On the way home ~

忙完所有野, 終於起程回家喇 !

兩件大寄倉行李, 23kg + 30kg, 好過份, 好驚 airline 會收錢, 好彩唔駛.

起飛啦, 香港見!

搬屋

我地又搬屋喇, 今次仲係大規模個種, 因為我地要搬番香港喇.

老公係新加坡既 assignment 係四月尾就會完, 我地好快就會結束係新加坡兩年八個半月既生活, 重新做番個住係香港既香港人喇.

因為我地無傢俬同大電器要搬, 所以一直以為唔係好多野要寄船, 原來執下執下, 都執左25箱大大小小既野出黎, 好恐怖, 運到香港之後, 唔知點收埋係細小既屋企呢!

Jade (Fullerton Hotel) @ 新加坡

又係睇人地既 blog, 知道新加坡既 Fullerton 酒店裡面既中菜廳 Jade, 做緊週末點心任點任食, 早段時間 (11:30am - 1:15pm) 大人每位只係要SGD28 ++ , 之後既時段 (1:45pm - 3:30pm) 就要 SGD33 ++, 有五十款美食任點, 好似好吸引, 加上六星級既酒店環境, 貪慕虛榮既我, 就梗係心思思喇.

而且我一直都好鍾意 Fullerton, 因為佢既古典建築真係好靚, 唔講唔知, 原來佢已經有八十年既歷史.  我地之前試過佢既 Town Restaurant 西式自助晚餐, 都ok.

今日試下佢地既中式點心, Jade 地方唔算好大, 但樓底好高, 好快已經差不多坐滿.

有幾款特色點心一定要試.

鮑魚蒸燒賣, 鮑魚仔都有鮑魚味, 燒賣無蝦, 但又幾好味喎.

鵝肝小籠飽, 好有鵝味, 但唔係好濃鵝肝味, 不過都ok.

野菇松露芋角, 炸得好靚, 芋蓉好香.  其實我之前係未食過松露, 因為好多時松露都係西餐出現, 又多數配芝士同忌廉汁, 所以同我無咩瓜葛, 我覺得呢個芋角有一種好特別既菇味, 我諗佢應該就係松露味啦.

蝦餃 - 普通喇.

帶子菜苗餃 - 好味.

韭菜滑肉鍋貼 - 好特別, 有塊脆皮黐住, 個醬汁好味, 不愧為廚師推介.

义燒酥 - 都幾好.

蛋撻 - 幾好.

脆皮明蝦餃 - 稍為燶左d, 味道幾好.

我地食左九個點心, 勁呀.

五款湯羹中, 每人可以揀一款, 老公揀左紅燒松露蟹肉蛋白翅, 好多蟹肉, 好味.

我就揀左蟹肉菠菜雞湯, 蛋白好滑, 稍為咸左d.

我地試左4款小菜, 有咖啡肉排, 得呀.

甜酸雞球 - 味道好啱, 雞球面頭都脆脆地, 但又唔會太乾.

紅糟燜豬手, 好得, 肥肉夠甘香肥美, 瘦肉唔算鞋, 配菜既冬菇, 雲耳同蔥段都好食.

金華火腿釀雞翼, 味道ok, 但唔爽口, 如果釀番d 爽口既野, 好似西芹呀, 就好d.

再試左4 款前菜, 有五香海鹽燒腩, 都幾好.

青芥末蝦球 - ok.

蜜餞鱸魚片, 魚片太薄, 炸得好脆, 唔似食緊魚肉.

麻辣牛腩, 呢個麻麻地, 食唔出麻辣味, 牛腩太瘦.

我地仲試左個雞絲炒生麵, 都幾好.

甜品選擇少左d, 得兩款, 凍既係士多啤梨布丁, ok.

熱既係腐竹薏米白果糖水, 杰左d, 少番d 薏米就好喇.

我地好大食, 竟然食左 22樣野, 生左大食積.