天然麵包香 - 咖啡麵包

又是咖啡, 不過今次不是蛋糕, 而是天然麵包香的咖啡麵包, 昨天做定了中種, 今天可以試搓呢款新品種.

對我來說, 呢款都幾複雜, 很多材料, 除了即溶咖啡粉外, 還有蜂蜜, 蛋, 牛油, 砂糖, 牛奶, 而且造型都是我未試過的.

在新加坡, 我找不到仙姐介紹的雀巢特濃咖啡粉, 上次去開沙巴, 都找不到, 最後在沙巴買了呢隻雀巢金裝咖啡粉, 同一款咖啡粉, 沙巴的價錢比新加坡平宜三分一, 唔怪之得, 有些新加坡人會駕車到馬來西亞買平貨.

我無用牛奶, 只用了咖啡伴侶加水代替, 而且只扣起約 1%的水份, 所以個麵糰都幾濕, 今次發酵得麻麻地, 最後應該發酵約45分鐘至八成滿, 但我的麵糰發酵了60 分鐘只得五成滿, 無什麼起色, 麵糰好似死了一樣.  

但因為我怕發酵的時間過長會令到個麵包變酸, 所以我無再俾時間牠發酵, 好彩, 入爐後麵糰都有繼續升起, 平均去到八成左右, 最高個一點都叫做去到麵包模的頂點.

搓的時候, 咖啡味好香, 焗完後, 就更加香!

麵包的質地都幾軟熟煙韌, 但搓得未夠好, 不夠綿密, 味道方面, 我覺得甜少少會再好一些, 老公喜歡就咁食, 我就鍾意塗一點朱古力臻子醬 Nutella 來吃 !

Pesto Sauce 意式青醬

意式青醬, 不要說自己做, 其實食都未食過, 應該是什麼味道, 我都唔知, 因為所見過的現成意式青醬或餐廳的都有芝士, 所以我從來都沒有試過.

不過最近又發現了一位對烹調美食非常認真的 blog 友 - 維多利亞的廚房, 她詳細介紹了青醬的做法, 原來芝士是最後才加的, 對我來說, 實在太好了, 這樣我就不下芝士了, 急不及待, 買齊材料, 就開工.

做之前, 影張大合照先.

材料:

羅勒 (金不換) 100g
松子 80g
蒜頭  1/4杯
橄欖油 150ml
海鹽  1 小匙
黑胡椒 少許
油漬鯷魚 2 小匙 (可不用)
Parmesan 芝士粉 2 匙

作法:
1. 羅勒洗淨去梗風乾 / 拭乾, 大大切幾刀 (方便打碎)
2. 蒜頭去膜及切片 (方便打碎)
3. 烤松子: 用焗爐或易潔鑊乾炒, 逼出松子香氣, 但不要焦掉
4. 攪碎:  將橄欖油, 松子, 蒜頭, 羅勒入攪拌機, 中速打至泥狀 (可加水易攪, 但不能保存太耐)
5. 調味: 下黑胡椒, 鯷魚及鹽, 自己試味
6. 放入芝士粉攪匀 (不要早放因不易攪拌)
7. 不加水, 就可於冰箱保存 2 - 3 週

今次我用了羅勒 40g, 松子 35g, 蒜頭 5粒, 橄欖油 65ml, 海鹽  1茶匙, 黑胡椒 少許.

因為沒有加水, 所以都幾花時間才攪好製成品, 好香呢, 但仍然未想像到青醬意大利粉的味道, 仍然唔肯定自己喜不喜歡呢款意粉!

我用了四分一青醬, 蒜片, 洋蔥粒, 鮮冬菇, 煙肉和雞柳, 煮了二人份量的意大利粉, 很有驚喜, 很好吃呢, 簡直有相逢恨晚的感覺, 點解我現在才認識你呢 !

下次不用雞肉都得, 可以專心吃意大利粉, 慳返去皮, 去脂肪, 切件, 調味 . . . 慳返很多時間呀!

咖啡栗子蓉卷蛋

早兩天做了些栗子蓉, 想做卷蛋, 好難決定做什麼味道的蛋糕, 想食咖啡味, 但又驚顏色的配搭唔夠靚仔, 做原味的蛋糕就好似靚d, 究竟要好味定要好樣呢 ?

最後決定做咖啡味, 今次仲落足7 g 咖啡粉, 希望可以香 d 咖啡味!

今次是我第三次做卷蛋, 希望可以順順利利, 但估唔到我擺了個烏龍, 我無為意, 自己唔記得買牛油紙, 得番一張夠用來焗蛋糕, 唔夠牛油紙做卷的過程.

點算好, 用錫紙卷得唔得呢 ? 係唔得既, 錫紙會黐走個蛋糕面. 

用返焗蛋糕個張牛油紙得唔得? 係唔得既, 都會黐走個蛋糕面, 我就係用左呢個辦法, 結果整個蛋糕面無哂, 好彩唔係一達達, 如果唔係就更醜樣喇. 

經過今次的教訓, 知道以後如果無牛油紙, 就唔好做卷蛋了!

至於味道都幾好, 好香咖啡味!