泰北辣雞湯

泰北辣雞湯係一個泰國北部傳統既食品, 係我地早兩年係香港九龍城同心泰國菜館食完學煮既, 識煮之後覺得自己煮得好食個佢, 因為係同心食, d 雞好細粒, 好骨, 無肉食, 自己煮就可以滑溜溜, 啖啖肉. 只要落齊香料, 其實都無咩難度.

其實呢個餸既精髓係香料既合奏,  南薑, 香茅, 檸檬葉, 刁草, 乾蔥頭, 蒜頭合奏出一個獨特既香味, 未煮前切好配料放係廚房, 成個廚房都會好香。

材料:

春雞一隻 (切件用糖,鹽,栗粉,魚露醃約3小時) , 草菇或鮮冬菇, 水瓜或勝瓜

配料A : 南薑, 香茅, 檸檬葉, 乾蔥頭, 蒜頭, 辣椒
配料B : 刁草
調味料 : 糖,鹽,栗粉,魚露, 雞粉(小半茶匙)
滾水 (約2-3碗, 視乎人數, 但不要過多, 否則湯味太淡)

做法:

1. 下油爆香配料A, 放雞炒香, 再放草菇或鮮冬菇炒片刻, 下魚露, 雞粉, 落滾水中火煮15 - 20分鐘至雞差不多熟
2. 落水瓜或勝瓜煮3-5分鐘, 下配料B, 試味/ 調味.

泰北人用糯米飯配呢個雞湯, 我覺得配白飯或米線都得.