迷你綠茶紅豆卷蛋

又一新嘗試!

網友廚房男, 很熱心教人做卷蛋, 他做的卷蛋好靚, 好似街買的一樣, 今日跟網友愛美麗介紹, 在Daiso買了紅豆蓉, 手痕, 好想試用綠茶戚風做綠茶紅豆卷蛋!

因為我不想落奶, 所以無跟廚房男的食譜, 自己膽粗粗, 用自己做開戚風的食譜調教左下面的食譜, 但做法就跟足廚房男, 不過我只得個細盤, 所以只可做到迷你的卷蛋.

材料　

蛋黃  50g (三隻)
砂糖A 30g
蜜糖 12g 
沙拉油 28g
低筋面粉 75g
蛋白   140g (四隻)
砂糖B 28g
檸檬汁 半匙
熱水 53g
綠茶粉  4g
紅豆蓉   適量


1) 綠茶粉加入熱水,  拌勻.

2) 牛油紙鋪在細盤裡

3)  蛋黃加砂糖A用手動打蛋器混合 （不可以打至發泡，如果打至白色，會使蛋的風味減低) , 加入沙拉油, 綠茶和蜜糖拌勻, 篩入粉類混合。

3) 蛋白和砂糖B,檸檬汁打發至企身結實, 和1)混合 (分兩次，不要令蛋白糖霜泡泡消失), 倒入細盤內, 盡量抿平, 180度焗15分鐘, 取出放涼。

焗完, 好彩個面無爆開，不過有些縐紋, 移離焗盤，同埋撕走四邊既牛油紙散熱。切勿急於加牛油紙在蛋榚面上，一回潮有濕氣就會甩皮。

放涼，直至蛋榚面回至室溫, 舖上牛油紙，牛油紙長度要比蛋榚長度長約 30 - 40% (我個張短左些), 用木板或任何平面工具，幫助反轉蛋榚, 反轉後撕走蛋榚底部牛油紙，再放涼一會.

上紅豆蓉.

以下是廚房男的教路, 但我沒有影相, 想看相的話, 可到他的網誌:

> 預備麵棍一支，太粗太幼都好難控制。唔好空手卷, 因為力度分佈唔平均會裂開, 衰梗咁制, 支棍係牛油紙底部先卷好

> 用反方向卷起牛油紙同時抽起蛋榚

> 卷第一圈時比較關鍵，麵棍要先輕輕用力係蛋榚末端 (近自己一端) 稍稍下壓，等第一圈定型，呢一下做得唔好，會好難卷起同卷得靚

> 第一圈得左，之後就輕鬆得多，只要一路用麵棍捲起牛油紙，一邊向前張蛋榚向前推至尾

> 收緊蛋榚，應該一隻手按緊牛油紙尾部一端，另一隻手按住麵棍中間向自己方向輕拉，收緊蛋榚

> 臨卷至最尾時，要略略括去多餘既忌廉或醬。因為多餘既忌廉會走出黎，漏係牛油紙同蛋榚皮間，蛋榚皮會濕，拆牛油紙果下會甩皮。呢一下唔起眼但重要既環節要注意一下

> 如果收得好，個尾部係會貼少少既！就咁用牛油紙包好放入雪櫃定型15-30分鐘先。

理論上就應該好似上面的做法, 但我卷第一個圈時, 蛋糕面就已經裂開了, 唯有繼續卷, 好彩之後都無爛落去. 真是不容易啊!

雖然不算靚仔, 但都叫做是卷蛋樣!可能我做的是迷你版, 所以比較易控制!

味道都幾好!

用剩了的麵糊, 我都有倒在戚風盤, 焗了一個矮版的戚風, 雖然只是用了4g綠茶粉, 但都幾香綠茶味.