Brasserie Les Saveurs @ 新加坡

Brasserie Les Saveurs 係一間位於 St Regis Hotel 既法國餐廳, 大廚之前在法國的米芝蓮餐廳任職, 雖然我並不熱衷米芝蓮級既餐廳, 但有SG blog 友介紹, 見他們的環境很優雅舒服, 食物別緻, 而且提供半自助餐, 自助任食的前菜沙拉, 自選一款主菜, 任食甜品.  

太啱我了, 因為我太麻煩, 唔食牛油, 牛奶, 芝士, 忌廉, 食西餐時, 就太多限制, 最怕去到西餐廳, 打開餐牌, 見到樣樣都唔啱我食, 最恐怖就係餐牌寫得唔詳細, 食物黎到先發現有我唔食既材料, 如果食呢d 半自助餐, 睇住d 實物黎揀, 選擇又多, 比較穩陣, 而且自選的主菜通常比起自助餐的熱盤來得別緻出色!
他們的半自助餐, 只有星期五提供海鮮, 比起星期一至四同星期六只是貴S$10, 所以我地就揀星期五晚黎試.
呢個火腿好香橡木果味.

前菜很豐富, 擺放得很漂亮.

刺身有油甘魚, 三文魚同吞拿魚.

兩款龍蝦仔唔算物別鮮甜.

我試左唔少前菜.

主菜, 我地揀左鱈魚同慢火炆'和牛'面珠.  個鱈魚煎得啱啱好, 好好味, 連伴碟的薯仔都好好食.

個和牛面珠, 雖然賣相看似麻麻地, 因為炆到好深色.

但其實都好好味, 只係可能食左唔少頭盤, 有少許膩, 兩個主菜的份量都好足.

甜品都有好多選擇.

一直食完主菜, 我地都好滿意, 但到食甜品時, 就發生了小插曲, 話說老公去左攞生果時, 我突然發現, 檯面有隻約兩mm既小昆蟲, 我即刻用紙巾'敢'死佢, 到老公返埋位, 我地開始食甜品時, 唔知係邊到又飛左隻一樣款既小昆蟲係檯面, 整死左佢後, 我地就話俾侍應知, 要求換個張檯俾我地, 好啦, 換左去好遠既檯後, 食左兩啖朱古力蛋糕既時候, 我突然又見到第三隻差唔多款既小昆蟲降落左係我地張檯到, 唉, 實在有d 唔耐煩, 即刻舉手搵侍應, 有個經理行埋黎, 我指下隻小昆蟲俾佢睇, 佢見到隻小昆蟲行黎行去, 就用手指'敢'死左佢, 我地話俾佢知, 我地啱啱由餐廳既另一邊搬過黎咋. 佢話幫我地轉去出面個 Drawing Room 到, 因為我仲想嘆埋杯茶同朱古力蛋糕, 所以決定俾多次機會佢地.

 
呢度好舒服, 坐到嘆咖啡食蛋糕都都好正.

茶具好古典別緻.

埋單時, 老公無留意個價錢, 簽完咭起身走時, 至睇到張單係 68星紙, 佢地收錯錢呀, 問番個侍應, 佢先講, 經理話收我地一位錢.  唉, 既然俾半價我地, 又唔大大方話俾我地知, 等我地仲好似好唔客氣咁用左張citibank咭找數, 賺埋個八五折, 就係咁，一餐原價S$160既晚餐，就只係俾左S$68，既然咁抵，咁就算啦, 我地就原諒佢地喇，哈哈，真係無性格！　

Brasserie Les Saveurs
The St Regis Singapore
29 Tanglin Road
Phone: (65) 6506 6888