月餅包裝

看見香港blog友的靚靚月餅盒, 實在很羨慕, 可以將自己做好的月餅, 配合漂亮的包裝, 滿足感大增.

但在新加坡要找到好一點的月餅包裝, 真的不容易, 可能真是香港人比較貪靚.
這款圓形月餅模, 我在烘焙店買的, 但竟然連烘焙店都沒有合適的包裝, 最後唯有用比較大的膠盒加膠袋, 一袋一個, 樣子普通.

反而這款超迷你的方形月餅就有合適的盒, 不過都不算漂亮, 感覺有點簡陋.

另外今次做開月餅, 用了曲奇餅模做了一個, 都唔算難做, 但我都係覺得傳統的老土個d造型靚仔d.

 

Quiznos Sub @ 新加坡

平時如果食大大份的三文治多數會去Subway, 因為他們的蔬菜又多又新鮮, 最近發現有另一個唔錯的選擇, 就是位於 Orchard Central 的 Quiznos Sub.  有一次經過, 聞到他們的三文治都幾香, 可能因為他們夾三文治的過程是會烘過麵包和部分餡料, 所以都要試一試.

第一次幫襯, 我一定要詳細看看他們的三文治款式, 因為貪心又要選最多材料, 又要小心唔好選自己唔食的食物.  今次揀了 the traditional, 有燒牛肉, 火雞, 火腿, 黑橄欖, 生菜, 番茄, 紅洋蔥, 車打芝士, 當然我要個份是走芝士啦! 再加一杯雞麵湯, 好豐富呀!

我老公就要了一個 honey mustard chicken with bacon, 賣相唔夠我個份靚.

似乎呢度蔬菜就無得好似 Subway 自己揀, 但就有好幾隻醬, 酸瓜同辣椒可以任加.

而且呢度有樣古怪, 係無咖啡賣的, 要咖啡就要到隔離Tully's Coffee 買.

不過根據我們的觀察, 呢兩間店舖應該是同一個老闆的, 要顧客分開買, 其實就唔係幾方便啦 !
同場加影一個四層樓高的figure 公仔, 站立係呢個商埸, 都幾得意!

Quiznos Sub
#03-33, Orchard Central
181 Orchard Road
Mon - Sun : 11am - 11pm
 
 
 

周庄 @ 新加坡

今天是新加坡的公眾假期, 很罕有的公眾假期, 全年只得十一天, 相比起香港十七天的公眾假期, 足足少了三分一. 又沒有颱風假, 幾大雨都無分黑雨或紅雨, 員工仍要返工, 難怪新加坡蟬聯什麼全球最佳營商地區.

既然難得有公眾假, 就出去嘆個放題點心下午茶, 每位星紙十六個八, 加一再加GST.

蝦餃和燒賣, 好味! 加多了一籠燒賣.

豉油王炒麵, 好香, 得!

琵琶鴨, 皮脆肉唔韌, 好味.

叉燒酥好味, 我平時唔食的, 今日食了兩個.

鳳爪, 都得.

蛋撻, 個樣都幾好, 但我無食.

皮蛋瘦肉粥, 杰左少少!

蝦醬雞, 西芹蝦仁, 蝦米蓉四季豆, 粟米羹, ok!

我們好勁呀, 四款甜品都叫齊. 雷沙湯丸, 好味!

另外三款, 芝麻糊, 楊枝甘露, 龜苓膏, 幾好.

其中都有些唔係幾好, 包括炸蝦, 好唔得, 皮又厚又唔脆, 好油!

沙律油條, 中計, 我以為是平時食的釀油條, 沙律醬另上, 其實原來只是我一廂情願, 因為它的名字是沒有誤導人的, 名附其實的油條加沙律醬.

周庄 Zhou's Kitchen
7-10 Amoy Street
#01-01 Far East Square
Tel : +65 6877 1123

Thai Cafe Aroy-Dee @ 新加坡

在香港要食好吃地道的泰國菜唔難, 九龍城要幾多有幾多, 無想過要在新加坡找一間類似的泰菜店, 原來是不易的. 試過好幾次在新加坡食冬陰功, 個湯是無色的, 即是透明似清湯個種, 雖然味道不是難飲, 但絕對不是應有的風味.

早一排, 去開烘焙店入貨時, 無心插柳下在Bencoolen Street 的 Sunshine Plaza 發現了一間唔錯的平民泰菜店.  我第一次在 Thai Cafe 食他們的午餐, 點了辣椒香葉炒雞肉飯 (Basil Leave Chicken), 連飲品都只是星紙4元9角, 比起美食廣場的泰式食品還要便宜, 而且是即叫即煮, 新鮮熱辣, 很地道泰式味道, 很好吃, 雖然很大碟, 但我都只是吃剩了辣椒碎.

之後心思思又去試他們的泰式炒金邊粉 (Phad Thai), 又得呀, 自己加些乾辣椒碎和砂糖就好似在曼谷食的一樣.

今晚去試午餐以外的食品, 好貪心, 叫了好多.

海鮮冬陰公, 好好味, 好足料, 好大碗, 雖然蝦不夠彈牙, 但是有好多草菇補數, 只識用好滿足來形容.

配白飯, 無得彈.

炒通菜, 因為冬陰公辣, 所以選了個唔辣的炒通菜, 都好味!

牛肉沙律, 典型的泰式沙律, 又酸又甜又辣, 牛肉和配菜都好多, 除了有少許牛肉比較韌之外, 都好開胃和好味.

雞肉湯河粉, 河粉幼滑, 看似清淡, 但都ok, 加些冬陰公湯就更醒胃. 

香茅水走冰, 自從在曼谷飲過之後, 已經好鍾意呢款飲品, 如果香茅味再濃一點就更好.

呢餐都只需要星紙二十五元咋, 簡直又好味又好抵!

我相信他們的廚師應該是泰國人, 所以呢到的味道好地道, 雖然無特別裝修, 但都不太重要!

月餅 - Take 3

昨天終於試食了第一底的月餅, 雖然奇貌不揚, 但味道又都得喎, 其實一焗完之後都好香月餅味, 好彩食入口都係月餅味.

又見到有blog 友 bon bon  無私分享做月餅的過程, 而且仲做得好靚!

再看過一些youtube做月餅的video, 我唔單止覺得自己技術唔夠之外, 突然仲覺得我的月餅模唔夠靚同唔夠好用, 決定今天再去牛車水搜索下月餅模.

行了好幾間鋪頭, 好辛苦至尋到寶找到一個不需敲打的迷你方型月餅模, 因為好多都只賣舊式的木模, 得一間有新式的賣, 但是花紋就唔算靚. 呢個只要將餅模向下按月餅就會跌出來, 應該可以慳番不少氣力.

連同第一次買的圓形模, 今日可以做兩款. 我學了 bon bon 將蛋汁加工, 就是用一隻雞蛋, 減去20g 蛋白, 加入10g 水, 掃這個蛋汁的好處是比較易上色, 效果又真是幾好喎! 

呢個模比起之前"超迷你的四方模"大一些, 用了18g 餅皮和60g 蓮蓉, 未知夠唔夠皮薄? 呢個模都有機關, 有個圈推個月餅出來, 個模手工麻麻, 但價錢唔平, 要星紙9.9!

今日新買的四方花花模, 個樣都ok.

尺寸一樣係超迷你, 11g 餅皮和 30g 蓮蓉. 呢個不用敲打, 慳回不少汗水! (星紙5元)

其實原先我很喜歡粉紅色的四方模 (星紙3.5), 因為我覺得有中式字體的模很靚, 而且我比較喜歡四方型, 但用它實在太費力了, 同埋它的紋好似唔夠深, 今日做完圓形後, 至發覺原來圓形都不錯!

 

 

 

再戰中秋月餅

昨天的月餅, 因為自己大意, 做得唔靚, 今日好想好想再整, 原先打算試了第一底的味道才做第二次, 不過第一底正在回油中, 未可以試, 心大心細, 整唔整呢?

最後決定做一半份量, 即是4 個迷你月餅!

今次記得用乾淨的掃來掃蛋汁, 而且唔掃太厚的蛋汁, 結果 .....

真是好了一些, 今次個餅面沒有裂了, 而"中" 字和 "月" 字比較清楚, "秋" 和"餅"就有點難看.

下面張相是未焗的, 看真d, 其實每個都有些瑕疵，因為脫模時撞到檯面造成, 下次要放塊毛巾墊底!

 

我覺得如果個月餅模的紋深一點可能會好些, 其實我還買了一個圓形花花模未試, 那個是大一點的, 要改改餅皮和餡料的份量, 下次一定會試新模!

中秋佳節 - 中秋月餅

人大了, 月餅對我來說, 已經沒有太大吸引力, 每年中秋都只會吃一兩件, 真想像不到, 小時候媽媽每年都有供月餅會, 到了中秋節前, 捧成十多盒月餅回家, 我們是什樣消滅他們的呢 ?

今年不會返香港過中秋了, 屋企人話要寄月餅給我們, 太體貼了, 很窩心, 不過不用麻煩了, 呢邊都有香港月餅賣, 口講話我會買, 但實情是我想自己做月餅, 好像天方夜譚.

早一排, 當我在網上世界未找到詳細的食譜和做法時, 都有打算找個烘焙班來學, 不過一直未報名是因為他們不是做傳統的蛋黃蓮蓉月, 最近似的是夏威夷果仁松子蓮蓉月, 但早兩天很好彩, 給我找到兩位網友(Mika 和 蕭亞蓮) 都有分享他們做月餅的心得, 我跟了 Mika 的食譜來做.

迷你月餅食譜 (8個份量)

餅皮材料：
麵粉 45g     金獅糖膠 30g     花生油 15g     鹼水 1g

餡料：
白蓮蓉 240g     鹹蛋黃  適量，隨個人喜好 (我用了一個)

做法：  

(1) 餅皮: 麵粉過篩, 混合糖膠, 花生油, 鹼水, 慢慢倒入麵粉, 輕揉成粉糰, 不可大力, 否則皮硬, 用保鮮紙包好, 入冰箱一小時, 分成8等份
(2) 將蓮蓉分割成8等份
(3) 鹹蛋黃面掃上酒, 200度焗2分鐘後取出待涼備用
(4) 將蓮蓉搓圓，在中間位置手指掐成一個凹陷位，放入鹹蛋黃包好
(5) 將餅皮放保鮮紙內, 壓成圓形, 包入餡料, 將皮推上至覆蓋餡料為止，在面薄薄掃上高根粉
(6) 餅模內掃上高根粉, 將包好的皮和餡放入餅模, 用陰力按平壓成月餅模樣，放在焗盆上



(7) 先噴水, 否則餅面易破裂，200度焗5分鐘
(8) 取出，掃蛋2次，放在中層，轉180度焗8-10分鐘至金黃色



(9)  待凉後，將月餅反轉放在牛油紙上回油1晚

要由餅模倒出月餅, 實在不易, 可能起初我掃得太少高根粉, 因為我怕太多高根粉會影響餅皮的質感, 後來加多了高根粉和暴力, 再戰鬥完一輪後, 都叫做整了八個餅仔出來.

原先餅面的字和花紋都算清楚, 掃蛋汁前都仲ok, 但焗完後個餅面糊了, 而且仲有少少裂, 很醜樣呀!

我懷疑問題可能是我掃蛋汁個掃唔乾淨, 因為之前個掃用來掃高根粉, 我唔記得洗乾淨它才用, 竟然臨門先跣腳!

而家焗好的月餅仲未食得, 因為要回油, 據說回油是廣式月餅的最大特色，它的皮剛烤好時是硬的，放置兩三天後會變得柔軟油潤，與餡料融合，產生皮餡一體、入口即融的口感。

雖然它們唔係好靚仔, 但我都好期待, 好想食它們呢!