八達嶺長城-> 前門大街 -> 王府井小食街 -> 海底撈火鍋
行萬里長城係我地今次北京之行既重點, 一直留意著天氣預測, 係我地逗留北京呢幾日, 最好天似乎係今天, 因為今天係天晴, 聽日開始會天陰, 所以今日就去八達嶺長城.
之前做功課, 知道有幾種方法去八達嶺:
1. 參加一天團, 以我所知多數八達嶺團都會去埋十三陵, 要花一整天.
2. 坐919 號巴士 - 在積水潭地鐵站下車, 德勝門出口, 出地鐵站口轉左直行,一直行500m左右,有一個好似停車場咁既地方,有一架919號公車,車頭寫住'八達嶺專線' ($12),小心沿途有好多架919公車, 去不同既目的地, 不要上錯車, 而且沿途有人在919車前介紹你坐其他的車，來回40元，一定不要相信他們.
3. 坐火車 - 乘地鐵到北京北站坐火車去八達嶺長城, 由北京北站至八達嶺站的時間約 65 分鐘 ($17), 出站後轉左跟指示牌走, 約 10-15 就會到八達嶺長城的入口, 在車站的出口會有客貨車以 $5 送客人到長城入口.
因為我地唔打算去十三陵, 而且我地有信心自己可以坐巴士去, 所以決定去坐919 號巴士.
酒店既早餐唔算豐富, 但我地都刻意食得飽一點, 因為唔知長城附近有無野啱食, 我地在朝早八點十分係酒店出發, 希望早些出發, 長城少d 人, 影相可以靚d, 當時只得零下十二度, 不過著夠衫, 食飽左都未覺得好凍.
由積水潭地鐵站行去919公車站, 其實都幾遠, 不過沿途都無人叫我地坐其他車, 無驚無險就搵到去八達嶺既車, 雖然無寫住'八達嶺專線', 但無論坐在站內既職員, 坐在車內既乘客, 同埋司機都話呢部車係啱, 我地唯有信佢地喇.
大約一個小時, 我地就到左八達嶺, 中途停左十個站左右, 都ok. 見到裡面有d 餐廳, 可以好放心喇, 行完可以有野食.
嘩, 呢度凍過市區好多, 雖然我地帶左手襪, 但隻手都好凍呀, 唔怪得我地尋日見朋友返工都係用滑雪手套喇, 一d 都唔誇張, 不過我唔想用咁厚既手套, 因為怕太厚會好'論盡', 但為左暖d, 我都買左個 Ear-Warmer 包住對耳仔先. 睇下呢度既洗手間門口要掛好厚既棉胎至可擋風.
我地之前收左唔少人既料, 知道上八達嶺可以搭吊車, 吊上大半段路, 可以慳番好多腳骨力, 但之前都有d 擔心, 唔知穩唔穩陣, 諗住黎到睇下咩環境先決定搭唔搭, 但係呢度實在太凍喇, 攪到咩都唔記得, 個心只係想快d 搵個纜車站.
完全無思考下就俾左六十蚊一個人買左飛跳左上吊車.
搭完吊車, 我地已經上到好高喇, 要再俾錢 (40蚊) 至可以行入去長城, 奇怪喇, 上到黎, 又唔係好似下面咁凍喎.
剩番落黎, 我地要行上去既路原來唔係好多. (下面紅點係我地搭完吊車既地方, 紅箭咀就係八達嶺最高既地方.)
長城有d 路, 真係好斜下, 真係覺得舊時d 人起長城好叻!
其實唔駛好耐, 我地就行到上頂, 望番落去, 真係好壯觀, 好厲害!
下面個 Video 就係企係最高既地方影既.
我地慢慢行番落去, 有d 石級其實都幾跣, 所以我都係扶住側邊既扶手行.
我地買既吊車飛係來回票, 當我地行返去吊車站附近時, 兩個人遲遲都唔捨得行去搭車, 好似未夠喉咁, 所以我地決定向下行多一陣, 至番轉頭搭車.
不過行下行下, 又覺得可能行埋落去都未必好辛苦, 而且我地兩個突然又好似好想行足全程, 睇哂成段八達嶺. 睇番轉頭, 紅色圈係頭先最高既地方, 其實我地都行左幾遠了.
向下望, 綠色圈就係我地既目標, 好喇, 立定決心唔行番上去, 就可以全心全意向下行.
差唔多一點左右, 我地終於行完喇, 其實都幾攰, 不過好有滿足感, 雖然上去時, 出左貓, 但總算係自己行落黎, 而且我地仲要係喺2009年最後一日完成呢個長城之行, 感覺很好.
唔知係唔係地勢既問題, 個d 冷風又返黎喇, 我地要去搵野食同避寒先.
係去搵餐廳既短短十零分鐘, 我d 手指已經凍到僵左喇, 到我地d 野食黎到, 我d 手指都未可以郁得好好, 唔係誇張, 我d手指唔係好用到力, 只可以好笨拙咁托起筷子, 用筷子托起野食, 送入口.
d 野食其實都 ok, 不過我食得好'論盡'.
牛肉湯麵
炸醬麵
蒜蓉炒油麥菜.
我地搭番 919返德勝門, 出到市區好塞車, 係積水潭地鐵站出面有串燒烤肉賣, 原先我唔食, 因為係羊肉, 但係見老公食, 好似好味, 又係好香孜然粉味, 忍唔住我都食左一粒, 又幾好味喎, 孜然粉既功勞, 只要唔好食d 肥肉, 就真係一d 羊肉既騷味都無.
No comments:
Post a Comment