鍾情法包

一直都很鍾情於法包, 因為又唔需要落奶, 又唔要落牛油, 啱哂我.

而且曾經睇過blog 友綠萼焗既超靚法包, 非常羨慕, 好想自己有機會做到, 八成都好呀!

其實之前我都試過一次, 但係當時我無法包粉, 就用左高筋粉替代, 當然唔得啦, 外面好硬唔脆兼裡面好實唔鬆軟. 最後我地攞左去餵白鴿。

今次我係香港買左法包粉, 材料我就跟左法包粉既指示按比例減少做一次少d既份量, 同時想佢軟熟d, 就學埋綠萼加左老麵：

法包粉　25g
高粉 75g
水　66g
instant酵母　2g
老麵　30g

做法: (跟左綠萼既做法）　
1. 所有材料搓至麵糰光滑和不黏手，基本發酵45min至1hr, 發至2倍大，以手指測試為準
3. 排氣,把麵團分割成2份,滾圓,鬆弛10分鐘
4. 搓成長條狀
5. 再發酵約25分鐘, 發至2倍大.
6. 220度蒸氣焗約25分鐘.

出黎既成果都係普通咋, 我覺得第一次發酵ok, 第二次發酵就麻麻地, 入爐後就發都無發, 一樣size出返黎. 不過外面都脆, 只係裡面唔夠鬆軟, 已經好過上次. 點解入爐後唔發呢? 我已經好斯文對佢地, 入爐前無大力震過麵團喇!

第二朝我就噴水焗返脆佢加左沙丁魚洋蔥用黎做早餐, 都幾好味.

我都知法包是麵包中最難做得好的, 我係唔會放棄, 繼續努力!!!

泰式香草焗魚

係新加坡, 好難買到新鮮游水魚, 就算去街市, 絕大部份都已經瞓左覺, 好難食到鮮甜美味既魚, 唯有係煮時加多d健康既配料, 令到d 魚好味一點.

呢個係一個泰式做法, 因為加入左唔少香料, 所以很香.

材料:

鱸魚或烏頭一條 (洗淨, 在魚背與魚鰭間切一刀, 令到易熟d)
配料 : 南薑, 香茅, 檸檬葉, 乾蔥頭 / 洋蔥, 辣椒
調味料 : 黑椒, ,鹽, 魚露

做法:

1. 預熱焗爐180℃
2. 將魚放在錫紙上, 把配料放在魚底, 魚面及魚肚內, 加上調味料
3. 包好錫紙, 放入焗爐以180℃ 焗15-20分鐘.

食時如果唔夠味, 可隋意加魚露.

心太軟

近排睇電視Asian Food Channel, 好幾個節目不約而同都有整"心太軟"朱古力蛋糕, 其中一個廚師話, 唔需要落麵粉, 真係得?　

心思思又想試下焗, 如果識焗就發達啦, 以後幾時想食都得．

上網搵下食譜，最後揀左blog友Garfield既食譜：

材料   (改左少少) [做2個]
黑朱古力 (73%) 55g 
淡牛油          35g  (有blog友話試過減到呢個份量都得)
全蛋              1隻
蛋黃              1隻
麵粉              25g
糖                  35g

做法 :
1. 全蛋、蛋黃加糖打勻(像平時發蛋一般就得小小泡,不用使打發起)。
2. 朱古力+牛油隔水煮溶 ,離火後用手動發蛋器邊搞邊加入蛋漿拌勻。
3. 用手動發蛋器一邊搞一邊加入麵粉(分兩次)。
4. 將朱古力漿倒入模內,"登"平後放入雪櫃雪最小一小時。(雪耐點會好些,這樣沒有這麼容易變成普通蛋糕)  [入模前已在模內抺上牛油同少許麵粉, 方便倒出蛋糕]
5. 預熱180度, 焗約8分鐘。見表面成形即可(但若想要多一點的朱古力漿流出, 可以焗6分鐘即熄火, 待1分鐘後才取出)

第一次試焗一個先, 睇下咩環境, 我用左180度上下火, 放在爐既中層, 焗左8分鐘, 無咩動靜，朱古力漿依然係朱古力漿, 一d 都唔似蛋糕, 唯有開大d火至 200度, 上火加風扇, 放高一層, 焗左5分鐘, 外層似蛋糕喇, 可惜倒出黎既時候已經過熟, 竟然有d似 Brownie.

再試第二個, 200度, 上火加風扇, 第一層, 焗左7分鐘, 個蛋糕唔係發得好高, 加上我個蛋糕模又太闊, 好難取出, 攞到出黎已經列開左, 不過都有溜心既效果, 只係醜樣左d啦!

究竟應該點樣可以做好d 呢? ?？我諗要搵d高人指點指點!