幾就無得賣) 否則我就一定食, 我試過買左一大碟當飯食。

Toa Payoh Rojak
#01-108 Old Airport Road Food Centre
12pm-8pm
Closed Sundays

亞坤咖央多士 Ya Kun Kaya Toast @ 新加坡

去新加坡, 梗係唔可以唔食咖央多士, 要數又好味又出名既當然係亞坤啦, 聽講佢地已經有80年歷史，佢既多士非常脆, 非常好味。另外, 佢既半熟雞蛋, 都好多人捧場, 佢既咖啡都好值得試.

要食佢一d都唔難, 因為佢既分店多得很，如果真係揾唔到或係無時間食, 去到機場都仲有最後機會, 係新加坡機場T2同T3都有.

呢個係佢地網址 : http://www.yakun.com/

旺旺脆皮咖哩卜 Wang Wang Crispy Curry Puff @ 新加坡

咖哩卜係新加坡都幾普遍, 試過好幾間 (包括有名氣的1A及老曾記), 我都係覺得旺旺脆皮咖哩卜係最鬆化, 最好味. 其他地方做既多數都有d 硬.

我最鍾意佢地既沙丁魚, 又多又惹味, 傳統既咖哩薯仔雞都好, 薯仔鬆化得剛剛好, 雞肉不會太多. 另外一款甜味的芋頭蓉都不可以錯過, 食佢時好似食緊酥皮芋泥一樣. 

我試過買旺旺脆皮咖哩卜返香港, 放入雪柜, 食時取出用焗爐焗透至出油, 就同新鮮一樣甘好味, 如果焗得唔透就完全唔係個回事.

旺旺既老闆同伙計姐姐都好好人, 如果買得多時, 可打電話預留. 佢地又係在Old Airport Road Food Court, 所以要幫襯都唔係太方便.

Wang Wang Crispy Curry Puff
Old Airport Road Food Centre
#01-126
11am to 11pm daily
Ah Wong 90907009

Food Republic - 福建炒蝦麵 @ 新加坡

福建炒蝦麵對於新加坡人來說，一點都不陌生，每個Food Court或Hawker Centre都有，但在香港，我就未見過，有些星馬餐廳的福建麵，是用黑豉油炒的，同新加坡的完全是另一件事。

新加坡的福建炒蝦麵是用大量蝦上湯去煮，蝦味濃郁，坦白講，麵是主角，蝦只是配角。

新加坡有很多出名的福建炒蝦麵，個人最喜愛的算是Food Republic 蝦麵，可能因為是大製作，一次炒很多碟，比起一次炒一碟的，放多很多蝦上湯，所以蝦味特別豐富，如果吃得辣，一定要加他們的辣椒醬，好吃到停不了口。

Food Republic

- Level 4, Wisma Atria, Orchard Road

- Level 1, Suntec City Mall, Raffles Boulevard

- Level 3, Vivo City, HarbourFront Walk

牛車水 - 春記叻沙 @ 新加坡

新加坡賣叻沙既舖頭多不勝數, 每個hawker centre / food court 都一定有，每間都有自己既特色, 出名如328加東叻沙當然有不少人捧場, 不過我就比較喜歡牛車水People’s Park Food Centre裏面間春記, 因為我鍾意比較少d椰汁味既叻沙, 相信佢既湯底用左雞骨, 蝦殼, 蝦米, 薯仔黎煲, 雖然少椰漿, 但係有薯仔, 所以湯底都唔會好稀, 而且仲會健康d.

佢既螄蚶非常新鮮鮮味，叻沙雖然無蝦但係有白切雞, d 雞浸左落鮮味既湯底到, 好味過食蝦. 正常一碗賣4蚊, 如果真係好鍾意食螄蚶, 建議可以考慮加1蚊螄蚶, 甘就暢快得多!

新鮮既螄蚶真係好特別, 好好味! 雖然size 同日本既赤貝有好大分別, 但係價錢就平過日本既赤貝好多, 不過就一樣甘好味!

春記

People's Park Food Centre

Upper Cross Street

China Town

新加坡 - Bakerzine @ 新加坡

Bakerzine 係新加坡有8間分店, 佢地煮既意粉都幾得, 尤其是欖油辣椒香蒜煙肉意粉, 我差唔多每次去都一定揀呢樣.

部份既分店都提供套餐 SGD13.8 / SGD16.8 + 17%。包括餐湯 + 餐包 + 主菜 (指定數款內選一款) + 凍飲，我最喜愛既意粉都係選擇內。

website : http://www.bakerzin.com/OutletPromotions.asp

無招牌海鮮 No Signboard - Geylang @ 新加坡

無招牌海鮮既招牌菜係白胡椒蟹 (white pepper crab)，胡椒味香到不得了, 連蟹鉗既肉都滲哂胡椒味, 簡直係人見人愛! 佢地既蟹係斯里蘭卡蟹, 肉質鮮甜結實, 而且真係好大隻, 我覺得最好吃係1.5kg 以上.

白胡椒蟹 SGD38/kg a

而辣椒蟹 (chili crab) 及甘香蝦婆 (curry crayfish)都好得 ，用炸曼頭跟辣椒蟹汁一齊食, 非常滋味，一定要試。食不到辣的，記得叫小辣。

辣椒蟹 SGD38/kg