The Sushi Grill Shop @ 新加坡

星期六去聖淘沙名勝世界之前, 我約左去見牙醫, 主要係為左定期洗牙, 呢位牙醫唔單止好專業, 而且都好好傾, 諗番起, 我地用左呢位牙醫都有兩年, 第一次見佢時, 唔係有人介紹, 只係我地睇醫務所大廈既水牌, 用名字揀選佢出黎, 估唔到就咁樣就搵到一個由香港黎既牙醫.
由檢查牙齒, 洗牙到傾計, 都用左大半個鍾頭, 走得既時候, 都已經中午一點喇, 要食個快既午餐至入聖陶沙, 因為怕去到裡面可能會無啖好食.
鼎泰豐好多人等位, 我地就行左去高島屋, 老公提議試呢間日式烤魚店 The Sushi Grill Shop, 行到去, 啱啱有兩個人走, 我地就坐底.  老公要左個味醂鯖魚套餐.

好肥美下, 魚皮燒到卜卜脆.

我要左個鹽燒鯖魚套餐, 雖然係魚尾, 但都好甘香好有魚味,

雖然我呢個無魚腩, 但我好肯定我一定有魚腩食, 因為老公頂唔住魚腩既魚香味, 所以佢個魚腩一定會落入我手上, 哈哈.

食物選擇少過二十款, 主要都係烤魚, 好有日本味道.

呢間烤魚店都幾多人幫襯, 一有客人食完走, 好快就有新客人坐落黎, 店仔細細, 得十三個位, 水準都唔錯.