Day05-傑斯，我黎啦！

去睇曼聯比賽，係今次去歐洲旅行的主要目的，作為曼聯忠實球迷，當然最想去曼聯奧脫福球場睇主場，但係實在配合不到時間，如果十一月至去，又怕天氣凍同埋落雨，最後唯有睇作客 “布力般對曼聯”，估唔到作客飛仲難買過主場飛，因為布力般只留了7千張飛給曼聯球迷，我地已經好好彩，搵了一個係曼城住的朋友幫我地買，最終要係出發前一天至確定買到飛。 真係好感激佢地, 如果真係買唔到，我諗可能成個旅程我都無哂方向感。

原來睇作客都唔錯，由曼城坐火車去布力般，沿途的曼聯球迷已經不停唱歌打氣，可能只得7千個曼聯球迷可以係布力般既Darwin看台幫曼聯打氣，他們的使命感非常強，90分鐘的比賽，一直係企到唱歌打氣睇波，當然我地都入鄉隨俗喇!

超興奮，見到傑斯有份落場，而且仲係隊長添，朗尼又有入波，最緊要就係曼聯嬴波! 現場感受到的氣氛，真係同平時係屋企睇波好唔同!

睇完波，由布力般坐火車返曼城，沿途的曼聯球迷繼續不停唱歌飲酒，每卡火車都有警察護送我地返曼城，非常攪笑。 其實當時我地已經被雨淋到好濕，不過都無影響我地既興奮心情。

返到曼城，仲係好大雨, 當時我最想就係返apartment 換左濕既衫，叫外賣晚餐, 唔洗再淋雨, 可惜呢度唔興送外賣.  結果我地 "返炒"太湖中餐, 因為明知之後要食好多西餐. 再要揾好食既中菜就難喇.

Day04- 太湖酒樓 @Manchester

朋友Jenny介紹我地去曼城唐人街既太湖酒樓食飯, 好得呀, 好香港口味, 起碼唔係個d 扼外國人既中菜.

我地叫左5個餸兩個飯都只係四十幾英鎊, 果然無介紹錯. 多日無食中菜, 今餐食得好暢快.

呢間酒樓都相當好生意, 我地好夜去到都要等位.

44 Oxford Road (唐人街)
Manchester

0161 236 6557

 (http://www.tai-wu.com/)

Day04-無名神秘Hotel @Manchester

我地係曼城留兩晚, 係booking.com訂左The Apartment Company一間兩房既apartment, 價錢唔貴,
四個人130英鎊一晚, 地方寬敞, 非常新淨, 設備齊全.

唔好既係打掃得唔乾淨, 上網服務失靈, 呢樣對我好緊要架麻，阻鬼住我同屋企人skype, 整極都唔得, 我簡直覺得佢地有欺騙成分，而且佢地應承會係房租打折黎補償我地無得上網 , 但之後又唔認數。

同埋佢地都幾神秘, 大廈外唔俾掛酒店名, 職員係兩個後生仔，一個好punk，另一個成日好似訓唔醒，好奇怪。