八達嶺長城-> 前門大街 -> 王府井小食街 -> 海底撈火鍋
今晚打算行完王府井小食街, 就會去海底撈食火鍋, 呢間海底撈係我家姐介紹, 成個北京有好多間分店, 佢去個間係三里屯, 我係大眾點評到找不到地址, 就印定左一間較近我地酒店既北奧分店, 做定兩手準備.
我地諗住當時只係七點零鐘, 食晚飯好似早左d, 就打算試下去三里屯個間, 順便叫做去過三里屯.
唔容易找到一部的士, 話俾司機聽去三里屯海底撈火鍋, 佢識海底撈火鍋, 但無地址佢好難搵, 我地話俾佢知, 聽講話係在最後一條街, 司機超好人, 去到三里屯又幫我地問人, 又落車搵, 有人又點左佢去第二度, 最後我地決定遊完一輪車河後, 就去番北奧分店.
去到北奧大廈, 火鍋店在三樓, 一樓掛著一個指示牌 '海底撈等候區', 我地行去望下, 嘩, 見到好多人係一間大房到玩啤牌, 捉波子棋, 睇電視, 食生果/ 炸蝦條/ 花生, 仲有一個角落有人做指甲美容, 終於我地明白喇, 佢地係到等緊食火鍋, 但玩得好開心下, 唔係好心急咁喎.
我地即刻上三樓睇下咩環境, 嘩, 好誇張呀, 要等一百三十幾張檯呀, 真係好多人喎. 唉, 附近又好似無其他野食, 我又好想食火鍋, 但係百幾張檯點等, 火鍋快極有限啦, 諗住落番一樓睇下水牌, 有無其他選擇, 係一樓有個海底撈既侍應姐姐, 好好人問我地攞左飛未, 又叫我地係等候區食下野, 慢慢等.
我扮可憐, 話我地好慘要等百幾張檯, 有無辦法早些有檯, 個姐姐突然攞出一張飛出黎俾我地, 呢張既號碼係早五十幾張檯, 我地即刻醒哂, 好感謝佢呀, 原來肯問下, 真係可能有驚喜架.
其實佢地都幾識做生意, 安排一個有檯有椅既地方, 不停供應零食飲品, 提供打發時間既玩意, 令到等位都變成一件樂事, 結果我地捉左三盤波子棋, 食左d 零食後, 見仲有三十張檯就到我地既時侯, 上番三樓到等, 有侍應望下我地既飛, 好快就俾檯我地, 太好喇, 一個鐘頭就有檯, 唔太差喇!
我地叫左個鴛鴦鍋, 麻辣湯底好似好刺激, 清湯都好好味.
呢間火鍋好體貼, 可以點半份火鍋料, 好似我地得兩個人, 想食多些種類又唔想浪費食物, 就可以每樣食物要半份.
半份肥牛
半份牛脷.
半份蔬菜拼盤, 呢個好好, 我地後來再加單.
侍應姐姐極力推介既滑牛 (半份), 佢話煮好耐都唔會韌, 其實應該係用梳打粉醃過既切牛. 都 ok, 不過可以留位食其他.
半份木耳, 其實係雲耳, 用麻辣湯食, 好得.
半份丸類組合, 好認真.
醬汁每位六蚊, 好多配搭, 麻醬同雜菇醬, 好味.
一份龍鬚麵, 我地以為係即拉既麵, 原來係包裝, 都好味, 不過佢地係有即拉既麵, 值得試.
環境都唔錯, 佢地既服務一流, 又細心又有禮貌, 有問有答, 佢地話佢地既火鍋店, 日日都咁多人, 可以打電話留位.
佢地有好多分店, 我地今次去既係惠新店, 原來三里屯個間係白家庄店.
食完好滿足, 不枉我地等左咁耐, 下次一定要訂位先.
海底撈火鍋(北奧店)
地址: 朝陽區惠新東街甲2號北奧大廈3樓(近北四環)
电话: 010-84639300
No comments:
Post a Comment