Pizza 薄餅

用五分鐘歐式麵包既麵糰做 Pizza, 好緊張, 唔知會唔會失敗, 因為係第一次做 Pizza, 而且又未買 Baking Stone, 已經通知定老公, 今晚可能要食出前一丁做晚餐.
買好材料.

原來以我呢個初哥, 要擀薄個麵糰係唔容易, 要做得到圓形就更難, 呢個我都唔係好敢肯定佢係薄批定厚批.  先塗左自製茄醬, 再放其他材料, 個批拉得唔夠大, 放得唔多材料.

我有私心, 因為唔鍾意芝士, 所以唔係落左好多.  係入爐前, 我掃左d 橄欖油係批邊和批底, 希望個Pizza 會脆d.

220 度焗 20分鐘, 但似乎火力太強勁, 太燶了.

不過個批底竟然係脆的, 雖然唔算係鬆脆, 算係帶小小硬的脆, 但又幾好味喎, 太好啦, 唔駛食公仔麵喇.  老公話, 我應該係材料中間加些芝士, 先可以做到拉扯香口膠狀的芝士效果, 收到.

再黎第二個, 今次一半有芝士, 一半完全無芝士, 有芝士個半, 今次搽完茄醬就放左d芝士.

出爐啦, 今次好樣d 喇.

好開心呀, 其實呢個麵糰, 我鍾意做Pizza 既效果多過 麵包多d.