渝酸辣粉 Yu @ 香港

過年時返香港, 其實都食左好多美食, 不過節目太豐富, 有好多相片都未整理, 睇番張記憶咭至記得係年三十個日我地都食左個豐富又滿意既四川午餐.
呢間渝酸辣粉, 係Openrice 既評價都幾高, 睇佢個名似乎主打係酸辣粉, 但酸辣粉對我地黎講, 太酸了, 不過佢都有擔擔麵, 我家姐之前黎食過, 極力推介佢地既招牌套餐 -- 酸辣粉 + 冷盤 (涼拌木耳/ 夫妻肺片/ 涼拌青瓜) + 口水雞 + 飲品 + 甜品 [$68], 佢上次唔要酸辣粉, 加十蚊轉做擔擔麵, 咁又幾好喎.
口水雞, 好香, 幾滑, 有辣味, 但唔算好麻.

擔擔麵, 乾撈, 好香好味.

涼拌青瓜, 好爽口, 好味.

夫妻肺片, 呢個夠麻, 好正, 將呢個汁撈埋d 麵食, 仲好味.

涼拌木耳, 我覺得係雲耳, 因為木耳應係硬身d既, 但呢個係淋d同好滑.

甜品 - 桂花涼粉, 好香桂花味, 透明既涼粉, 滑溜溜, 我鍾意呀.

連埋飲品一杯, 呢個餐既配搭好好, 我地叫左兩個一模一樣既餐之外, 仲叫左其他野食.
滷水牛筋, 唔係最淋個種, 但都ok, 切得細細條, 好襟食, 好補骨膠原添.

牛肉麵, 牛肉都幾好, 唔硬唔鞋, 帶有筋位.

排骨麵, 一般喇, 排骨唔係新鮮排骨.

淨雲吞, 雲吞皮好滑, 都ok.

濃湯燴麵, 呢個叫左要淋d 既麵, 佢地話得但係做唔到.

佢地既服務都好好, 仲可以訂位.

渝酸辣粉 Yu

地址 :

銅鑼灣耀華街4號

電話 : 2838 8198