北京之旅 2009 - 後感

北京之旅 2009 - 2010
原先打算09年10月去北京, 結果去唔成, 已經預左09年無機會到國家首都一遊, 點都諗唔到可以係09年最後兩天飛到去北京, 有點發夢既感覺. 雖然今次去既地方都係比較大路既景點, 但以第一次黎, 都係正常既, 而且我地去過既地方都算係值得去既.

原來自由行去北京玩都唔係好難, 因為北京地鐵都覆蓋到大部分景點, 我地今次既行程只有長城同798 唔係地鐵沿線, 我自己覺得搭地鐵都算方便, 只係轉線時可能要行得遠少少, 價錢又好平, 去幾遠都只係兩蚊一程, 亦因為咁, 所以大部份時間都好多人, 而且多數都無位坐.

故宮之行, 都令我幾失望, 唔可以好近距離睇到皇帝上朝, 生活, 食飯, 瞓覺既地方, 我一d 都感受唔到金碧輝煌既皇宮氣派, 想像唔到皇帝奢華既享受, 究竟係因為我無行哂而令我對佢有誤解? 但當時又咁凍, 行左中間d 大宮殿都只可以係出面睇, 就算側邊既鐘粹宮可以行得入去, 都只係展覽一些皇帝既寶物, 唔係實景黎的.

冬天遊北京, 時間真係唔見用, 朝早八點先見太陽伯伯出黎, 但下晝三點幾佢已經想收工, 五點左右已經天黑哂, 感覺有d 唔抵, 為左令到時間見用d, 我家姐之前已經教我, 午餐就簡單d, 唔好食咁耐, 晚餐先慢慢嘆, 亦可利用宵夜時間去食火鍋, 因為好多火鍋店都收好夜, 甚至乎開24小時.
所以我地午餐只係去到邊, 食到邊, 都無浪費時間刻意搵特定地方, 但至於宵夜, 去之前都記低左好幾個地步, 但去到, 發覺天氣真係太凍喇, 返左酒店就唔願再出街, 而且找的士唔算易, 企係街到食西北風都幾難頂. 

至於今次住既酒店都唔錯, 房間舒適乾淨, 有免費插線上網服務, 佢地都幾細心, 有兩款枕頭選擇, 有軟身有硬身, 都幾體貼, 而且價錢唔貴, 雖然都算近地鐵站, 但最唔方便係唔近旺區, 仲有一樣好攪鬼, 佢地房裡面係無雪櫃架, 係我第一次住酒店無雪櫃咋, 殺我一個措手不及, 因為我帶左一樽自家製既無花果雪梨茶到北京, 打算每天飲d 黎滋潤下, 但無雪櫃, 我地唯有第一晚隊哂佢.

早兩天同個好朋友傾開電話, 佢介紹我下次可以試下住四合院既酒店, 因為佢上年去過北京, 曾經住過係四合院, 好特別呀! 我上網搵過, 原來都好多選擇, 古式古香既陳設, 院中庭臺樓閣, 好有客棧既味道, 而我地現代人最緊張既獨立浴室同上網設備都有, 如果可以住下四合院又真係一個難得既經驗.
相比起南方人, 我覺得大部份北京人都幾樸實, 友善同有禮貌, 而且我地係海底撈火鍋店遇到既服務員同係大班按摩店既按摩師, 唔止服務好, 仲感受到佢地好有心去做好佢地既工作, 係好實在個種, 唔係表面就算.
今次去五天對我黎講已經好足夠, 因為我既皮膚已經頂唔住, 又'爆冊', 又濕疹, 又敏感, 北京唔止凍到震, 仲乾燥到爆, 而且自己又唔慣著冬天衫, 雖然帶左唔少護膚品, 結果都係傷痕纍纍.
經過今次既測試, 我覺得自己真係唔啱住係北京呢d 咁凍既地方, 因為太凍時, 個腦真係會凍實左, 好多野都諗唔到, 而家諗番, 真係覺得自己好蠢, 因為一直困擾我既問題係就算我著夠衫, 個身唔凍, 但對手, 帶左皮手套同用埋暖包都凍到僵左, 係街見到有厚d既手襪賣, 我又嫌質地唔好, 怕惡化我手指 d '倒刺', 但其實我應該買多對手襪, 帶係自己舊個對手套出面, 咁咪唔辛苦自己d 手指囉!
頭四天可以順利完成我地想去既景點, 我地已經好滿意, 係最後一天仲加送一個落大雪既壓軸節目, 雖然帶黎左一d 唔方便, 但白雪雪既雪景實在靚到暈, 尤其是我地身處商業區, 人流少到不得了, 老公話有d 電影 '明日之後 The day after tomorrow' 既感覺, 呢次難忘既北京之行就由一場世紀大雪黎做個完結.