Auberge Le Pot de Terre @ 巴黎 [英法之旅 2008]

懶左好多日, 無寫過 blog, 因為有好多野忙, 尋日有d 時間, 就睇左杜如風既 "風行全世界" 第三集, 繼續跟住佢去巴黎 ....睇完至發覺, 原來我地既口味同杜如風既口味都有少少相似, 因為係呢集, 佢介紹左一間必食既法國餐廳 Auberge Le Pot de Terre, 又係我地上次去英法之旅 - 巴黎時特登去搵食既餐廳, 其實佢無講個餐廳名出黎, 不過憑佢影既餐廳門口, 佢食既野同所有蛛絲馬跡, 我可以肯定大家去既係同一間餐廳.係節目裡面, 杜如風就係坐最近門口個張檯黎介紹喇.

呢間餐廳好有來頭, 係一間過百年歷史既老店, 價錢唔貴, 材料新鮮, 味道又好, 選擇又多, 3 個 courses 既晚餐都只係 16蚊歐羅, 如果有興趣想知有咩好食同埋點樣去, 可以睇番我之前既 blog 百年老店 Auberge le pot de terre.

24 小時海鮮 Au Pied de Cocbon @ 巴黎 [英法之旅 2008]

啱啱睇完杜如風既新節目 "風行全世界", 好羨慕佢去左巴黎, 一個我都好鍾意既地方, 好同意佢所講, 真係要更努力上進做野搵錢 ... 去旅行!
佢介紹左一間24小時食豬腳同海鮮拼盤既餐廳 "Au Pied de Cocbon", 真巧, 我地08年去英法之旅 - 巴黎時都跟左旅遊書既介紹, 呢間其實都幾出名, 而且都唔平.

我地之前已經食左 Pho 14 既越南河粉, 所以呢餐只係宵夜, 我地叫左一個大海鮮拼盤, 都幾豐富.

但係我地唔係幾好彩, 個日既蜆同青口就唔係幾新鮮, 尤其係個蜆, 食完佢我要食番d 薯條黎清清口裡面既味. 另外我地都有叫個招牌烤豬腳, 都幾得意, 不過我都係鍾意食德國脆豬手多d.

 
 
Au Pied de Cocbon
6 rue Coquilliere. 75001
[地鐵 Line 4 Les Halles exit and walk 10 min]

翡翠拉麵小籠包 @ 香港

雖然翡翠拉麵小籠包係新加坡既過江龍，但有時我覺得香港店既水準好似仲好過新加坡店, 上兩個月前係香港沙田分店食左一個唔錯既晚餐. 
小籠飽

雞絲粉皮, 普通.

口水雞, 有麻辣味, 味道幾好, 雞肉夠滑. 

素鵝

擔擔麵

鱔糊炒拉麵, 好多鱔糊, 好大方.

上海粗炒, 幾好.

水餃, 不過不失.

百頁結烤肉, 味道濃郁, 腩肉入口溶化.    加上同檯食飯既屋企人唔係個個夠膽食肥肉, 我食左兩件, 有兩倍滿足感.

咸肉津白.

中途跌壞左架相機, 所以無得影甜品.
之後返回新加坡, 見到呢度既翡翠拉麵小籠包有口水雞撈麵, 心諗應該好得, 好啱我, 點知黎到既時候, 聞到好濃既醋味, 食落口, 醋味搶哂所有麻辣味, 太酸啦.

完全唔係我想像既個回事, 究竟係唔係我孤陋寡聞, 定係佢地創新口味呢 ?