新加坡環球影城 Universal Studio Singapore 終於見得人喇! 隨著聖淘沙名勝世界既酒店同賭場正式開業後, 佢地終於係2010年3月18日正式開幕, 開始試業既階段.
我地有兩位好朋友由香港過黎陪我地過復活節, 雖然佢地最近去完大阪環球影城, 但都有興趣到新加坡環球影城一遊, 我地當然奉陪, 早一個星期上網訂飛, 但訂唔到4月2 日既飛, 所以訂左今日 (SGD72), 因為而家係試業 Soft opening, 每日容納既人數係一個秘密, 所以未去到唔會知道多唔多人, 而且每樣設施都會有嚴格測試, 一有唔妥, 就會停開, 早十天前, 新加坡環球影城重頭戲既世界最高雙軌過山車- "科幻城市"內的太空堡壘, 咪就係通過唔到測試, 咁就無得玩喇, 係呢段試業期間, 每張飛都有回贈飲食同購物現金卷 (SGD10 + SGD5) 作為少少既補償.
九點鐘開門, 我地十點鐘到, 都唔算好多人.
一入埸, 就有工作人員提我地去換飲食同購物既回贈現金卷, 記得換呀, 唔好蝕俾佢!
最近入口既第一個主題區就係 Hollywood 好萊塢, 主要係商店, 食店同埋星光大道, 都好靚但條路好窄, 所以好似積聚左好多人咁.
理論上係星光大道, 係可以同環球製片場旗下著名人物見面同影相, 但成日裡面, 我地剩係見過唔瘦既差利, 好肥既瑪麗蓮夢露, 唔靚既 Betty, 最得意既已經叫做係啄木鳥 Woody, 唔 ~ 著名人物得咁少既 ...
係好萊塢劇院, 我地睇左一場由怪獸角色變成現代搖滾巨星既表現, 中間夾雜少許煙火效果, 我覺得都ok 既, 好熱鬧, 演員好落力, 但如果同迪士尼樂園既金裝米尼既歌劇比較, 就差好遠, 金裝米尼既舞檯多變化, 人物同內容都豐富好多, 好啱大人同小朋友, 呢個好萊塢既歌劇, 我怕六歲以下既細路就未必識欣賞.
下一個主題區係 New York, 呢個主題區得兩個遊樂設施.
我地試左"斯匹堡大導演主持的電影特效片場" Lights, Carmera, Action! 呢個主要想遊客體驗電影特技效果做成五級颶風橫掃 New York既感覺 .... 唉, 太兒戲喇!
下一站係科幻城市.
重頭戲就係呢個 Battlestar Galactica 過山車.
聽講最刺激係紅藍兩車擦身而過既一刻, 不過可惜佢地唔係好生性, 出左小故障已經十日喇, 暫時無得玩, 不過安全最緊要, 其實對我都無咩損失, 就算有得玩我都無膽玩!
另一個機動遊戲係 Accelerator, 其實只係變左樣既咖啡杯, 小朋友都玩得.
好快又到下一站 "古埃及"
呢個 "Revenge of The Mummy" 木乃伊復仇記係室內過山車, 黎得而又鍾意刺激既人唔好錯過.
另一個適合小朋友玩既機動遊戲 "Treasure Hunters" 尋寶奇兵, 小朋友可以扮揸車.
下回再續 ...
No comments:
Post a Comment