沙巴之旅 2009 - Day 3 (味雅雞飯)

昨天太夜, 吃不到的海南雞飯, 今天午餐再去過!

味雅雞飯 Wiya Nasi Ayam, 應該都幾出名, 因為在酒店等的士時, 我們告訴酒店員工"Chicken Rice", 他們就識得問我們是不是 "Wiya"?

其實呢間的海南雞飯,我們第一次來沙巴已經食過, 而且仲俾我們欽點為回程的飛機餐, 話說, 當年我們坐馬航的飛機餐非常難食, 返香港前, 我們到機場check-in 及放底行李後, 特登搭返的士出"味雅" 買左四個海南雞脾飯上飛機食, 飛機一起飛, 我們已經等唔切, 唔駛空姐招呼我們, 自己招呼自己, 大飽口褔!  最可憐的就是坐我們側邊的婆婆, 因為雞飯太香了, 她忍不住要問空姐攞花生食.

五個雞脾飯呀, 唔該!

呢度d 雞比新加坡的較有雞味, 飯都算好味, 不過比不上"天天海南雞飯", 辣椒醬都係!

雲吞細細粒, 都ok!

我們坐了樓上雅座, 有冷氣舒服些, 好似比樓下貴少少, 都公平既, 今餐只吃了大約MYR75, 唔貴啦!

沙巴之旅 2009 - Day 3 (動物園)

今日的節目安排是上午到動物園 Lok Kawi Wildlife Park.  因為呢個動物園都算遠, 而且唔易找的士, 所以在酒店出發時, 酒店員工已經幫我們和的士司機講好來回價錢 (MYR130), 去到動物園唔需要俾錢先, 司機會在停車場等我們, 返到酒店才付錢.

 
呢度的入場費唔貴, 大人MYR20, 小朋友MYR10, 但係動物的種類就比較少同普通, 相比起, 新加坡動物園的可觀性就高好幾倍!

不過他們的了哥就相當醒目, 講野講得都好叻!

Lok Kawi Wildlife Park
Donggongon - Papar Old Road
Tel : 088 765793
9:30am - 5:30pm (Last entry 4:30pm)

沙巴之旅 2009 - Day 2 (佑記肉骨茶)

今日晚餐轉轉口味, 肉骨茶, 雖然沙巴海鮮出名, 但總不能日日都海鮮. 呢餐是我們在沙巴唯一一餐有豬肉食, 因為沙巴很多餐廳都不賣豬肉, 包括我們的酒店!

佑記肉骨茶, 應該很受歡迎吧, 看他們的鋪頭人山人海, 食客要坐到出街就知道呢!

有點懷舊味道!

每樣食物都是細細碟, 就算人少少, 都可試多幾種, 肉骨茶是有藥味, 但不算太濃, 我覺得咸了少少, 至於排骨, 肉有點硬, 不夠在新加坡的中峇魯 , 發起人那些排骨咁淋, 不過這麼難得至有豬肉食, 都唔理得咁多!

我覺得最好味係豬腸, 很多條串埋一條, 很有趣, 洗得很乾淨, 如果不是怕高膽固醇, 我自己吃一碗也不嫌多!

豆卜都好吃.

豬肝唔夠爽, ok 啦!

生菜好健康又好吃, 要多一碟呀, 唔該!

油炸鬼唔少得!

其實原先打算吃完肉骨茶再去味雅買雞脾飯做宵夜, 但點知去到竟然休息了, 結果就在  La Manila 買了炒粿條!  河粉都算薄, 辣辣地, 有些獅蛤, 好味!