Kuishin-bo @ 新加坡

我愛食自助餐同埋任食放題, 原因唔係因為我好食得, 只係我除了好鍾意食野之外, 我都好享受睇靚既食物, 見到漂亮既食物, 就算沒有食入口, 都覺得已經擁有了佢既靈魂, 而且好多時得我同我老公兩個人出外食飯, 散叫不能叫得太多款, 食不完浪費了又唔好, 所以如果食自助餐或任食放題, 就可以每樣試少少, 食到很多種類.

呢間日本餐廳專做午餐及晚餐自助餐, 我地之前幫襯過佢同集團既日本料理和外賣壽司店, 都幾好, 而呢間標榜自己提供150款既食物, 我地經過見到都幾對板同埋都幾多人幫襯, 所以係二月我地就揀左一日weekday去試.

每人只係SGD28.9 + 17% (約HKD170), 就可以食到油甘魚刺身, 吞拿魚腩碎軍艦壽司, 池魚壽司, 凍蟹, 凍蝦, 大蜆, 天婦羅等等, 各式各樣既日式食品, 食物新鮮美味, 環境乾淨舒服, 仲要係任飲果汁, 汽水, 咖啡, 熱飲, 茶都有十款口味選擇!

如果係平日午餐時段60分鐘食完埋單, 只係收SGD20.90 + 17%咋, 啱哂d要返工一族.


Kuishin-bo
Great World City
#02-41A / 42
Tel: 68365877

不是榴槤既紅毛榴槤

紅毛榴槤 (soursop) 係一種熱帶水果, 雖然名稱裡有"榴槤",但其實同榴槤一點關係都無, 我覺得佢同番鬼茘枝有點兒相似, 但係大個d, 白色果肉黑色核, 果肉有點韌, 而且一d 都唔臭, 味道酸酸甜甜.

第一次接觸紅毛榴槤, 是在 No Signboard 既Geylang 分店食飯送既, 紅毛榴槤加啫喱凍糖水, 好清新, 好味道! 每次係 No Signboard 食完飯都好期待食呢個甜品!

之後發現, 原來好多Food Court 既果汁店都有紅毛榴槤汁賣, 不過唔係檔檔都好味, 有d做得好"求其". 

而係 Old Airport Road Food Court 有一檔專賣紅毛榴槤汁, 一杯紅毛榴槤冰只係SGD2, 但係做得好認真, 加左青檸, 酸酸甜甜, 好味, 好醒神!

有機會見到, 都值得一試, 因為呢隻特別果汁, 唔係到到都有, 而且食過辛辣或油膩既野食, 飲佢都好啱.

海港燒鵝 @ 香港

呢餐係今年四月返香港同媽咪慶祝生日, 平時我地時常都係海港燒鵝在旺角既分店食飯, 佢既燒鵝好味過鏞記燒鵝, 燒腩仔皮脆肉嫩, 好多小菜都唔錯, 例如生炒排骨, 潮式銀雪魚. 

今次我地想坐得舒服d, 所以揀左土瓜灣既新店, 呢間闊落好多, 訂左房又可以打麻雀,菜單就選左一個二千六百幾蚊既餐再加一隻燒鵝, 一碟义燒同埋改左隻靚d既龍蝦。

好味，尤其是碟龍蝦烏冬，又鮮甜又彈牙! 食到個個都好滿意.

我就剩係掛住食, 一張相都無影過, 特別鳴謝: 專業相片由我亞嫂同我亞哥提供.

海港酒家

九龍碼頭角新碼頭街38號翔龍灣廣場一樓122號舖

Tel : 2992 0120