未去西班牙前, 已經做定功課, 知道Madrid 馬德里有間百年老店 Chocolateria San Gines 係朱古力油炸鬼Chocolate con Churros專門店, 呢間老店好有名, 電視旅遊節目都有介紹, 聽聞好多當地人半夜三更飲完酒後, 就會去個度食番個朱古力油炸鬼至返屋企瞓覺, 所以呢度最多人幫趁就係半夜.
咁講法, 呢間專門店一定有佢過人之處, 加上見過佢既朱古力係又黑又杰又濃, 真係好啱我, 我無打算半夜至去, 但就一定要去試下.
呢間專門店好近太陽門, 又好近我地既酒店, 而且佢好似係下午至開門, 我地趁今日去完Segovia 返馬德里, 就去食番個下午茶, 當時已經六點幾, 個度人山人海, 要等位呀, 見到d 伙計唔停手, 真係好心急想試.
佢地有兩款油炸鬼, 一款粗, 一款幼, 大部份既顧客都係食幼個款, 所以我地都要左多d 幼個款.
粗個隻個樣真係好似香港既油炸鬼.
正式食法係將油炸鬼浸落杯熱朱古力至食, 嘩, 好香濃朱古力味, 油炸鬼外脆內軟, 唔係淨係硬脆個d, 其實個質地真係好似香港油炸鬼, 不過個樣別緻d, 同特濃朱古力好夾, 而我都係鍾意幼個隻多d, 真係好味都停唔到口, 唔怪得每檯都係大大碟.
其實試呢間店之前, 我地係Malaga 馬拉加都試左一間有七十八年歷史既專門店, 又係好多人幫趁, 不過個度既朱古力唔夠香濃, 同呢度無得比, 但油炸鬼都好食, 只係個樣無呢間咁靚仔.
佢地既油炸鬼唔係一條條咁炸, 係好有效率, 成個蛇餅咁炸出黎, 等緊位時, 見到有個伙計負責處理剛剛炸好既油炸鬼, 好有趣, 不過佢都幾浪費:
去到Madrid 記得要去試一試.
Chocolateria San Gines
Pasadizo de San Ginés, 528013 Madrid
(close to San Ginés church, just round the corner from Calle Arenal)
No comments:
Post a Comment