對於英國既食物, 我地係無咩期望, 但對於西班牙既食物, 我就抱有好大既期望, 好彩今次我地都搵到好好既美食, 係未詳細講西班牙既行程之前, 忍唔住都要重溫下呢d 美食先.
最令我有驚喜同難忘既係Segovia塞哥維亞 Meson de Candido 康廸德餐廳既烤乳豬Cochinillo, 呢間餐廳已經有二百多年既歷史, 最出名就係烤乳豬.
如果去到Segovia 要搵呢間餐廳一d 都唔難, 因為佢啱啱係水道橋旁邊.
餐廳內部好古式古香, 我地算係最早食午餐既客人, 所以入到去未叫野食就四圍影相.
影下影下, 我同我家姐連人地既廚房都唔放過, 因為廚房對我黎講, 係最神秘又最有興趣既地方, 冒住俾人罵既危險, 偷影緊既時候, 突然見到有人向我們招手.
睇真d, 原來係大廚叫我地入廚房, 竟然可以參觀, 烤爐附近放滿乳豬, 好震撼呀, 而且大廚仲肯同我地合照, 簡直係星級既待遇, 開心到暈, 大廚真係好好人呀.
我地影相既後面就係大烤爐, 裡面有好多乳豬仔焗緊桑拿, 睇見就流口水.
原先我地未入黎呢間餐廳時, 膽粗粗已經決定食豪d , 每人一份乳豬, 入完去廚房就更加意志堅決, 一隻乳豬分八份, 呢大半隻係我地既。
皮脆肉嫩，好多肉汁，雖然烤出黎d 皮既顏色好淺，但個皮真係好鬆脆，咬落去好有油香，調味方面啱啱好，唔會好咸.
豬既肉味好香，pat pat 位都唔鞋唔乾, 但皮就唔夠腩位脆, 都係腩位最好味.
西班牙乳豬真係好特別, d 肥肉係滑同淋, 唔同香港乳豬d肥膏係爽同硬身d 既, 唔知係豬既品種唔同, 定係佢地焗既方法唔同, 保留到肉汁同肉既嫩滑外, 皮又夠鬆脆, 果然係高手。雖然一份唔平, 要二十歐羅, 但份量都唔少, 呢度既乳豬可以話係我食過最好既, 令我念念不忘.
佢地既麵包好得意, 似一個大餅, 單食唔算好食, 浸汁就好d, 剩呢六件包都要收九歐羅架.
呢間餐廳有個傳統儀式, 一個疑似老闆既人會讀出一段說話後就用一隻碟, 切開隻豬, 然後就會將隻碟掟爛, 有幸撞巧我地差唔多食完時就見到呢個儀式.
嘆埋個咖啡就真係好滿足, 雖然係網上見到有彈有讚既意見, 可能個個人既口味不同, 不過一場黎到, 我就覺得值得一試.
Segovia 果然係出名食乳豬, 係附近既商店見到好多烤乳豬既擺設, 好可愛.
Meson de Candido 康廸德餐廳
Plaza de Azoguejo,5 ,Segovia 水道橋旁
Segovia 塞哥維亞
http://www.mesondecandido.es/ingles.html
No comments:
Post a Comment