八達嶺長城-> 前門大街 -> 王府井小食街 -> 海底撈火鍋
去完長城, 天又未黑得哂, 就不如去一轉前門大街走走, 搭地鐵去到前門站, 由B出口出, 過條大馬路, 見到呢個 '正陽橋' 就係前門大街.
聽講呢度係一條重新建造的民初街, 有電車可坐.
除左有好多老店開係呢度, 仲有好多外國名店都係度插旗.
古色古香既建築物, 好有味道.
我地行行下, 行左入一條胡同.
呢條胡同叫做糧食店街, 有好多地道小食.
仲俾我地見到呢間有四百多年歷史既六必居醬園.
嘩, 真係好多唔同種類既醃菜, 應該同韓國泡菜有得比併.
我地係呢度買左炸醬麵醬, 水煮魚醬料同埋一些小食.
因為唔諗住係呢頭食晚飯, 所以都無係呢度逗留好耐, 想搵的士去王府井, 竟然截唔到的士, 然後有部'摩托車' 兜生意, 原本都唔敢搭佢, 但又真係無的士喎, 結果係佢死纏爛打之下, 就以十五蚊成交.
睇下, 車仔細細, 兩個人坐入去, 真係有d 迫, 皮包骨, 有d 牙煙, 上車時, 我都忍唔住叫佢小心一點!
遊北京, 當然唔少得王府井小吃街呢個景點, 種類唔少, 但又唔係多到好震撼.
其實個d 炸蠍子呀, 炸金蟬呀, 我諗都係多人睇, 唔多人食, 我懷疑都唔知擺左幾耐.
我地見凍凍地, 而且d 粟米好靚, 買條燒粟米食, 睇佢唔出, 原來好硬, 同我地平時食既 BBQ 粟米好唔同, 唔忿氣, 再買多支烚粟米, 嗯 ... 都係麻麻地, 呢個無咁硬, 但係唔甜既, 原來唔係超甜粟, 記住, 粟米唔駛食.
又見到阿拉伯烤肉, 以今日晏晝既經驗, 呢個雖然係羊肉, 但有孜然粉同辣椒粉, 應該會好味, 好, 兩串呀唔該 ... 嗯, 今日晏晝個串, 好味少少.
有熱辣辣既桂圓雪梨茶, 呢個得呀, 可以潤番下之餘, 又可以捧住佢, 俾隻手保下溫.
跟住食左五隻天津狗不理包子, 呢個唔算好好, 但都ok.
其實都仲有d野食係吸引既, 不過太飽肚既, 就唔敢食喇, 因為想留肚食火鍋.
離開小吃街, 咦, 邊個擺左個2010 世界杯官方比賽用既波係路中間? 個樣都唔係好特別.
行左一陣, 就搵的士去食火鍋, 唔知點解, 好多空的士都唔停, 之後又有'摩托車' 撩我地, 今次我地唔睬佢地啦.
No comments:
Post a Comment