西班牙英國之旅 - Day 16 [Part 1]

因為昨日已經有d收獲，肯定今次既旅程唔會白費, 所以個心都比較踏實, 今曰我地就放縱自己瞓晏少少，正正經經食埋過豐富早餐至出發，去到carrington 啱啱十點十五分。

今日又係Jims當值，有一位當地年青球迷係到等緊， 佢話俾我地聽我地錯過左雲達沙,吓，據說雲達沙好難停架， 我地尋曰都停唔到。呢位球迷認球員車好叻，而且同一d球員好熟咁， 我地問佢係唔係成日黎，佢話大約一個月一次， 我諗如果我好似佢咁住係呢度我都會成日黎喇， 不過如果要長住我就真係頂唔住呢度既天氣.

大既十一點到，陸陸續續有d球迷黎到，今日好多元化, 有一個南韓球迷, 見到佢, 我地就好有信心可以停到星仔，尋日我地停唔到佢， 另外又有兩個愛爾蘭男士帶住三個小朋友黎，佢地好可愛架, 著哂曼聯波衫, 好事呀, 因為可能有d球星見到小朋友會友善d.  又有幾位西人球迷, 好熱鬧, 其實十幾位球迷一齊係到等都幾好, 趁佢地同球星影相同簽名既時候, 我地可以有多些時間攞齊波衫同相片出黎, 唔駛驚球員好快走, 前一天我地既策略係影相最緊要, 唔係簽左好多相, 因為唔敢阻佢地太耐.

今日第一個停俾我地既係馬捷達, 佢部車入面有個笑得好甜既女仔, 唔知係唔係佢女朋友呢 ?

之後又見到大細孖, 法比奧同拉斐爾.

第四個係維廸,  我都唔記得佢係主動停定係被迫要停, 總之就好趕時間, 未影齊相就要求我地放佢走, ok, 要走就走囉, 我地唔會阻你既.

之後就到星仔喇.

下面三位就係新相識既愛爾蘭朋友仔喇, 佢地都好落力幫手嗌停d 球星.

隔左一陣間就到奧沙出場, 個排佢受到緋聞困擾, 前一日都唔肯停, 估唔到佢今日會停喎, 但係佢個樣真係好殘呀.

今日伊雲斯都肯停喎, 佢著短袖衫咋, 同我地好大既對比.

之後係卡域克.

呢兩日奧雲都係揸部寶藍色寶馬, 好易認, 昨日俾佢走左, 今日我地見佢出閘時就大力fing 有佢名既波衫, 哈哈, 果然肯停喎. 而家既奧雲留左鬚, 型仔左好多.

艾夫拿昨天揸住部跑車走得好快, 好彩今日肯停喇.

新仔奧巴坦.

傑斯又係好勤力, 好遲至出黎呀, 不過唔緊要, 今日佢揸左部跑, 一樣咁型仔.  但我地兩張合照都唔係幾好, 一張我無望鏡頭, 一張佢合埋左眼, 我剩係顧住同傑斯合照, 唔記得幫番我兩個拍檔影相, 真係對佢地唔住.

最後係小豆, 佢好好人, 笑容滿面.

要數最堅持唔停車既應該係加利仔, 史高斯同朗尼, 真係非常有性格.
哈哈, 今日收穫豐富, 不過我地後知後覺, 原先只係帶左d 熨左球員名既波衫去俾個別球員簽名.

但見到好多球迷都攞住一件波衫盡俾所有球員簽名, 我地又唔蝕底, 拿拿臨攞番兩件出黎簽, 反正簽左一個名後, 件衫都唔著得, 就不如簽足成隊啦, 而且更有紀念價值, 之後我又好後悔點解唔簽多一件俾侄仔.

今日掛住簽波衫, 所以都唔係簽左好多相, 下面係呢兩日既收穫.

昨日係曼聯 Mega Store買左傑斯本新書, 今日又可以俾佢簽埋名.

Thank you very much, Ryan Giggs.

西班牙英國之旅 - Day 15 [Part 2]

2010年 10月 14日

離開曼聯訓練場既時候, 心情真係好爽, 雖然要行二十五分鐘至有巴士搭, 而且仍然有微雨同陰風陣陣, 但依然好回味先前既過程.  呢個下晝我地無安排節目, 所以決定去左奧脫福球場睇下可唔可以參加奧脫福嘅參觀團, 彌補番兩年前我地去唔到.

搭緊巴士時, 突然有職員上黎查飛, 嘩, 佢地好跨張架, 神色凝重之餘, 仲有兩個警察陪佢, 咁認真既 ?

去到奧脫福已經差唔多三點, 好彩四點場仲有飛賣, 諗住去Red Cafe 食番個 late lunch, 點知係無野食架, 只係得d 包裝薯片呀, 餅乾之類, 唔係呀? 餐廳喎, 連三文治都無, 饑寒交迫下唯有行番出街口食漢堡包喇, 唉, 又要再吹風.

食完行返黎, 時間啱啱好, 終於可以踏足奧脫福球場.

一定要同個場黎張大合照喇, 有無留意我地著到成隻粽咁都仲縮下縮下.

而呢幾位外國小朋友幾堅, 短袖衫咋, 若無其事, 個日得幾度架咋, 好厲害呀.

曼聯既主場座位, 費sir 同後備球員就係坐呢度喇.

原來今年係 OT100 奧脫福球場一百週年, 好有紀念價值呀.

平時呢個贊助商既廣告牌係電視就睇得多, 今日我地又要影番張扮下野先.

入球員既更衣室係參觀團其中一個項目.

原來朗尼係坐傑斯隔離架.

行完個tour 都已經五點, 博物館個邊已經收工, 我地可以憑票明天先再黎行番博物館, 所以我地就去左曼聯 Mega Store 到掃貨.

今日既晚飯, 我地舊地重遊, 去左唐人街既太湖酒家食中餐, 已經十多日無食中菜喇, 今日食番, 感覺很好.

西班牙英國之旅 - Day 15 [Part 1]

2010年10月14日

今次我地黎曼徹斯特既目的唔止要入坐在觀眾席上睇曼聯, 睇傑斯比賽, 最主要係要近距離見到傑斯同曼聯球員, 我地要同到佢地影合照，要攞到佢地既簽名，之前見到佢地，距離實在太遠喇，唔夠實在，今次我要好近好近既，我要做一個貪心既傑斯迷！

今次我地得到高人指點, 呢位高人其實係一位超級傑斯迷blog 友 Small Yan,
佢簡直係首席傑斯迷, 唔單止全程投入支持傑斯, 對於去英國搵傑斯, 仲非常之有經驗, 最難得既係佢會好樂意將自己既經驗同朋友或blog友分享,
今次我地好幸運得到佢提供非常有用既心得同詳細資料，希望我地可以夢想成真，Thank you Small Yan!

我地今日一早就起床, 因為要到曼聯訓練場Carrington, 跟據 Small Yan 教路，我地七時左右就由Apartment 出發，首先搭Metro由Piccadilly 站到Sales 站，然後轉的士到 Carrington，好順利八點三左右我地行到去訓練場入口．

我地係第一批球迷, 見到第一個人就係保安員伯伯Jims, 佢話俾我地知暫時未有好多球員到左, 佢好好人, 好好傾, 當有車駛入訓練場，佢有提我地邊部車係球員既,
我地就嘗試截停佢地．

之後黎多左兩個外國球迷，其中有一個好勁架，攞住本十多年前曼聯球員Annual Book, 裡面既球員只係剩番兩個未幫佢簽名咋．

第一個係訓練前肯停既球員係李奧，以為佢唔停，但突然又停左，我地緊張到有點手忙腳亂，想佢簽相，但又開唔到筆蓋，雖然佢個樣好cool, 但都要多謝佢，幫我地開左個頭．

第二個肯停既係新仔Smalling，其實我都唔係好知佢係邊個，我兩個拍檔就知．

第三個肯停既係貝碧托夫，佢個樣好溫柔好攪笑架．

有好多球員經過都唔肯停，可能佢地趕住要訓練，到九點幾，傑斯部車突然經過左, 我地至意會到,  我連佢件衫都未fing佢就走左，唉，點解我咁大意呢？ 
大約十時，Jims 話要返黎訓練既球員都應該返齊，咁即係話要等佢地訓練完走既時候，至再有機會截停佢地，個度有微雨又好陰陰凍，無舖頭又無廁所，但出返去有民居既地方起碼行二十五分鐘，所以我地都無打算走開，只係搵 Jims 傾下計，食下朱古力，無無聊聊行下等自己無咁凍黎打發時間．
我地問Jims佢最鍾意邊個球員，佢話好多佢都覺得好，例如傑斯，Yeah!有眼光！問佢知唔知傑斯好番未，佢話睇傑斯既速度就知佢好番喇，正！佢仲估傑斯黎緊個場波都應該有得踼，太好喇！
我地其實都好想見到蘇斯克查，今朝好似見到佢揸車經過, Jims 話蘇斯克查多數都好夜至走, 好似費sir咁，所以好難等到，至於小豆呢，Jims 話佢今日唔係英國呀，好似聽日會返．之後黎多左五個外國球迷一齊等．
到十一點半左右，開始有球員走，有d肯停，有d唔停, 第一個肯停既係新仔Bebe.

影影下相先知，原來安達臣坐係佢部車到，佢都好人，講緊電話都肯影相．

之後見到史高斯，佢唔肯停，但唔好彩俾前面部車阻住左佢，佢唯有咬手指等開車．

之後肯停既有費查．

大細孖　

Jims 話傑斯通常好遲至走，果然差唔多一點，佢終於出黎喇，好彩有停，佢好好人，又肯影相，又肯簽名．

見到佢笑，真係俾佢電暈左， 佢真係好有型。

第一次咁近見到佢，真係好緊張，之前無諗過同佢講咩野，突然想問佢星期六會唔會出場，佢話希望會，我真係希望佢可以復出喇．

最後走既係卡域克．

我地今日既收穫都唔錯，大家都可以鬆一口氣，原先兩位拍檔諗住如果今日可以停到傑斯，明天就唔駛再黎，我當然希望兩日都黎喇，咁遠飛黎，見多一面得一面，但我都明白兩位男士無我咁癲，佢地唔想咁辛苦，不過當我地離開訓練場時，佢地竟然話，不如明天又再黎多一次，太好喇，我地相量過明天目標係接放工，所以唔會好似今日咁早，大約十點半左右黎到就可以了．