北京之旅 - 2009 [第三天] (三) 胡同

2010 年 1 月 1 日
水立方/ 鳥巢 →天安門 →人民英雄紀念碑 →故宮博物館→胡同→什剎海 →南鑼鼓巷→ 大董烤鴨店 → 東方大班按摩
離開故宮博物館, 係景山公園附近, 我地預左有人力車大叔兜搭, 可以搭人力車同時遊胡同, 然後送我地到什剎海, 果然好快就有大叔過來開價, 好貴80蚊一個人, 當然要講價啦, 最後講到60蚊兩個人.
自以為好精明既我, 諗住一切都係我預計之內, 但無料到原來佢部車唔係跟身架, 我地要跟佢去攞車, 佢話兩分鐘就到, 沿途佢就已經不停講野, 分散我地注意力, 我地其實都行左好耐.  而且佢部車麻麻地, 好舊, 下次記得睇埋部車至好決定.

正式踩入胡同喇, 狹窄既小路係胡同既特色.

人力車大叔都算好多野講, 有d 都幾得意, 例如:
- 打左入冷宮既妃嬪, 原來唔係住係皇宮 (故宮)架喇, 只係住係皇宮附近呢d 四合院, 想再俾皇上見到都幾難喇 !
- 宮女同公公係皇宮受訓, 受訓期滿, 考試合格就可留宮中工作, 若果唔合格就會俾派到四合院做苦力.
- 下面呢間係恭儉冰窖, 舊時皇上要保凍既食物就會送來呢度, 用後海既水冷凍, 而且冰窖下有祕道往皇宮, 方便送食物到宮中. 門側有個牌寫著'北京市文物保護單位', 我問車夫, 而家呢個單位係用黎做什麼, 車夫話係私房菜.

 
- 下面係磨盤院胡同, 專負責磨米, 磨麥等等, 分工都幾仔細.

- 屋門上面突出黎既係'門當' 所謂門當戶對既門當, 愈多愈好, 下面呢間就有四個!

行到中途, 車夫大力推薦我地入一間四合院參觀, 二十蚊一個人, 不過當時我已經無哂電, 又肚餓又眼瞓, 所以拒絕左佢, 當時都有其他車夫幫口, 話我地唔入四合院睇, 就一點意義都無.
之後車夫完成個行程後收錢時, 都找少左十蚊俾我地, 要我地俾小費佢, 佢知我地肚餓, 就介紹左一間清真食店俾我地, 係喎, 唔講唔覺, 北京都好多回教徒.

呢間小店都幾厲害, 人頭湧湧, 出面好多人買外賣, 入面都好多人幫趁, 佢地有好多飽點小吃, 大部分係做定, 買左自己搵位食.
我地要了三款飽, 一個係白菜牛肉 - ok, 一個係韭菜雞蛋 - 幾特別, 韭菜香, 同炒蛋碎又幾配合, 另一個係 ... 唔記得左喇. 後面個條, 我地唔知個名, 類似脆麻花, 不過有豆沙餡, 個酥皮都得, 幾好食.

呢個餡餅係牛肉同蔥, 都幾好, 如果熱辣辣就更好喇.

呢個芝麻燒餅夾住既係牛肉同大量香菜, 即係芫茜, 好香.

深色個餅, 叫做'糖火燒', 是北京人常吃的早點小吃之一，已有300多年歷史, 由於用了麻醬, 紅糖加落麵糰搓, 所以好香, 再用油煎, 質地似酥餅, 都幾鬆化. 後面係豌豆黃, 都好味, 我地又買多支豆沙酥皮條.

見對面個大叔叫了一大盤牛肉水餃, 熱辣辣新鮮煮出來, 好好味咁, 我地見個餐牌寫住一斤係二十五蚊, 我地擔心一斤食唔哂, 就問個大叔, 係唔係最少買一斤, 佢好好人, 話買四兩都得, 於是我地就買左四兩, 嘩, 有成二十隻, 好彩無買一斤.  之後見個大叔再叫多一盤, 勁呀!

其實個度仲有好多地道小吃, 只係自己細膽, 唔敢亂試, 怕會食左羊肉, 而家諗番, 又覺得自己太笨喇, 呢間既食物唔算好好食, 不過種類繁多, 好多當地人幫趁, 總算係大開眼界.