韓雅林韓國料理 @ 香港

韓雅林的石頭飯出名好味, 海鮮滑豆腐湯又辣又鮮味, 最啱我呢d 無飯不歡的飯桶!  午餐比較抵食, 選擇又多!


傳統石頭飯 - 係呢度食石頭飯, 唔少過十次八次, 唔單止每次食都覺得好味, 係每啖都覺得好味!

海鮮滑豆腐湯 - 辣味適中, 不會蓋過海鮮的鮮味, 豆腐滑不溜口, 跟飯食一流!

鰻魚石頭飯, 睇落都唔錯, 不過我都係鍾意傳統個款多d !

前菜八小碟, 都好味.... 掛住食唔記得影好味的薯仔!

午餐送的紅棗茶, 好濃郁, 唔係行貨, 飲完都有d 補身的感覺!

韓雅林韓國料理
銅鑼灣軒尼詩道489號銅鑼灣廣場一期6樓
Tel: 2877 7797

生記 @ 香港

原來我真是一個很懶很懶的人, 返左香港, 又不用煮飯, 又不用執屋, 只係同屋企人出去飲飲食食, 見下朋友吹下水食下飯, 疏疏乎乎就過了兩個星期, 但只寫左一篇blog咋!  太懶了, 自己都忍唔住要譴責下自己!

返得香港梗要食返d自己鍾意食既野, 老字號的上環生記魚鮫粥同及第粥係我既至愛之一!

一碗粥有五件鯇魚鮫, 魚肉新鮮到無渣, 鮮甜滑溜, 粥又綿又好味, 繁忙時間$28, 非繁忙時間$25咋!

及第粥真材實料, 有三片豬潤 ,三片豬心, 三件粉腸, 三粒肉丸, 三件豬肚, 全部都好新鮮, 好滿足呀, 啱哂貪心的我!

呢碗係魚鮫及第粥, 豐富都不得了!

過兩日都試了灣仔李景粥品專家, 老闆李景係前生記師傅, 但李景所用的材料明顯比生記低一級, 價錢就高一級. 

另外, 生記的清湯牛腩, 牛筋同牛丸都好得, 配伊麵好夾!

呢度既牛腩比起出名的九記牛腩淡少少,但水準穩定好多, 食得肥的話可要求肥一點, 好味!

生記清湯牛腩麵家
上環禧利街20-22號地下

電話: 2541 8199

鯉魚門海鮮 @ 香港

今日安排了搭最早班機返香港, 我一直都以為是早上8時50分起飛, 打算7時05分由屋企出發, 約7時35分到機場辦手續, 好鬆動啦, 怎知道, 6時55分在家作最後收拾的時候, 突然至發覺原來我們坐的飛機是8時30分起飛!

死喇! 我仲未換衫的, 老公即刻打電話叫的士, 我就換衫化妝, 終於我們在7時10分上了的士, 有些擔心唔知道20分鐘去唔去得到機場呢 ?  如果遲過7時半至去到, 航空公司會唔會唔同我們辦check-in 架? 

我已經約好哂今日的節目, 我唔想改呀, 點解我會咁論盡呢?  搭飛機的安排, 係我部門負責, 問責制下, 我要唔要辭職呢?

好在, 最終我們趕得切在7點半去到櫃位, 順利上到飛機, 只是受到颱風後的雨帶影響, 遲了十分鐘到香港, 已經覺得好好彩了!  下次我要小心d 啦!

返到香港, 行程緊湊, 放底行李後, 就去了食譚仔米線, 然後去了九龍城買明天家庭聚會的美食, 跟住就去了朋友的生日聚會, 麻雀耍樂一番, 傾計吹水完後, 重頭戲就是到鯉魚門食海鮮!

掛住食, 唔記得影海鮮湯, 蒜蓉蒸桂花蚌, 差點兒每人一隻的蒸鮑魚都唔記得影.

 

鯉魚門

海皇園林酒家

鯉魚門海傍道中39號