西班牙美食當然唔少得西班牙炒飯同海鮮湯，去到西班牙，急不及待要試，第一晚黎到巴塞，雖然被航空公司折騰左一整日，人已經好攰，但都要食野架，我家姐就帶我地到apartment 附近既La Fonda 餐廳試下佢地既西班牙炒飯Paella.
我家姐上年試過呢間餐廳，對佢地既Paella同海鮮湯讚不絕口，因為攰攰地，無心機慢慢睇餐牌，佢地有兩款西班牙炒飯，同埋有墨汁飯，西班牙好多餐廳叫西班牙炒飯都一定要兩人份，呢間餐廳都係，所以我地叫哂三樣一齊試，再叫左海鮮湯，沙拉同烤魚黎試，今日全日都係食飛機餐，所以要食番ｄ好野補番數．
西班牙炒飯（海鮮），真係好好食，好濃海鮮味，飯係主角，最好食，因為吸收哂海鮮既精華，而且質地好好，至於海鮮，魷魚都可以，但蝦就過熟．
呢個係雜錦西班牙炒飯，都好食不過海鮮味就唔夠上面個個咁濃郁．除左海鮮外，仲有排骨．
睇下個墨汁飯，真係好黑呀，雖然樣唔靚，但又幾好食，個香味好特別，好鮮味又好有咬口．
佢地既價錢一ｄ都唔貴，西班牙炒飯一人份都唔駛七歐羅，份量好大，平過好多餐廳．
海鮮湯都好得，好豐富既海鮮味，肯定用左好多海鮮去煲，加埋脆麵包粒，好夾．四個幾歐羅，都唔算貴，飲完真係好滿足．
Sangria都好飲，飲到個個都好眼瞓．
雖然ｄ飯好好食，但係大家狀態都麻麻地，所以食剩左好多，個時又唔醒起打包，第二日諗番起就好後悔，因為我地既Apartment有廚房可以番熱做宵夜，之後食過其他餐廳既西班牙炒飯都唔夠呢間咁好味，就更加掛住La Fonda, 所以第五晚我地就決定番炒 La Fonda.
今次試多左其他食物
我同我家姐兩個飯桶主力食我地最鍾情既西班牙海鮮炒飯，無得彈呀！
上網睇返一ｄ旅遊網，原來呢間餐廳都有好多人讚架，而且佢既環境都好靚，又近La Ramble．
佢地既集團仲有好多餐廳添, 有興趣可以睇下 www.lafonda-restaurant.com/
La Fonda
C/Escudellers 10, Barcelona, SpainTel :93 301 75 15
Neighborhood: El Barri Gòtic, La Ramble
No comments:
Post a Comment