悠悠閒 - 美食旅遊
人不在香港, 就愈想食香港野食, 今次抽起條筋, 竟然想食干燒伊麵, 早幾日飲茶間酒樓是有得食干燒伊麵, 不過食完點心後, 已經很飽, 食不下, 就無叫了, 之後就後悔了, 我家姐話我應該照叫, 食唔駛就打包, 可以返屋企慢慢嘆, 唉, 點解我咁蠢呢 ?
唯有諗過第二個辦法, 就係自己炒, 在街市搵到伊麵賣, 買唔到韭王, 就用韭菜, 無草菰, 就用鮮冬菰同本菰.
呢度的伊麵好大個, 個麵餅差唔多有四個人的分量. 淥完之後麵條唔係扁身, 係四方型, 所以口感有些唔同!
呢隻麵好索汁, 落幾多汁都俾d 麵索哂, 味道都ok, 但係都係香港既好食d !
平日老公上班的日子, 我們的早餐多數是自家製的南瓜粥 / 麥皮 + 蛋糕 / 麵包, 今天什麼都無準備, 就不如放縱一下, 做個港式早餐 - 餐蛋通心粉!
午餐肉好吃, 但無益, 不會常食, 偶爾一次, 就更加覺得好味!
ION Orchard 終於起好了, 睇住個地盤兩年有多, 工人日做夜又做, 但起極都未得, 如果在香港, 最多大半年攪掂!
ION Orchard 是一個位於烏節路的大型商場, 在烏節地鐵站上蓋, 整個興建項目包括一個大型商場同埋一座高級住宅 The Orchard Residences , 根據發展商公佈的資料, 高級住宅的平均呎價是星紙三千二百幾蚊呀, 即是港幣一萬七千幾一呎! 暫時未起好, 預計09年尾落成.
講返 ION Orchard, 八層商場, 四層在地底, 四層在地面, 名店集中在地面, 我最關心的食店, 多數在地底, B4 最多野食, 今日試了一檔日式小食 - The Taiyaki 的魚仔餅.
我家姐話俾我聽, 呢間小店在香港銅鑼灣都有, 不過每款的價錢都一樣, 我媽咪試過意大利口味, 都話好吃, 新鮮熱辣辣, 外脆內軟, 材料豐富, 有腸仔,吞拿魚碎, 粟米粒, 番茄汁及芝士, 好似小型pizza!
呢度既魚仔餅, 特別在唔止有甜的口味, 仲有幾款鹹的味道! 排隊時所見, 最多人買的是德國口味, 有薯蓉,芝士, 煙肉, 洋蔥及沙拉醬! 我地試左德國口味, 意大利口味和傳統的日本口味 (紅豆蓉), 相比起, 紅豆味就較遜色!
