曼谷自由行 Day 6 - Greyhound Cafe [有驚喜]

2010 年 2 月 24 日
尋日食完豐富既自助餐後, 返左酒店玩左一陣後, 小侄仔一家三口就要去機場飛返香港, 結束佢地既布吉曼谷七天避寒の旅, 我地就嘆埋今日至走.
佢地走左後, 我地行街三人組就去左 Siam 逛街, 然後打算去買 Sala Daeng 豬雜湯同建興既蟹肉炒麵做晚餐, 點知豬雜湯無開, 唯有剩係買建興既蟹肉炒麵, 粉絲蝦煲同炒通菜返酒店食過簡單既晚餐.
今日我地夜晚七點至飛返香港, 所以仲有大把時間, 我地食完早餐, 係酒店影下相至慢慢 Check-out, 放底行李, 就去左 Emporium 逛下同食午餐, 之後做多兩個鍾頭按摩至返酒店.
我地揀左 Greyhound Cafe 食午餐, 其實我地 07年既時候已經試過佢, 不過當時係跟亞蘇既介紹, 黎食佢地既單骨雞翼同凍檸茶, 覺得幾好但唔係好特別, 今日媽咪想食咖哩, 我同家姐就想食意粉, 見呢度既意粉好似都幾得, 就俾多次機會大家.

我地黎到既時侯差唔多一點, 要等位.

姐夫要左欖油香蒜辣椒煙肉意粉, 簡簡單單, 做到 Al dente 效果, 味道啱啱好.

我同家姐都要左個香辣泰式海鮮意粉, 好精彩, 我不嬲對fusion 菜都無咩好感, 但係呢個好成功, 金不換同新鮮胡椒粒好香, 泰式既香辣味同彈牙既意粉好夾.

蝦好新鮮, 草菇好入味, 發水魷魚又出奇既有趣, 如果再黎, 我都會揀佢.

老公既冬陰功湯河, 味道唔錯, 兩隻大蝦好多蝦膏, 好新鮮.

媽咪既咖哩雞飯, 原先係配炸脆麵, 改左要白飯, 咖哩香而唔係好辣, 其實佢跟左辣椒油一齊上, 鍾意辣既話, 可以自己加.

單骨雞翼, 味道適中, 脆口有肉汁, 今次無係曼谷街邊食炸雞翼, 係呢度食番補數.

極奇邪惡的炸南瓜, 以炸功黎講, 唔算好好, 因為好油, 但就好好味, 返到香港真係要檢點d 喇.

招牌凍檸茶, 雖然係開粉既檸檬茶, 但體貼在, 佢地既冰都係用檸檬茶黎整, 溶左都唔會沖淡左d 檸檬茶.

熱咖啡同凍咖啡.

唔貴喎, 埋單都唔駛泰幣千五蚊.

走既時候, 見到有人食海南雞飯, 個樣都好認真, 雞好似都幾滑, 好似都好值得試.

 
Greyhound Cafe (Emporium 分店)
2/F Emporium
Tel: 66 2664 8663
BTS 站 : Phrom Phong