玩完"古埃及", 隔離就係 The Lost World 失落的世界, 之前好勁陽光, 但突然個天多左一層好厚既雨雲.
原先都有d 興趣玩呢個 "天幕飛行", 不過好快就開始落微微雨.
為左唔好浪費時間, 唯有趁落雨就食下飯先, 當然好多人都好似我地咁諗, 好彩我地一見開始落微雨就入左最近既餐廳, 呢間係Food Court 形式, 要自己搵位自己買野食, 我地好彩等左五分鐘就有位, 用左30分鐘買到野食, 其實佢地既排隊指示好唔清楚, 員工又好似未熱身, 不過我地無俾佢地老點, 所以已經比起好多人快有飯食.
場雨愈落愈大, 好似倒水咁, 餐廳就愈黎愈多人, 有d 人買左飯無位食, 夾硬擺左碟飯係收銀姐姐既工作檯到食. 我地食完都未停雨, 唯有攞把遮出黎頂住先, 出去搵d 室內野玩下順便避下雨. 係新加坡, 有把遮傍身就穩陣d.
係 "Far Far Away 遙遠皇國"既主題區, 有一座史瑞克城堡.
裡面有個 4D 影院, 效果都ok 喎, 小朋友都啱睇, 只係坐個張椅都幾 "chok" 同幾 "done", 有腰骨痛既人要小心d.
最後一個主題區就係"馬達加斯加".
"木箱漂流記"既機動遊戲未開得, 所以只可以玩下面呢個 "旋轉舞會"
馬達加斯加既動物造型好攪笑, 好可愛, 佢地應該係大街有迷你表演, 唔知係咪落雨既關係所以取消左呢 ?
The Lost World 有一個高難度表演 "未來水世界"，每日有三場, 兩點個場受到落雨影響, 最後我地睇左四點個場.
都幾精彩, 不過對於小朋友黎講就好似暴力左d.
黎得主題公園, 當然唔少得買下紀念品同手信, 尤其係我地兩位朋友最鍾意買紀念品, 但係呢度都幾失敗, 竟然唔夠靚, 刺激唔到佢地既購買慾, 要好勉強至揀到少少野,
入黎環球影城之前, 已經有心理準備, 預左佢好細, 所以大細對我黎講, 唔係問題, 最大問題係環球影城已經唔多吸引既 icon, 呢度仲好孤寒, 只係放左差利, 瑪麗蓮夢露, Betty同啄木鳥 Woody 出黎陪遊客影相, 慳皮左d囉, 又無大型巡遊！
我個人認為:
如果特登為左環球影城飛黎新加坡, 就唔係好值.
如果黎去呢頭, 入下黎都無妨.
如果小朋友細過五六歲, 都係去迪士尼會啱一 d.
如果真係好鍾意玩刺激既機動遊戲, 就記得check清楚 Battlestar Galactica 開番至好黎.
之後我地順便都有去埋名勝世界既賭場, 因為我地唔駛好似本地人要俾入場費 (SGD100), 我地預左入場要檢查 passport, 原來出黎都要檢查passport多一次,我地問個保安點解離開都要檢查，佢話怕有本地人混水摸魚入左去，嘩，駛唔駛咁穩陣？
仲有一樣好攪笑好老土既係，賭場有人唱歌表演，當時係唱緊ｄ好舊既中文歌，其中有人唱"半斤八兩", 唔知係咪用呢d歌會刺激到d人投注多d既呢？
No comments:
Post a Comment