中式包 - 花卷 / 豆沙包

見到blog 友愛美麗 跟翠兒整花卷, 好靚之餘仲好似好好味, 好想試, 因為其實我都好鍾意食中式包, 但我對於做中式包點一竅不通, 完全唔知技巧, 請教過愛美麗, 原來搓中式包係不用太多力, 不用出筋性, 麵糰夠滑就得...

既然有齊材料, 好, 就試玩一次, 不過我唔係用低筋粉, 因為之前做月餅, 用剩好多'香港麵粉', 因為香港麵粉是專用來做中式包點和點心, 我想趁機會用埋佢, 另外我有豆沙餡, 所以決定用一半麵糰黎做豆沙包.
材料A

• 低筋粉200克    (我用香港麵粉)
• 依士粉1/2茶匙   (我用2.5g)
• 糖1/4茶匙    (我用1g)
• 溫水100克 (約半碗)
• 材料B
• 砂糖2湯匙    (我用30g)
• 泡打粉1/3茶匙     (我用1g 多d)
• 梘水3滴   
• 清水1茶匙   
• 生油適量  (我用 1 茶匙)

做法

1. 材料A中乾依士和糖加進溫水，靜候5分鐘至依士升起
2. 依士水加進低筋粉，搓至成幼滑麵糰
3. 盤底掃油，放上麵糰，蓋上保鮮紙發酵至兩倍半大 (表面要無窿, 我用左50分鐘)
4. 材料B中砂糖加發粉拌勻，梘水加入清水中，加入發好的麵糰搓至糖溶，適當加點手粉搓至成幼滑麵糰 (麵糰愈搓愈濕, 都要加好多手粉, 第二次搓係好重要, 影響成品滑唔滑, 要盡量把氣泡排出, 才做形)
5. 麵糰用酥棍碾薄成約一張A4紙大小
6. 掃上薄生油，向前摺疊4-5層，收口向下
7. 用刀把麵卷切成兩份, 一份做花卷, 一份做豆沙包.
8. 花卷 - 用刀把麵卷切成8份, 每兩塊底對底，拉長左右手相反方向扭，兩端重疊，收口在下放於包紙上. 豆沙包 - 用刀把麵卷切成4份, 搓圓, 用手按扁或棍杆平，包入豆沙, 收口.
9. 排於蒸籠內，静置30分鐘，作第二次發酵，大火蒸10分鐘即取出.

製成品, 好醜樣, 原來扭花卷係好難既.

下面呢個係第一個, 已經叫做好樣小小, 到扭第二個時已經扭唔番, 愈扭愈醜怪, 不過又幾好食喎, 甜度啱啱好, 好軟熟, 只係唔夠鬆.

至於豆沙包, 係youtube 找到一個video 教包餡和收口, 看似好易, 但原來都唔易掌握, 個樣好唔靚.

雖然奇貌不揚, 但又幾好食, 只係豆沙本身太甜, 有驚喜, 我好鍾意, 下次試下整菜肉包!

其實係蒸豆沙包既過程有些驚險, 話說放蒸架和包包入煲時, 我一時跣手, 弄咩左個蒸架, 有兩個包浸左一半落滾水, 我一隻手要扶實個蒸架, 唔可以俾其餘兩個跌埋落去, 另一隻手要攞筷子夾番個兩個上黎, 所以都花了好些時間, 我心諗, 濕左個兩個應該要報銷, 不過都諗住蒸埋佢先算, 點知蒸完之後又無咩野喎, 好彩無放棄佢地.
Thank you 愛美麗 和 翠兒 !!!