再試 Pizza 薄餅

之前做既 Pizza 唔算做得好好, 因為用五分鐘歐式包做既麵糰比較濕, 有d 難控制, 加上同塊 Baking Stone 未交流得好好, 所以效果唔算好得.

曾經都試個另一個 Blog 友介紹做 Pizza 既食譜, 雖然個麵糰比較易控制, 但焗出黎個餅底既風味就真係唔及得上五分鐘歐式包既麵糰, 所以上兩天想做 Pizza, 我都係做番個五分鐘歐式包麵糰.

今次唔用 Baking Stone, 試下個新焗爐既焗盤, 因為個盤比較薄, 好易傳熱, 再係個焗盤上掃少少油, 希望都可以做到脆口既效果.

壓平左既薄餅底, 直接放係掃左油既焗盤上發酵, 因為技術有限, 真係無辦法做到個正圓餅底, 而且厚薄唔係好一致, 好醜樣!

今次用左超有益既三文魚做餡料, 加埋鮮磨菇, 洋蔥同青椒炒熟至焗, 效果唔錯.

加埋火腿, 蕃茄醬, 芝士同一定唔少得既菠蘿, 出爐喇!

趁熱食, 個餅底都幾脆, 不過放涼左就好快淋.

雖然掃左好少油係焗盤上, 其實個餅底都唔係好吸油, 睇下個焗盤, 仲有油留左係個盤到.

都幾滿意, 因為媽咪都話好味.

尋日, 見仲有材料係到, 就再焗多左個無芝士既.

雖然不及Pizza Hut 既鬆脆, 但做到一個健康既版本, 都唔錯.

原味紅豆卷蛋

好耐無做卷蛋, 見到有 blog 友做得好靚, 好手痕, 想做栗子餡, 但又未做栗子蓉, 簡簡單單去吉之島$10蚊店買紅豆蓉, 去到一睇, 嚇親, 唔係十蚊, 係二十一蚊, 我係新加坡既兩蚊店買一樣既紅豆蓉都只係兩蚊星紙, 即十一蚊港紙, 但係香港要賣21蚊, 同一牌子同一樣份量, 差不多貴一倍 !!  下次去新加坡時, 要去入番d 貨先!

雖然綠茶味既蛋糕同紅豆好匹配, 但我怕媽咪唔啱口味, 所以就用番原味.

今次卷得都幾順利, 只係有一條小裂痕.

切開都唔係太醜樣.

可以入盒去送貨.

今次個蛋糕回縮得好快同好厲害, 唔知有咩辦法可以令到個蛋糕唔好回縮得咁厲害呢?

大焗爐

我係新加坡用慣左大焗爐, 但香港屋企既廚房實在太細, 擺唔落一個大焗爐, 又唔想重新裝修個廚房, 唯有向外發展, 向飯廳打主意.

原來巿面賣既大爐, 大部份都係嵌入式, 極少數係座枱式, 而且好d 既嵌入式爐既火力都比較大, 普通電插頭係負荷唔到, 好彩我家姐記得早排 blog 友 Vanlily 經仙姐介紹, 買左一個非常好既大爐.

呢個係意大利 Gierre牌子,  23吋x21.5吋x23吋, 對流衡風, Vanlily 對佢讚不絕口, 連仙姐都係用佢, 我即刻對呢個爐好有信心, 唯一唔好既係價錢唔平之餘無送貨, 保用期只得三個月, 有咩壞要整就要自己攞番去舖頭, 無太多選擇下, 又唔駛搵電工師傅做個插頭, 終於都係決定買佢喇,

希望我帶返屋企個部, 生生性性, 唔好扭計呀 !

[意大利Gierre, $6500 自取, 耀記, 電話︰23852385, 地址︰上海街289號]

要安置佢, 同埋又要搓到麵包, 一個穩固既廚櫃真係唔少得, 但要度身訂做一個廚櫃實在太貴, 超出我既預算, 精打細算既我就改變策略, 主力去搵廚櫃公司既陳列品, 要搵啱自己鍾意既款式, 啱既尺寸, 櫃面無洗手盤位, 又無爐頭位, 又要咁啱廚櫃公司唔想要既廚櫃, 實在有d 難度 ...

不過好好彩, 行左十多間廚櫃公司後, 真係俾我係旺角搵到, 雖然價錢都唔係好平, 但比起度身做一個都平到一半, 而且又肯送貨同安裝, 再送多兩塊層板, 佢地仲好人到肯幫我去攞埋個大焗爐, 送埋上我屋企, 真係太好喇.

呢個櫃幾好, 係我鍾意既白色, 簡簡單單, 擺係個廳都唔會格格不入.

而且用料都唔錯.

就係咁, 我既第二個廚房就誕生了.

超頂角白吐司

估唔到, 我既第一個超頂角白吐司係回歸香港後做既第二個白吐司, 沒有期望, 竟然有意外驚喜, 可惜我調較焗爐溫度去220度時, 唔夠準確, 只係得 210度多d, 結果顏色唔夠靚仔.

麵包既質地同味道都唔錯, 好滿意!

下面呢個係返左香港後第一個白吐司, 顏色靚d, 但無咁頂角.

係香港想買無衣既花生做花生醬, 原來唔係咁容易, 因為大部分舖頭賣既花生都係有衣, 因為有衣既係香d, 但如果要逐粒去衣, 就太唔化算, 好彩上個星期俾我係灣仔一間雜貨舖搵到, 順利做到無添加既花生醬配白吐司.

大蕃薯 Mr Yammy @ 香港

之前睇過有blog 友介紹呢間位於粉嶺既餐廳, 俾佢地既芥蜜脆皮原隻咸豬手深深吸引住, 雖然粉嶺對我地黎講真係遠左d, 但我家姐同姐夫就率先黎試菜, 果然脆皮豬手真係好得, 上湯牛脷都係唔錯, 上兩個星期日我終於有時間攀山過海黎試一試.

我地一行九人, 主要黎食脆皮豬手, 所以叫左四隻, 上湯牛脷就叫左兩份, 好味, 少不免都要試下其他既食物, 不過就普普通通喇, 最好都仲係脆皮豬手.

佢地既食物價錢唔貴, 尤其係脆皮豬手, 只係$98一份, 豬皮真係好鬆脆, 豬手肉都唔鞋, 有筋既位置就仲好味, 味道適中, 兩個人一隻, 啱啱好, 太少就唔夠喉, 配菜既薯仔就稍為硬身左d, 如果淋少少就好d.

食住脆豬皮飲埋個甜檸雪碧, 好爽.

佢地每份餐都連餐湯同麵包.

清湯牛脷, 都好味, 伴碟既椰菜同橄欖都好味.

呢個紅酒燴牛尾配什菌菜飯都ok, 牛尾肉質都幾好.

不過牛仔骨同肉眼扒就麻麻地.

記住, 呢度既推介係芥蜜脆皮原隻咸豬手同上湯牛脷呀.

大蕃薯 Mr Yammy
粉嶺聯和墟聯昌街7號  (群記豬手旁邊)
tel: 2675 7708

dap @ 香港

早前老公生日，佢要返工，所以只有食晚飯慶祝，想搵間合心水既餐廳，係網上搜索完一輪都無咩頭緒，最後接受朋友既提議，試左係佐敦有分店既 dap.

係 Openrice 有好多笑面之餘仲有$100既晚餐折扣優惠,不過最後我地揀左一個二人晚餐，用HSBC既信用咭仲抵．

先黎一籃麵包，法包外脆內軟，好好味．

頭盤可選凱撒沙律或煙三文魚露筍，我地一人選一樣，唔錯．

第二道頭盤，香煎法國鵝肝配鮮蘋果醬，一人一碟，份量唔少，鵝肝都煎得幾好，同個蘋果醬配合得好好．

老公揀鮮甜帶子湯，我就揀左意式什菜湯，都ｏｋ．

之後有個香檸雪芭清清個口，不過呢個好酸，唔係好啱我．

主菜我地都係選扒安格斯肉眼扒配黑醋汁，望落去好吸引．

睇真ｄ，原來佢地將塊肉眼摺起左，放番開，好大塊，食落好有肉味，有肥有瘦，好淋唔硬，配菜都得．

我地散叫左個炒雜菇，好味．

好豐富呀，每人仲有一個迷你甜品拼盤，雖然唔係好啱我，但睇落都好靚．

唔少得既咖啡或茶，好完美既一餐晚飯．

唔計個碟炒雜菇，埋單只係$599 加一，佢話原加係$899, 啱食既就真係幾抵．

因為當天我地仲係酒店住緊，所以我麻煩酒店幫我安排左個生日蛋糕，唔駛錢就俾左個驚喜老公，多謝哂！