Pesto Sauce 意式青醬

意式青醬, 不要說自己做, 其實食都未食過, 應該是什麼味道, 我都唔知, 因為所見過的現成意式青醬或餐廳的都有芝士, 所以我從來都沒有試過.

不過最近又發現了一位對烹調美食非常認真的 blog 友 - 維多利亞的廚房, 她詳細介紹了青醬的做法, 原來芝士是最後才加的, 對我來說, 實在太好了, 這樣我就不下芝士了, 急不及待, 買齊材料, 就開工.

做之前, 影張大合照先.

材料:

羅勒 (金不換) 100g
松子 80g
蒜頭  1/4杯
橄欖油 150ml
海鹽  1 小匙
黑胡椒 少許
油漬鯷魚 2 小匙 (可不用)
Parmesan 芝士粉 2 匙

作法:
1. 羅勒洗淨去梗風乾 / 拭乾, 大大切幾刀 (方便打碎)
2. 蒜頭去膜及切片 (方便打碎)
3. 烤松子: 用焗爐或易潔鑊乾炒, 逼出松子香氣, 但不要焦掉
4. 攪碎:  將橄欖油, 松子, 蒜頭, 羅勒入攪拌機, 中速打至泥狀 (可加水易攪, 但不能保存太耐)
5. 調味: 下黑胡椒, 鯷魚及鹽, 自己試味
6. 放入芝士粉攪匀 (不要早放因不易攪拌)
7. 不加水, 就可於冰箱保存 2 - 3 週

今次我用了羅勒 40g, 松子 35g, 蒜頭 5粒, 橄欖油 65ml, 海鹽  1茶匙, 黑胡椒 少許.

因為沒有加水, 所以都幾花時間才攪好製成品, 好香呢, 但仍然未想像到青醬意大利粉的味道, 仍然唔肯定自己喜不喜歡呢款意粉!

我用了四分一青醬, 蒜片, 洋蔥粒, 鮮冬菇, 煙肉和雞柳, 煮了二人份量的意大利粉, 很有驚喜, 很好吃呢, 簡直有相逢恨晚的感覺, 點解我現在才認識你呢 !

下次不用雞肉都得, 可以專心吃意大利粉, 慳返去皮, 去脂肪, 切件, 調味 . . . 慳返很多時間呀!

咖啡栗子蓉卷蛋

早兩天做了些栗子蓉, 想做卷蛋, 好難決定做什麼味道的蛋糕, 想食咖啡味, 但又驚顏色的配搭唔夠靚仔, 做原味的蛋糕就好似靚d, 究竟要好味定要好樣呢 ?

最後決定做咖啡味, 今次仲落足7 g 咖啡粉, 希望可以香 d 咖啡味!

今次是我第三次做卷蛋, 希望可以順順利利, 但估唔到我擺了個烏龍, 我無為意, 自己唔記得買牛油紙, 得番一張夠用來焗蛋糕, 唔夠牛油紙做卷的過程.

點算好, 用錫紙卷得唔得呢 ? 係唔得既, 錫紙會黐走個蛋糕面. 

用返焗蛋糕個張牛油紙得唔得? 係唔得既, 都會黐走個蛋糕面, 我就係用左呢個辦法, 結果整個蛋糕面無哂, 好彩唔係一達達, 如果唔係就更醜樣喇. 

經過今次的教訓, 知道以後如果無牛油紙, 就唔好做卷蛋了!

至於味道都幾好, 好香咖啡味!

塔斯曼尼亞藍青口

早一排睇了一個飲食節目, 主持人(Nigella Lawson) 介紹白酒煮青口, 睇到流口水, 好恨食! 

青口, 一定要非常新鮮, 唔可以冰鮮, 更唔可以雪藏, 因為真的是兩回事。

今日係超市見到有澳洲塔斯曼尼亞藍青口 (Tasmanian Blue Mussels), 呢款青口係新鮮活生生的, 盒上有一個好有趣的貼紙, 上面寫了 "安靜點, 唔好吵醒d 青口, 他們是活生生的青口, 帶走他們, 叫醒他們, 煮左他們, 最後當然係食左他們!"

其實呢款青口, 我之前都買過, 不過唔係我煮, 係我家姐做大廚, 我只係負責吃, 今次要靠自己了, 但煮之前, 穩陣起見都係搵我家姐確認下配料的清單.

我記得Nigella 在節目裡介紹了一個簡單的貼士, 點樣揀選唔新鮮的青口, 在青口未煮前, 揀走開口的 (已死的), 在青口煮熟後, 揀走合口的, 呢個步驟很重要, 因為只要有一隻唔新鮮, 都有機會弄臭成盤青口.

當我剪開真空包裝的青口時, 竟然發現好似好多都係開口的, 有些失望, 唔通要棄掉很多, 但我聞下他們, 只是有海產味, 一d 都唔臭, 當時我未得閒處理他們, 我就將他們放入雪櫃先, 三分鐘後再取出時發現全部都是合口的, 太好了, 他們係未死的, 可能剛才我吵醒他們時, 他們未及時將個口合埋.

白酒香草煮青口

1. 燒紅易潔煲, 下一茶匙橄欖油, 炒香配料 (蒜粒, 乾蔥頭粒, 洋蔥絲, 薑片, 香芧粒, 蔥段, 西芹粒, 紅辣椒)
2. 下青口, 兜一會, 下一湯匙白酒 / 清酒, 加一茶匙魚露, 加水, 加蓋煮三至四分鐘
3. 下金不換, 熄火, 盛起或連煲上.

其實個汁都好好味, 所以用左部分來煮螺絲粉. 另外, 又偷懶, 在麥當奴買了薯條, 用焗爐焗脆後, 再浸汁, 很好吃.

果然係新鮮青口, 全部都很新鮮, 小小異味都無, 非常嫩滑鮮甜, 唯一可惜既係青口肉太細隻, 可能而家唔係當造.

Ciabatta 拖鞋包

我和老公最近迷上了 Bakerzine 餐廳的拖鞋包, 烘過後無論點橄欖油加醋或番茄湯都很好吃, 每次每人都可以吃四至五塊!

於是試下上網找找有無高手教路, 終於找到一位網友黑Ling, 她是一位烘焙高手, 而且很好人, 她將食譜給了我和教了我怎樣做, 今天找到時間試做了.

不過今次做得唔算好好, 第一, 我怕麵糰太濕會難搓, 所以減了少少水, 第二, 我做唔到長方型的造型.

其實出來的製成品都似歐洲包, 有咬口, 都幾好吃, 只是和Bakerzine 的拖鞋包有段很大距離, 他們的是很鬆很軟, 真係好想知道他們的食譜呢!

至於造型方面, 之後在Youtube 看了很多做拖鞋包的Video, 要擇日再好好練習練習!

 

宜家傢俬 @ 新加坡

前兩個星期, 已經想找時間到宜家傢俬行個轉, 一來想去食他們的肉丸, 二來想去逛逛, 買點家居用品, 終於上星期六安排到時間.

他們的餐廳都算大, 款式比香港的宜家傢俬多一些, 我們去到時, 已經人山人海了.

除左必食他們的肉丸外, 炸雞翼差不多是每檯必有的, 而且仲係大大碟, 我們叫了兩隻已經算很少了.

煙三文魚沙律的份量不少, 一碟有四大片, 很慷慨呢, 但其實係無跟麵包的, 麵包是跟湯的, 不過煙三文魚和麵包很匹配呢, 他們應該是一對!

蝦仔雜果沙律都唔錯.

其實宜家都幾識做生意, 餐廳部分的食物可以在他們地下的食店有售, 在餐廳吃過鍾意的話, 又可買回家自己做, 方便簡單!

腰果

零食對我來說, 從來都不太重要, 讀書時, 閒錢唔多, 不會常吃零食, 大個了, 知道多數得人歡心的零食如薯片, 雪糕, 朱古力, 糖果都是無益, 就更加唔會放縱自己, 一直都未試過一個人一次過幹掉一包大薯片，或一個人捧著一盒家庭裝的雪糕大啖大啖的吃.

吃得最多零食的歲月, 相信應該算是上班的日子, 在屋企很少吃, 但在公司就唔同, 和同事們有一個櫃或專區放置零食, 工作時遇到厭惡的咀臉, 或被派上苦差時, 又或要重複做沉悶的工序時, 食些鬆脆可口的薯片, 香濃幼滑的黑朱古力, 真的可幫忙舒緩不開心的情緒, 如果有同事一齊食就更好, 閒聊一會, 效果就更佳!

之後, 發現有益的零食其實都有很多, 原味焗腰果就是其一, 腰果含豐富鈣質，鋅，硒及單元不飽和脂肪酸，可預防骨質疏鬆, 癌症及心臟病, 是零食口果的健康選擇。

焗腰果很用易做, 不用油炸, 健康很多!

材料:

印度大腰果   1kg
鹽  1 茶匙
水 半煲

做法:

1. 洗淨腰果, 預熱焗爐至 150度
2. 煲滾水, 下鹽, 熄火, 放入腰果, 浸五分鐘
3. 撈起腰果, 隔乾水或用廚房紙巾索乾水
4. 平放腰果於焗盤, 入爐, 焗30分鐘, 中途可攪動一至兩次.
5. 取出腰果, 放在大碟至完全放涼後, 再入已預熱150度的焗爐, 焗30分鐘
6. 取出腰果, 完全放涼後可入樽或保鮮袋, 每天當零食來吃.

京華小吃 @ 新加坡

小籠包和鍋貼, 對我來說, 可算是百吃不厭! 唔知點解, 真係好鍾意食!

今天試了一間小店 - 京華小吃 , 是朋友介紹的, 在牛車水附近, 只有幾款北京包點, 麵食和甜品, 舖頭裝修很舊, 但人流不少, 而且國籍都相當多元化, 有中國人, 日本人, 韓國人, 英文人等等.  而且還有遊客參照著新加坡的遊客指南來搵食, 可見這舖頭, 來頭不少!

因為店裡已經很多人, 所以我們被帶到最入的檯, 沿途當然要睇下人地食緊什麼, 到我們坐低時, 目標明確, 除了一定會叫的小籠包和鍋貼外, 入選的仲有酸辣湯, 三鮮盒子, 炸醬麵.

小籠包 - 皮薄多湯, 味道不錯, 較翡翠拉麵的清淡些.

而且仲可以打韆鞦添!

 

鍋貼 - 非一般的造型, 皮脆餡多汁好吃, 呢個不可錯過.

酸辣湯 - 味道都幾好, 不過好似係齋, 無肉的.

三鮮盒子 - 呢個差不多每檯都有, 餡和鍋貼的一樣, 都好吃, 不過我鍾意鍋貼多 d.

炸醬麵 - 又係好多人都有叫, 味道唔辣的, 甜甜地麵豉醬, 都幾香, 不過麵條比較淋.

每張檯都有一個餐牌和一張相, 方便遊客點菜.

京華小吃 Qun Zhong Eating House

21 Neil Road, Singapore

Tel : 6221 3060

Opening Hours : 11:30am-3:00pm, 5:30pm - 9:30pm

Wednesday Off

餵魚 ~ 餵雀

喜歡做麵包, 但總有失敗的時候, 亦都有做得好但食唔哂的時候, 棄掉它們, 似乎太可惜, 覺得唔應該浪費地球的資源, 有什麼簡單的途徑可消滅那些麵包呢 ?

後來發現在屋企附近有個公園, 每日午飯時候, 都有很多白鴿和了哥來搵食, 試過拿些麵包來餵牠們, 見牠們吃得津津有味, 似乎牠們都不太介意幫我吃掉那些有點過硬或有點過韌的麵包!  太好了!



試過有途人曾經叫我們不要餵白鴿, 怕有禽流感, 但我相信, 健康的雀仔應該唔會散播禽流感, 希望我們能夠係雀仔的健康上出到一分力!

另外又發現屋企樓下魚池的錦鯉魚原來都很為食的, 毫不猶豫就會幫手吃掉那些快要過期的麵包.





唔該哂 !

三杯雞

很喜歡九層塔 / 金不換 (Basil) 的香味, 不用一蚊星紙, 就買到一大扎, 但一次太多用唔哂, 放入雪櫃又不能保存很耐, 嘗試用水養住他們, 就可放得耐一些.

九層塔除了可做泰菜, 可以煮意粉外, 仲可以做台式三杯雞, 今日照參照了網友 Miss Jubie 的食譜做了三杯雞.


食譜 (改左少許)

雞件 300g
乾蔥---2粒 (拍扁, 切粒)
菜油 vegetable oil--- 1 tablespoon
薑--- 數片
蒜頭---4粒(切片)
麻油---2 tablespoon
米酒---2 tablespoon
生抽/老抽--- 各2 tablespoon
九層塔---2條 (切碎)
冰糖---1 tablespoon
泰國紅辣椒仔---2 隻 (切粒)


做法:
1. 用中火燒紅鑊, 將菜油燒熱, 加入薑片+蒜+乾蔥爆香, 再加入雞件炒勻, 炒至雞肉變白後, 加入麻油及生抽/老抽, 加少許水, 用中小火煮至汁濃, 最後加冰糖碎, 再贊米酒煮至汁濃
2. 最後熄火加入九層塔碎及辣椒粒, 兜勻, 上碟, 完成～

配飯實在唔錯!

Swensen's @ 新加坡

間中都會去Swensen's 食午餐, 因為在星期一至五, 他們做緊買一送一的優惠, 抵過晚餐, 他們的意粉做得唔錯, 但是麵包周打蜆湯就唔係好得!

我最鍾意他們的Chili Fish Pasta 辣椒炸魚意大利粉! 有兩大塊炸魚, 香脆可口, 意粉都彈牙, 辣汁很惹味, 份量都唔少!

以 Chili Fish Pasta 為例, SGD14.5 一份, 如果叫兩份, 加一服務費及加7% 消費稅後, 每人SGD9 有找!

食物普遍都幾好, 侍應服務殷勤, 環境舒適, 但人手就真係唔係好夠, 每次去到, 就算有位都要等好耐至有人帶位, 作為一間有二十多間的分店的連鎖店, 實在有需要改善呢個問題.

website : http://www.swensens.com.sg/menu.html

無錫排骨

見到網友 安琪拉的小天地 介紹江浙菜的無錫排骨, 做法容易, 材料簡單, 有點似我之前做的糖醋排骨, 不過材料更簡單, 而且她的醋是比較後才落, 令到肉質比較淋, 效果更好.

材料 (我改了少許)

1 磅排骨(Pork Sparerib)
2 根蔥
3 瓣大蒜
3 片薑片
2 粒八角
1 段桂皮
1 湯匙酒
1 湯匙冰糖
1 湯匙鎮江醋
2 湯匙生抽, 1湯匙老抽
適量水

作法
1. 用 1 湯匙生抽將切好的排骨醃 20 分鐘。
2. 在鍋中燒熱適量油，將醃好的排骨煎至表面金黃，先盛起置一旁備用。
3. 鍋中留適量的油以中火將薑片、蔥段及蒜爆香 1 分鐘，再把排骨加入並淋入 1 湯匙的酒略為拌炒，接著加入 生抽及老抽、冰糖和八角及桂皮，翻拌後再加入水，淹過排骨一半的高度即可，大火煮至沸騰後轉成中小火，加蓋繼續煮 大半小時，或至排骨非常熟軟，中途翻拌排骨數次。
4. 待排骨煮至適合的軟度後，加入醋再煮 15 分鐘左右，最後轉至中大火將鍋中的湯汁燒至九分乾即可盛盤。

AOBA Hokkaido Ramen @ 新加坡

又去左烏節路的 ION Orchard, 今次想試 一個來自北海道旭川的拉麵店 AOBA 青葉, 星期六午飯時間去到, 要排隊呀!

試左鹽味叉燒拉麵和豉油叉燒拉麵.

佢地的麵係比較粗身, 仲粗過辛字麵, 個人覺得麵的質地都ok, 都算爽身, 但係個湯就比較咸, 豬骨味唔夠濃,  叉燒有肥有瘦, 都ok, 溫泉蛋做得啱啱好, 不過麵的份量就太少了!  

整體黎講, 我都係鍾意山頭火多些 !

食食下時望到人地叫個樽水, 有味千拉麵的logo, 啊, 原來係味千集團的 !

白吐司 - 吐司模剪綵

之前做了兩次天然麵包香的白吐司, 因為沒有吐司模, 用了蛋糕模代替, 造型斜斜地, 有點怪怪, 原本打算上次返香港正正經經買番個, 怎知道一返到香港已經有意外驚喜, 我亞嫂送了一個好靚有斜紋的450g 吐司模給我, 太好了!

仙姐話一個450g 方型吐司模需要約650 - 660g 的麵糰才可頂角, 仙姐本書所講的份量可製作兩個450g的吐司, 所以我今次做了一半的份量, 因為怕手搓不到太濕的麵糰, 繼續減水8%, 但最後的麵糰的重量只得540g咋, 可能因為麵糰都很濕, 黏了很多在手, 浪費了太多啩!

好彩麵包都發得到上頂, 只是頂不到角!

蓋上蓋焗了32分鐘後, 開蓋發現唔夠色, 開蓋焗多5 分鐘, 雖然都算淡色, 但怕焗乾麵包, 因為書教焗 30 - 35分鐘, 所以決定收手.

 

麵包很軟熟呢, 今朝早餐加了朱古力臻子醬一齊吃, 真的覺得很好吃!