曼聯亞洲之行

朋友們問, 你很忙嗎? 很久沒有寫blog, 是的, 原先打算從香港回來, 安安份份在新加坡留十多天就出發到沙巴渡假, 但早兩天, 突然記起曼聯的亞洲之行, 不知那天比賽呢 ?

不看由至可, 一看不得了, 原來呢個星期六在吉隆坡作賽, 心想應該無飛賣喇啩!  怎知賣飛的網站顯示仲有最平的MYR58的飛未賣完喎!

其實當初一早知曼聯會到亞洲時, 知道沒有香港同新加坡份時, 就諗住唔會特登飛去第二到睇波, 因為通常熱身賽都唔會有好多球星隨隊, 之前都試過有一年曼聯來香港比賽時, 呢個又唔黎, 個個又傷了走左, 有點被搵笨的感覺. 

但今次吉隆坡係第一站, 可能傑斯同朗尼會黎, 而且在星期六比賽, 老公唔需要放假, 如果搭旅遊巴, 勉強可以即日來回, 唔駛租酒店過夜!

老公贊成之餘仲搵到朋友幫手, 找到貴少少, 位置又好d既飛, 仲安排車直接去到球場, 雖然我地已經知道自己點樣去球場, 不過始終有直接車會比較安心!

昨晚波飛攞到手時, 真的很興奮, 因為同時都知道很多正選的球員都有去吉隆坡, 包括
傑斯和朗尼!

只是今天看到印尼雅加達酒店炸彈襲擊的新聞, 實在令人憂心, 傷心同擔心, 希望快些破案, 捉到兇徒, 傷者快些康復! 

曼聯取消印尼之行, 雖然可以理解, 但相信印尼的曼聯球迷一定很失望!

韓雅林韓國料理 @ 香港

韓雅林的石頭飯出名好味, 海鮮滑豆腐湯又辣又鮮味, 最啱我呢d 無飯不歡的飯桶!  午餐比較抵食, 選擇又多!


傳統石頭飯 - 係呢度食石頭飯, 唔少過十次八次, 唔單止每次食都覺得好味, 係每啖都覺得好味!

海鮮滑豆腐湯 - 辣味適中, 不會蓋過海鮮的鮮味, 豆腐滑不溜口, 跟飯食一流!

鰻魚石頭飯, 睇落都唔錯, 不過我都係鍾意傳統個款多d !

前菜八小碟, 都好味.... 掛住食唔記得影好味的薯仔!

午餐送的紅棗茶, 好濃郁, 唔係行貨, 飲完都有d 補身的感覺!

韓雅林韓國料理
銅鑼灣軒尼詩道489號銅鑼灣廣場一期6樓
Tel: 2877 7797

生記 @ 香港

原來我真是一個很懶很懶的人, 返左香港, 又不用煮飯, 又不用執屋, 只係同屋企人出去飲飲食食, 見下朋友吹下水食下飯, 疏疏乎乎就過了兩個星期, 但只寫左一篇blog咋!  太懶了, 自己都忍唔住要譴責下自己!

返得香港梗要食返d自己鍾意食既野, 老字號的上環生記魚鮫粥同及第粥係我既至愛之一!

一碗粥有五件鯇魚鮫, 魚肉新鮮到無渣, 鮮甜滑溜, 粥又綿又好味, 繁忙時間$28, 非繁忙時間$25咋!

及第粥真材實料, 有三片豬潤 ,三片豬心, 三件粉腸, 三粒肉丸, 三件豬肚, 全部都好新鮮, 好滿足呀, 啱哂貪心的我!

呢碗係魚鮫及第粥, 豐富都不得了!

過兩日都試了灣仔李景粥品專家, 老闆李景係前生記師傅, 但李景所用的材料明顯比生記低一級, 價錢就高一級. 

另外, 生記的清湯牛腩, 牛筋同牛丸都好得, 配伊麵好夾!

呢度既牛腩比起出名的九記牛腩淡少少,但水準穩定好多, 食得肥的話可要求肥一點, 好味!

生記清湯牛腩麵家
上環禧利街20-22號地下

電話: 2541 8199