腰果

零食對我來說, 從來都不太重要, 讀書時, 閒錢唔多, 不會常吃零食, 大個了, 知道多數得人歡心的零食如薯片, 雪糕, 朱古力, 糖果都是無益, 就更加唔會放縱自己, 一直都未試過一個人一次過幹掉一包大薯片，或一個人捧著一盒家庭裝的雪糕大啖大啖的吃.

吃得最多零食的歲月, 相信應該算是上班的日子, 在屋企很少吃, 但在公司就唔同, 和同事們有一個櫃或專區放置零食, 工作時遇到厭惡的咀臉, 或被派上苦差時, 又或要重複做沉悶的工序時, 食些鬆脆可口的薯片, 香濃幼滑的黑朱古力, 真的可幫忙舒緩不開心的情緒, 如果有同事一齊食就更好, 閒聊一會, 效果就更佳!

之後, 發現有益的零食其實都有很多, 原味焗腰果就是其一, 腰果含豐富鈣質，鋅，硒及單元不飽和脂肪酸，可預防骨質疏鬆, 癌症及心臟病, 是零食口果的健康選擇。

焗腰果很用易做, 不用油炸, 健康很多!

材料:

印度大腰果   1kg
鹽  1 茶匙
水 半煲

做法:

1. 洗淨腰果, 預熱焗爐至 150度
2. 煲滾水, 下鹽, 熄火, 放入腰果, 浸五分鐘
3. 撈起腰果, 隔乾水或用廚房紙巾索乾水
4. 平放腰果於焗盤, 入爐, 焗30分鐘, 中途可攪動一至兩次.
5. 取出腰果, 放在大碟至完全放涼後, 再入已預熱150度的焗爐, 焗30分鐘
6. 取出腰果, 完全放涼後可入樽或保鮮袋, 每天當零食來吃.