到外地旅行, 參觀街市已經成為必然不可缺少既動作, 巴塞隆納 Mercat de Sant Josep
非常出名, 我地當然唔會錯過, 到達巴塞既第二日, 一早我地就去街市搵食, 聖荷西市場果然係一個寶庫, 係裡面真係有好多寶物.
第一樣唔可以錯過既係西班牙火腿 jamon, 面向街市大門右手邊第一間賣西班牙火腿既 係 Marco.
呢間既火腿好好味, 價錢雖然同其他店差不多, 但佢地好好人, 好慷慨大方俾你試佢地既火腿, 買得多野仲會有野送.
佢地三十六個月既黑毛豬火腿 100g 只要10歐羅, 相比起香港City' Super 要400蚊港紙100g, 真係抵好多, 我地都買左好多.
生果種類好多, 排得好整齊, 好靚好似好吸引, 但當您要買嘅時候，佢地就會係後面攞D就黎爛嘅或者唔靚既俾您, 你係無得揀, 而且你千祈唔好多手掂d生果，佢地一定會鬧您！ 感覺好搵笨囉，俾ｄ靚既黎引你，但你買時只係俾ｄ爛既你．
呢d 一份份既就可以揀喇, 好抵呀, 咁多個無花果都只係兩歐羅咋.
果汁種類繁多.
蔬菜好多好靚, 不過又係千萬唔好攪, 係唔掂得架.
好多菇菇賣, 呢隻就貴d, 如果普通磨菇就只係要兩歐羅一公斤, 好抵.
海鮮又係極多款式, 好吸引.
鬼爪螺都有.
呢度仲有好多熟食小檔, 每檔以吧檯形式, 坐到十幾二十人左右, 有預先煮好既 tapas, 又有即叫即做既海鮮, 又有咖啡又有酒飲, 我地經過呢檔, 佢地煮既食物真係好香又好靚, 雖然唔知佢地既價錢, 但我地都決定試一試, 食番個早餐先.
先黎蕃茄包, 雖然個樣唔係幾靚, 但就好好味.
呢個香草欖油魷魚青口, 個魷魚真係十個好味, 好新鮮, 質地好好唔乾好軟熟, 可以話係我地全個西班牙最好食既魷魚, 之後都搵唔番呢個味道
呢個青瓜蛋餅又係好正, 好清新之所餘, 蛋味又香, 之後第二度又係食唔番, 早知食多兩件啦.
魷魚仔, 都好味, 但唔及大隻個d.
欖油炒菇, 個樣有d 似我地既秀珍菇, 但質地好d, 簡簡單單都好好味. 我地見到有人食煎大蝦, 不過質地好似唔係好新鮮.
咖啡都好讚呢. 呢餐雖然唔平, 但大家都好滿意.
下次如果再去巴塞, 一定會黎食多次.
因為我地住既係Apartment, 所以我地可以煮野食, 係第三日朝早, 我地去左同人迫街市, 係聖荷西市場買左法包, 磨菇, 豬肉腸, 雞蛋, 生菜, 蜆仔自己做早餐, 當左自己係巴塞人, 哈哈!
Mercat de Sant Josep La Boqueria
聖荷西市場
巴塞隆納地鐵 Liceu 站
星期一下午至星期六
No comments:
Post a Comment