祟文門菜市場 -> 天壇-> 七九八藝術區 -> 晚餐: 麻辣香鍋 -> 水立方 / 鳥巢夜景
每天早晚, 我都會上網睇下天氣預測, 因為實在擔心天氣差會影響我地既行程, 天文台預計今晚會有小雪, 明天就中雪.
今日第一個行程就係去逛逛祟文門菜市場, 打算係個度食早餐, 不過係出發前, 老公提議去酒店餐廳食d 野先去, 咁又係, 打少少底先, 等自己有d 熱能, 如果唔係好易凍到震.
坐係餐廳就發現, 原來尋晚已經落左小雪喇, 餐廳出面既民族園已經舖上一層薄薄既雪啦, 幾靚喎.
連條街都舖左雪喇, 太陽伯伯今日放假.
坐地鐵到五號線既祟文門站, 一出站就係祟文門菜市場.
其實每次去旅行, 都會想行下當地既市場, 今次飛黎北京前, 巧合地睇到'日日有食神'個節目, 滔滔正介紹呢個菜市場, 講到好似好多野睇同有小食值得試, 而且呢度又同天壇好近, 所以我地就揀左今日黎呢度行個轉.
其實呢度唔係好大, 每個種類都係得兩三檔, 兩檔菜, 三檔魚, 規模唔算大, 不過好整齊乾淨.
原來北京既萍果係爽脆過平時食個d既.
糕點既款式多不勝數.
仲有禮盒包裝, 雖然款式老土, 但都幾有特色.
呢盒大禮盒裝要五十五蚊, 收一盒有排食.
麵包包裝得好懷舊.
豆類製品種類繁多.
呢個豆腐皮有d 似地拖頭.
北京海產唔多, 游水魚更加少.
呢度原來都有大閘蟹, 不過好細隻.
鮑參翅肚都有得賣.
熟食既檔口都唔多, 而且無位坐, 好多人買左就企到食.
我地食左兩個水煎包, 都好食.
呢個烤肉夾膜, 我地都有試.
除左烤肉, 仲有大量爽口既蔬菜, 只可惜個包比較濕.
我地又食左兩款合桃酥, 一個甜, 一個咸.
我覺得雖然電視節目形容呢個市場, 好大好多野睇, 不過其實真係唔算好特別, 唔算好精彩, 同東京既築地市場, 巴黎既巴士底市場無得比. 所以如果係住係呢度附近, 又或者係行開附近, 就不妨入黎望下, 但如果係特登過黎, 就唔係好值得喇.
No comments:
Post a Comment