西班牙英國之旅 - Day 14

今次西班牙+ 英國之旅，因為要就到曼聯主場既比賽，所以我地去左西班牙玩完先至到英國曼城，
但始終去見傑斯係我既夢想，所以我忍唔住要寫左英國呢部份先。



2010年10月13日 (Day 14)

今日我地由西班牙馬德里飛返英國倫敦，係馬德里機場攪好退稅手續後, 他他條條等上機.

 

今次終於可以順利搭英航由西班牙到英國喇, 機程兩個鐘頭十五分鐘, 飛機餐得包餅仔小食咋,連三文治都無, 英航真孤寒.

英國真係凍過西班牙好多, 係希斯路機場, 同Anthea, Ronald 及 Ceci 依依不捨道別一輪後, 就分道揚鏢, 佢地返香港, 我地就正式開始自己既夢想之旅, 心情開始緊張喇.

我地訂左20:00 既火車飛由London Euston 站到曼城, 時間好鬆動, 所以搭左地鐵Tube 去 London Euston 站先, 期間要轉線, 倫敦既地鐵唔係個個站都有自動電梯, 我地攞住大件行李, 吸收左兩年前既經驗, 我地梗係揀有lift 或自動電梯既站黎轉車.

等緊搭火車時, 係火車站食左炸魚同漢堡包, , 因為唔諗住去到再食晚餐, 所以買左d野食上火車開餐, 我揀左馬莎既蝦沙拉, 預左係英國無咩好野食, 但呢個又幾好味喎.

去到 Manchester Piccadilly 站已經十點左右, 今次我地都係想住apartment,
可以多些空間之餘,又唔駛悶親Antony 一個人，所以我地係The Place Apartment Hotel 訂左一間兩房既apartment三個人住， 呢間好近火車站.

原來佢地係由一個舊貨倉改建，入到去真係忍唔住嘩嘩聲，因為真係好大，一間房有一張雙人床, 另一間房有兩張雙人床，嘩, 住六個人都卓卓有餘，廚房設備好齊全，仲有兩個廁所，雖然叫做apartment, 但有提供每天執房既服務，wifi好過我地兩年前住附近個間Apartment
Company, 而且仲有電話提供，平日只需九十幾磅一晚，真係好抵, 但星期六就貴d, 要一百六十幾磅.

明天一早我地就出發去搵曼聯球星, 所以整理下明天要帶既物件後, 收拾心情, 早點休息, 希望可以有好成績.

西班牙 + 英國之旅 - 前奏

2010年9月26日

相隔不足兩年, 又再次計劃踏足歐洲, 其中一個原因都係為左曼聯既傑斯, 見到有ｄ網友專程去到曼聯既練習場搵傑斯, 真係令人羡慕, 我都好想試下，因為我真係好想好想近距離見傑斯真人, 好想搵傑斯簽名, 好想同傑斯合照 …

加上好希望係奧脫福球場睇曼聯比賽, 好想感受曼聯主場既興奮氣氛, 好想親身見證曼聯主場入波既震撼場面 …

又加上好想去西班牙, 好想見識一下巴塞隆納高第 Gaudi既鬼斧神工, 好想見識下西班牙南部美麗如畫既白色山城, 好想見識西班牙美味既海鮮飯, 烤乳豬, 西班牙火腿, 仲好想係馬德里偶遇皇馬既龍門卡斯拿斯 ….

其實唔駛急去西班牙既, 去奧脫福球場睇曼聯都唔急, 最急係要去搵傑斯, 因為唔知佢幾時會退休離開曼聯, 踢埋今季就退休, 定係踢多一季呢? 無人知, 咁啱, 我家姐同姐夫今年又要去西班牙, 就係咁我地就決定安排2010西班牙/英國之旅.

即係話, 我地今次既陣容好厲害, 除左有我地2008年英法之旅既原班人馬外 (我, 老公, 好朋友兼曼聯迷Antony, 好朋友兼Antony 老婆既 Ceci), 仲有我家姐 Anthea 同姐夫 Ronald, 合共六個人一齊去西班牙, 至於英國曼聯之行就由我地三個曼聯迷負責.

要夾到六個人既時間已經唔易, 再夾埋曼聯主場既賽期就更難, 不過最終我地都揀到一個唔錯既檔期, 2010年9月29日出發, 十三日西班牙, 五日英國曼徹斯特, 計劃係10月17日睇曼聯主場西布朗.

經過一輪行程安排後, 訂好了所有機票, 車飛, 酒店, 搵齊哂去見傑斯同其他曼聯球星既資料後, 歡天喜地期待呢次既夢想之旅, 怎知係我地出發前兩個星期, 突然知道西班牙係9月29日全國大罷工, 即係我地出發個日, 唉… 唔知對我地有無影響呢 ? 到出發前三天, 知道傑斯比賽時受左傷, 唉 … 好擔心呀, 傑斯唔好有事呀, 除左擔心傑斯既傷勢外, 當然擔心到我地去到英國時見佢唔到喇, 幸好費sir話傑斯唔係傷得好嚴重, 要休息兩個星期左右, 好彩, 我地都仲有機會, 希望佢快ｄ好番回復狀態啦.

至於曼聯主場西布朗既波飛, 一如上次, 我地都係情商住係Manchester既好朋友Jenny幫我地找朋友讓飛, 係我地出發前, 仲未收到好消息, 所以我個心仲未可以好踏實, 今次呢個歐洲之旅, 存在好多變數, 相信一定好刺激.

好正既廣告 ....

好正呀, 可惜少左傑斯啦 !