第一次整包 - 法式辣魚包

今日跟blog友莎莉整左呢個法式辣魚包, 整緊時以為會唔成功, 因為根本連搓麪團係咩 一回事都唔知, 又無上堂, 又無上網睇 video, 有d覺得自己太衝動.

但出來既效果, 竟然好似澳門朱仔飽!

食譜:
麪粉:250g
鹽& 酵母:各一茶匙
水:約半杯
餡料:辣沙甸魚 (自己加左d洋蔥)

做法:
1. 先搓成麪團再蓋上保鮮紙發酵50分鐘,
2. 之後分成兩份麪團再蓋上濕布發酵20分鐘
3. 洋蔥切粒, 用沙甸魚油炒香, 加入弄碎了既沙甸魚, 放涼
4. 擀開麪團後包入餡料卷成長形再發酵40分鐘
4. 面層掃上沙甸魚油, 跟著以200度焗20分即可.

譚仔米線 @香港

呢間譚仔米線好得我屋企人既歡心, 我地幫襯左佢已經好多年, 差不多每個星期都想食, 佢主打係麻辣米線, 分大, 中, 小辣, 小辣其實都已經好辣, 不想太辣, 可以選 5 小辣 / 10小辣, 甘就溫和d, 要不辣, 選清湯都好好味.

雖然佢有好多分店, 但全部都係九龍, 我地覺得最好既係深水埗福榮街個間,  好多時真係特登坐大半個鐘頭車去食. 

我最愛既係腩肉腐皮墨丸5小辣 :

睇下, 幾大碗, 幾豐富, d 湯非常濃郁, 唔好以為麻辣個湯就一定紅色, 呢個唔紅, 但都已經幾辣, 雖然大碗, 我都可以食得哂!  而家睇到都好想食呀!

自家烤雞 & 雜菜沙拉

今日又想食烤雞, 整多個雜菜沙拉, 就健康d 啦!